الموضوع: ايه هوا تعديل علبه الدركسيون؟؟؟؟؟؟

السلام عليكم يا اهل بروتون الكرام

المنتدي هادي وجميل ويشجع الواحد علي المشاركات
النهارده هنتكلم عن تعديل علبه الدركسيون
ايه هي علبه الدركسيون
كيفيه عملها
اجزاء اليه التوجيه
ايه هوا التعديل
بيركب فين
فوائده



ايه هي علبه الدريكسيون ؟؟؟

علبه الدركسيون بكل بساطه الجزء المسئول عن توجيه العجلات الاماميه في اتجاهين يمين وشمال عن طريق حركه الدركسيون وبيتم ذلك عن طريق عدد من التروس





كيفيه عملها ؟؟؟


نظام التوجيه بيقوم بتحويل حركه الدركسيون الدائريه في اتجاه عقارب الساعه وبعكس اتجاه عقارب الساعه الي حركه محوريه للعجلات الاماميه وفي العربيات الخفيفه مابنحتاج نظام الباور
يعني مثلا العربيات الهاتش باك مفيش ضروره لاستخدام باور
لكن اغلب الموديلات الحديثه مزوده بنظام باور استيرنج وده لتخفيف حركه الدوران




الاجزاء ؟؟؟

- الاجزاء ترس لولبي
- وترس عرضي بكل بساطه




علبه الدركسيون المزوده بوحده باور هيدروليكيه

مثل ما كلنا نعرف ان اي احتكاك بين جسمين بينتج عنه حاجات كتير
واهم حاجه احنا هنتكلم عنها ان نتيجه احتكاك الكاوتشات الاماميه بالاسفلت ونتيجه وزن العربيه وعرض الكاوتش بيكون في مقاومه وجهد كبير لتحريك الدريكسيون يمين وشمال
عشان كده تم تزويد العربيات الحديثه بوحده الباور
زمان كنت اسمع عن عربيات معينه الي فيها باور
اكن دلوقتي 99% من العربيات بتكون نازله بالباور حتي العربيات الصغيره او الهاتش باك .


ايه هوا الباور ؟؟؟


الباور ببساطه .... وسيله مساعده لقائد العربيه (مش انك لما تعوز تلف تقوم تتصل بصديق )

الباور عباره عن استخدام القدره الهيدروليكيه في القيام بـ 75% من الجهد الواقع علي السواق
وطالما قولنا هيدروليك معني كده ان في طلمبه وطالما قولنا انه بيقوم بشغلنا بنسبه 75% معني كده ان الباور بيشتغل وبيفصل كمان في حاجه بتتحكم في الاتجاهات
وطبعا اذا ذكر الهيدروليك معناه في زيت هيدروليك وخزان للزيت





الصوره بتوضح الاجزاء واعتقد مش محتاجه توضيح

بس الي عايز اقوله ان اي شيء بينظغط عشان نرفع الضغط بتاعه بينتج عنه ارتفاع في درجه الحراره وطبعا لازم يتم التبريد وعندنا في بروتون هنلاقي لو بصينا عند النمره الي راكبه في الاكصدام الامامي ماسوره ماشيه ولفه وراجعه تاني مكانها ... دي بتاعت الزبت الهيدروليك عشان التبريد ومكانها هنا عشان تكون في وش الهواء






اعتقد لحد كده كلنا اخذنا فكره عن علبه الدركسيون واجزائها وطريقه عملها وكمان العلبه المزوده بوحده الباور الي هيا عندنا في بروتون جين برسونا واجا ويرا.

---------------

طيب ايه اغلب مشاكل علبه الدركسيون ؟؟

العيب الاول : المشكله الاساسيه والي نادر حدوثها هى ... تسريب لزيت الباور من اي من الاويل سيلات الموجوده علي العلبه ودي وارده جدا في اي علبه دريكسيون عشان محدش بفتكر اني بتكلم عن بروتون ودي حلها اما بتغير العلبه ككل او تغير الاويل سيلات باخري جديده

العيب الثاني : وده حالات فرديه في عربيات بروتون وده اساس موضوعي النهارده

:: صوت الخبط في العلبه ::

صوت الخبط في علبه الدريكسيون بينتج عن المطبات الصغيره جدا التي لا تكاد تكون محسوسه لكن بتؤثر في السنتر الخاص بعمود اداره العلبه او بالبلدي كده الاسكاترا يعني وطبعا الترس اللولبي الي قلنا عليه بيكون راكب علي الاسكاترا عشان كده اي اختلاف في السنتر بيحدث عنه صوت الخبطه الي بعض منا سمعه.


طيب ايه الحل ؟؟

درسنا زمان ان السوائل عير قابله للانضغاط بعكس الغازات عشان كده بنستخدم السوائل في نقل الحركه زي الباور والفرامل
وهي دي مشكله علبه الدريكسيون ان الزيت الموجود حول الترس اللولبي او البنيون غير كافي
ونلاحظ ده في اي عربيه من عربيات الساده الاعضاء الي مقبلين علي عمل التعديل ده
دور العربيه وخلي الدركسيون في وضع مستقيم
افتح الكبوت
انظر علي خزنه زيت الباور هتلاقي ان في زي فوران او تقليب للزيت مستمر وده معناه ان في رد فعل عكسي من الطلمبه .


والتعديل الي تم من قبل شركه بروتون الام كالاتي ...

الاول تعالوا نشوف مكونات نظام الدركسيون في بروتون عشان نقدر نفهم



دي علبه الدركسيون بتاعتنا وباين فيها مواسير الزيت



ده شكل الطلمبه وخزنه الزيت
لحد هنا كله تمام ومفيش اي مشكله



نيجي بقي للمهم او الجزء الي فيه المشكله ....




الصوره بتوضح شكل لخزنه الزيت وبيكون راكب فيها من تحت خرطوم بقطر 1/2 بوصه عشان سهوله سريان الزيت
الخرطوم ده راكب فيه من جوه خانف او بمعني تاني حاجه اضيق من قطر الخرطوم
وهنشوفها في الصوره عليها دائره
الجزء ده مش بيخلي الزيت الخارج من الطلمبه لعلبه الدريكسيون غير كافي بالدرجه الي تخلي الزيت بكون مغلف الترس اللولبي وعليه بنسمع صوت الخبط
وبيتم تغير الاورفس ده او الخانق ده وبكده بيسمح بمروم كميه زيت اكبر الي في علبه الدركسيون كافي جدا لامتصاص الاصوات .

طيب ممكن حد يسال هل ده ليه اعراض جانبيه علي المدي البعيد
اقول لا لان في في علبه الدركسيون صمام امان بيدخل الزيت بضغط معين حسب التصميم وايضا الصمام ده بيقفل علي السرعات العاليه اعتقد عند 100 كم وده لضمان التحكم الاقصي في العربيه
واي استفسار انا تحت امركم

انا ما اتعاملتش معاه بصراحه لاكن انا راقبته في مره من المرات من بعيد لبعيد كده ولقيته انسان عادي بيتنفس زي الناس وبيمشي عادي
بصراحه مش عارف احكم عليه
وبعدين وحش او كويس هوا انا هناسبه
وحش لنفسه كويس لنفسه برضوا