فقط و حصريا لمحبى شاشة عرض lcd فى نيسان صنى
شاشة عرض فى النيسان صنى
من حوالي فترة كبيرة و انا بدور علي DVD عشان اركبه في العربية .. مش مسألة اني اتفرج علي الفيديو اللي بيتعرض لكن بحب ان اشغل مثلا مسرحيات , افلام حاجات من ديه خصوصا في السفريات الطويلة و كمان عشان اسرتي مينشغلوش بالطريق لأنى بحس انهم بيسوقوا معايا و دي حاجه بتزهقني .. عشان كده فكرت في شراء DVD عشان اشغلهم عني و عن سواقتي .. المهم ..
و انا بدور لاقيت اسعار الـ DVD غالي جدا جدا يعني عشان تبتدي تجيب حاجه محترمة يبقي كده هتبتدي من 1800 جنيه و انت طالع فلاقيت الموضوع كده كتير علي لغاية ما لاقيت شاشة في احدي المحلات مقاسها 7 بوصة و لاقيتها فيها امكانيات حلوة اوي و كمان رخيصة عاملة 500 جنيه طبعا صيني بس قولت مش مشكلة تقعد علي اد ما تقعد و بعدين نبقي نغيرها بس فعلا شغلتها سفر ساعة كاملة و كانت فعلا روعة روعة و الوانها جميلة و الصوت خطير.
الشاشة مكانها رائع و بتركب عادي جوا علبة الطابلوه الامامية و طبعا ورا الشاشة قاعدة انا مش مثبت الشاشة خالص انما مزنوقة جوا علبة العربية كما هو موضح بالصور و مش بتتهز خالص خالص حتي لو نزلت في مليون مطب .. يعني تثبيتها سهل جدا
بالنسبة للتوصيلات جاية كلها معاها .. بتتوصل كهربتها من ولاعة العربية و بتوصل الصوت عن طريق AUX في الكاسيت العربية او لو الكاسيت مش مجهز يبقي ممكن تشتري الشريط اللي فيه الواصلة و توصله بالشاشة عادي او ممكن لو الكاسيت في LineIn يبقي ممكن تخلي الكهربائي يوصلها لك .. يعني توصيلاتها سهلة جدا
الشاشة كمان بتقرا امتدادت MPG و AVI و كل ده عن طريق USB او عن طريق فتحة كروت الميموري و كمان مزودة بتليفزيون و اريال خارجي و ريموت كنترول و كمان فيها AV IN و AV OUT يعني من الاخر شاشة مش محتاجين الي DVD خاالص .. و كمان ممكن توصل بيها هارد ديسك اكسترنال و ده جربته فعلا و شغل كل اللي فيه و امكانيات كتيرة
طبعا الموضوع هنا بيوضح انه ممكن تركب الشاشة بكل سهولة في العربية و ممكن كمان تثبتها في سقف العربية بس دي انا لسة مجربتهاش بس ان شاء الله ناوي اعملها بس لما اشوف مثبتين الكشاف الاوسط في السوبر صالون ازاي الاول
معاكم بقي الصور اهيه و لو في اي استفسار انا مستني مشاركاتكم
أرجوا اني اكون وفقت في ان اي عضو يحب يركب شاشة عرض في عربيته الصني هيلاقي ان الموضوع سهل جدا و مفيش اي مشاكل