الموضوع: الي كل خبراء نيفا .. و موعظه لاحبائي في المنتدي

قصص واقعيه من قصص سوق يوم الجمعه .. ومكر التجار وحيلهم
كنت في السوق امبارح الجمعه وكنت رايح ناوي اشتري عربية نيفا وكان معاي السنكري لكن ما اخدتش ميكانيكي .
المهم لاقيت عربية نيفا موديل 93 فابريقه بالكامل بمعنى الكلمة ومكيفة وراكب فيها 2 فتيس غرز اتعرضت عليا بمبلغ 19 الف ده طبعا ما كان عارضها علي 25000 في الاول .
المهم هقولكم علي اللي حصل بالظبط
اولا: نزلت السوق الصبح حوالي الساعه 7 ونص .. اول ما نزلت لاقيت العربيه دي الي قلت مواصفاتها فوق .
انا: بكام العربية
هو : 22 الف
انا : يعني ما تتهزش شويه ونخلص ونمشي قبل الحر
هو : قول كلمتك
انا : يعني انت عراف ان العربية دي زبونها قليل ومش كل الناس عايزاها
هو : يا بيه العربيه قدامك لو طلعت فيها ابره غلط يبقي بفلوسها
انا : يعني مش تنزل شويه
هو : منا قلت لك قول كلمتك
انا : 15 ماشي
هو : اسف يا بيه العربيه مش للبيع
انا : قلت ربنا يبارك لك . هاخد لفه كده انا والسمركي ونشوف يمكن نلاقي حاجه في الرينج دا
وبعد اللف والدوران وبعد صلاه الجمعه والعصر .. لاقينا عربية تانيه موديل 83 ..في برومه في (الرفارف الاربعه من جوه في لحامات عند الفرده الشمال . والشنطه من جوه تقريبا زي الغربال من البرومه. الفرش في العريه مش اد كدا . لون الداخل غير الخارج . وفيها جنط سبور جديد) . بكام ياعم قال 13 .. قلت تمشي 10 لان فيها شغل كتير وبرومه وعايزة مصروف كتير قالي 12 ماشي قلت لا وبيني وبينكم العربيه الاولي في دماغي ..

[justify]رجعت تاني للراجل بتاع العربية الفابريقه الي حكيت لكم عليها فيا لاول .. ده بعد ما الشمس ضربته قلت اكيد هيبقي في سعر تاني لان زي ما قلت لكم في الاول العربيه ليها زبون محدد وانا كنت مراقبه كل ما حد يسئل ويسمع السعر بيمشي [/justify]
انا : ها مش هتراجع نفسك ولا ايه
هو : تعالي عايز اي
انا : قلت عايز اخلص وامشي
هو : قلي اخرك
انا : قلت 18 حلو اوي وبارك
هو :لا بعيد اوى طيب شويه كمان كده و نبارك
انا :قلت اخري 18500
هو : قالي 19 وحلال عليك
انا :موافق
يبدأ من هنا القلق والشك
انا : طيب نجرب العربية
هو : العربية قدامك اهي ولو فيها حاجه بتاعتي
انا : ازاى بقي مش لازم اركب وامشي وخصوصا ان فيها الغرز ومش عارف ظروفه ايه
هو : بقولك يا عم انا كلمتي واحده انا معايا 5 عربيات بياعم بكلمه واسئل عليا السوق كله .
انا : قلت في نفسي ده تاجر بقي ..فقلت امال خايف ليه و مش عايزني اجرب .
هو : قالي ادفع عربون الاول .لاني ممكن اطلع معاك وادخل مالقيش مكان
انا : عربون ايه هو انت واقف في السوق .. دا انت واقف في الشارع . هو كان واقف بره السوق على الاول كدا .
هو : بص ياعم اسئل عليا السوق كله تااااااني مكررة
انا : قلت يا عم ان نااااااااار علي علللللللللللللم .. حس اني بتريء عليه مش عارف ليه
انا : طيب معاك مخالفاتك و بيانات
هو : كل اللي ليك عندي شهاده مخالفات .. والرخصه ساريه فيها 18 شهرررررر .قال يبقي عايز بيانات لي
انا : بدأت اقلق منه بالطريقه دي .. بس العربية تخفه بقولكم وكان شكلها واقفه كويس
انا : يلا نجرب
هو: يلا يا بيه
ركبت بصيت علي التابلوه لسه جديد ونضيف والعدادات شغالة ودورت العربيه صوت الموتور حرير اوي .. اعجبت بيها .. اديتها الاول وبطلع ..لاقيت العربية بتنط كده وبتنش ف الطلعه وفي صوت ميكانيكي زي حديد بيخبط في بعضه .. قلقت اوي .. عملت مارشلي وراجع حسيت كان في خبطه في الكارونه كده مش فاهم في ايه .. فقلت له الكارونه دي فيها حاجه .. وبطلت الموتور .. ونزلت ببص علي الكارونه اللي ورا .. لاقيت زيت نازل من الكارونه كده وليه اثر علي الارض .. فتاكدت كده ان في مشكله في الكارونه .. وسيبته ومشيت ..
نصيحني لازم تجرب عربيته وتطلع بيها علي طريق سريع عشان تسمع الونه الي بتكون في الكارونه وتقرص علي العربيه وتجيب اخرها عشان انت بتدفع فلوس وتاخدها وانت مطمن .. بس بيني وبينكم مالقتشي عربيه كويسه في السوق خالص .

انتم ايه رايكم في العربيه واللي حصل وانا بجرب هل ده طبيعي لان الغرز راكب وايه حكايه الزيت اللي كان مرشح من الكارونه ده . ويارتي كده سعرها كويس و لا عالي .. حد يفيديني ممكن ..

انا هعيد التجربة مرة تانيه يوم الجمعه لحد ما الاقي عربيه كويسه

والله هو المشكله انه كان مكار وحسيت انه بيخادع عشان كده قلت سيبك منه بقي