السلام عليكم ورحمة الله وبركاته
مبدئيا كده انا مش داخل اتكلم عن حكم تربية الكلاب في البيت ولا انهم نجسين ولاانهم بيمنعوا دخول الملائكه للبيت والكلام اللي اعتقد الاغلبيه عارفينه ولو مش عارفينه ممكن يقروا عنه
انما لما تكون المشكله ان عمارة جنبنا (جيراني يعني) مربيين كلاب وحاطينهم في البلاكونات
وصوت الكلاب (المقزز) عالي جدا ويشق سكون الليل
مش عايز اعرف هما بيناموا ازاي!!! ولا ايه المتعه في صوت المخلوق القذر النجس ده ولا يهمني الحقيقه....
لكن انا نومي خفيف جدا والموضوع اصبح زائد عن حدود احتمالي
وانا مش بحب المشاكل ولا وجع الراس
والحقيقه اتكسف اروح اقولهم سكتوا الكلب ده ياجماعه (مهو الانسان لازم يكون حسيس وعنده دم برضه...)
والله كنت زمان بقول على كلاب الشوارع وانهم لما بيشتغلوا بيبقوا مزعجين
لكن والله دول مغطيين على كلاب الشوارع
خصوصا اني ساكن في منطقة هادئه بالليل فالحقيقه صوتهم بيبقى مجلجل
والعجيب انهم مبيشتغلوش غير بالليل او يمكن مبنحسش بيهم في النهار...
والله مستعد اسمعكم ريكورد لصوت الكلاب علما باني بيني وبين العماره اللي فيها الكلاب دي اكتر من 60 متر ومع ذلك الصوت فظيع لدرجة ان ريكوردر الموبايل يجيب صوت الكلاب من البعد ده....
ماعلينا
حد بيعاني من الموضوع ده زيي؟؟؟
طب لو انتا مكاني في حاجه ممكن تتعمل؟؟
وسؤال كمان للي بيربي كلب عنده ياترى عارف احكام تربية الكلاب ولا انتا مربيهم كهوايه؟ ولو جارك اتضايق من كلابك هتتفهم شكوته ولا هتقوله انا في بيتي واعمل اللي عايزه؟؟؟
في بس مقوله بحب دايما اقولها للي بيضايق الناس بتصرفاته...
(حريتك تتوقف عندما تبدأ حرية الآخرين...)
تحياتي