-
أنا تعبت خلاص
أنا كنت عامل موضوع عن بنت عاوز أخطبها وأهلي مش موافقين عليها بالأخص والدتي اللي عاوزاني أخطب واحدة أنا مش قابلها.المهم,,,
- حصل وفاتحتهم في الموضوع ويا ريتني ما فاتحتهم في حاجة..والدي في البداية كان رافض النقاش وصارم..بعد كده سمعني وإتناقش معايا بشكل موضوعي وحسيت إنه إقتنع بنسبة 70%,,,
- الطــــــامة الــــــكبري ...... والدتي بهدلت الدنيا.وعياط وضغط عالي وإضراب,,عملت حاجات متتعملش لو أنا مت..المشكلة كلها إنها رابطة صداقتها بأم البنت التانية دي بيا..يعني مصممة إني لو مخطبتش البنت دي صداقتها كده هتروح وشكلها يبقي وحش والعلاقات بينهم تنتهي والكلام ده..طبعا حالتها سيئة جدا بشكل مبالغ فيه.ومن وجهة نظرها إنها مصدومة فيا وإن أنا مفتري عليها..هل هذا صحيح؟!
- هل عشان خاطر صداقتها بواحدة تلغي سعادة إبنها؟؟ بمعني أصح,,, سعادة إبنها؟؟ ولا صداقتها ؟؟ هل يعقل إني عشان أحافظ علي صداقتها وعلاقتها بالست دي أخطب بنتها اللي أنا مش عاوزها وعمري ما هقبلها وأسيب البنت التانية اللي أنا عاوزها و هي عوزاني وهتطير مني؟
- المعضلة الأخيرة في والدي والحل الغريب اللي توصل إليه..رأيه إني أعمل اللي في دماغ والدتي وبعد فترة من الخطوبة أسيب البنت وأقول إني مش قادر أكمل معاها..ورأيه إن بكده أكون حققت رغبتها وحفظت ماء وجهها وبعدين أبقي أعمل اللي أنا عاوزه......هل ده كلام عاقلين ؟!
- كان يوم إسود يوم إتنشأت الصداقة الشؤم دي..حسبي الله ونعم الوكيل في الست دي هي وبنتها..يا رب إبعدهم عني..يا رب إبعدهم عني..ربنا ينتقم منهم أشد إنتقام..أنا ولا باكل ولا بشرب ولا بنام ولا بعمل أي حاجة.وبسبب الناس دي البيت بقي عامل زي مستشفي الدمرداش.كئابة ما بعدها كئابة.أعمل إيه.أسيب البيت وأطفش.ولا أفضل عند موقفي ولا أعمل إيه؟
-
حاليا لازم تسيب الموضوع ينام شوية ماينفعش تفتح فى الكلام فيه خالص
حل والدك انك تخطب البنت صورى كده وتسيبها
ازاى يعنى؟؟؟ هو بنات الناس لعبة ده تصرف مش من شيم الرجال لان البنت التانية مالهاش ذنب
-
مع احترامي للوالده
أنا حاسس ان الكلام ده جزء كبير منه تمثيل بتضغط عليك عشان تسمع كلامها
قلها في وشها بصوره لاتدع مجالا للشك
أنا مش هضحي بسعادتي عشان صورتك تطلع حلوه أدام واحده متستاهلش
وعلى فكره الموضوع ده ملوش دعوه ببر الوالدين ولا حاجه يعني جمد قلبك وكلمها بكل ثقه عرفها انها لو عملت اللى بتعمله ده اضعاف مضاعفه مش هيأثر فيك شعره
...بالتوفيق
-
علي فكرة والدك لما بيقولك تخطبها مؤقتا وبعدين تسبها ميقصدش دا حرفيا
انا حسة انه عاوز واحدة بواحدة يشدك نحيتها علي أمل انك تحبها وترتبط بيها وتبقي عاوز تكمل معاها للآخر
بصراحة ربنا يعينك
رأيي الشخصي انك تقسم الموضوع قسمين
اولا.. تركن خااااااااالص دلوقتي موضوع البنت اللي انت بتحبها
وتحاول تقنع والدتك انك مش هينفع ترتبط ببنت صحبتها دي
مقتنعتش خلاص.. هي هتقاطعك علشان تضغط عليك انت متقاطعهاش
وافضل حواليها ديما هتلاقيها شوية بشوية بتحس بتأنيب ضمير
وهتفهم انك حتي لو مرتبطتش بالبنت اللي بتحبها برده مش هترتبط ببنت صحبتها
وشوية بشوية الحكاية هتتنسي
بعد كدا ابقي فاتحها بقي فموضوع البنت التانية لما تكون هديت شوية
لانها دلووقتي هتبقي شايفة ان هي السبب في الفركشة والمشاكل دي
-
remomemo
لو تابعت الموضوع الاولانى هتلاقى البنت التانية ليها ذنب جامد هيا ومامتها
شوف يا غالى
يا تعمل زى ما والدك قالك
يا تعمل فترة تعارف الاول
وفيها تقول احلى شعر فى البنت التانية ومفيش مانع تحود شوية على الادب والالتزام - لان هيا اللى ابتدت -
وعلى فكرة
بعد ما مامتك تهدى
قولها حاجة
ان الام هيا اللى بتضحى
واللى مصاحباكى علشان تجوز بنتها
تبقى مش تستاهل صداقتك لانها بتاعة مصلحة
-
هو الحل انك تعمل اضراب و تقول مش هتجوز خالص و كمان مثل انك زعلان و مش بتكلم حد و حالتك النفسيه سيئه و صدقنى والدتك مش هتستحمل تشوفك كده فتره طويله
بس ده مش معناه عقوق الوالدين, لا دا تمثيل بس
-
أنا شايف طالما ماعندكش قبول للبنت وألي شايفه أنك تقريبا كارهها يبقي أقفل علي الموضوع ولا تتناقش فيه في البيت من أساسه ماهو مستحيل هايجوزوهالك بالعافية
لسه مصممين وأصرار وكلام كتير في الودان يبقي خدهم بالهداوة وكلام من ربنا يسهل وأن شاء الله وسيبوني أسبوع ولا حاجة أفكر وكدة لغاية مايقطنعوا أن مافيش أي أمل في الموضوع.......وربنا يقدملك ألي فيه الخير
-
بص انا عندي حل بس هو مش كويس بس برضو عشان دي والدتك
انت في كل مرة تقابل فيها صديقة والدتك تعاملها وحش اوي و تحاول تكون معلش في اللفظ "قليل الادب" معاها
الست هتكرهك و اذا عرفت في مرة تتلككلها على حاجة وتتخانق معاها يبقى حلو اوي
كدا مامتك هتزعل شوية بس هتعرف انه بسبب غلطتها وان هي عايزة تجوزك بالعافية وطبيعي كنت انت تكره الست دي
في حل كمان وشايف انه احسن من الاول من حيث الاخلاق بس ممكن ميجبش نتيجة
لو والدتك بتسمع لشيخ معين حاول تكلمه او حتى اي شيخ مسجد كبير قريب منكو وتخليه يكلمها هي او والدك عشان يعرفها ان دا غلط وان انت ال هتجوز مش هي
-
اهم حاجة متتكلمش مع اهلك في اي حاجة دلوقتي لا علي البنت الاولي ولا علي التانية تفادي اي كلام معاهم اطمن بس علي والدتك كل شوية عشان متفتكرش انك بتهملها لان ده هيخليها تعند اكتر وحاول متعقدش في البيت كتير مقصدش طبعا انك تسيب البيت لا اقصد اخرج كتير اما بالنسبة لاقتراح والدك فده مرفوض تماما مش بس من الناحية الاخلاقية انت الفروض انك بتعامل ربنا حتي لو البنت دي ومامتها مش كويسين انا شايفة ان الحل الوحيد للمشكلة دي هو الصبر والثبات علي موقفك وربنا معاك .
-
آخر ما توصلنا إليه حتي الآن, فرصة لحد يوم الخميس أرد بالقبول أو بالرفض..طبعا أنا هرد بالرفض ومش عارف هيحصل إيه بعدها.ومش عارف دلوقتي أعمل إيه مع البنت اللي أنا عاوزها..أقولها إيه بس مش عارف..حسبي الله ونعم الوكيل.
Content Relevant URLs by
vBSEO 3.6.0 PL2