شكرا على المنتدي الرائع ده وأنا عاشق للسيارات
يا حماعة أنا عريس وهتجوز قريب وعاوز أجهز الشقة ,ممكن شوية مساعدة؟
أجيب سيراميك منين ؟وألاقي فين أحسن أسعار؟أو ممكن بورسيلين؟ولا اية رأيكم؟
عرض للطباعة
شكرا على المنتدي الرائع ده وأنا عاشق للسيارات
يا حماعة أنا عريس وهتجوز قريب وعاوز أجهز الشقة ,ممكن شوية مساعدة؟
أجيب سيراميك منين ؟وألاقي فين أحسن أسعار؟أو ممكن بورسيلين؟ولا اية رأيكم؟
أولاً الف مبروك وربنا يتمم لك على خير ان شاء الله
ثانياً موضوع السيراميك ممكن تجيبه من معارض كليوباترا اي فرع من فروعها وهي عامله تخفيضات مش وحشه الأيام دي عشان اليوبيل الفضي بتاعها .
ممكن كمان تروح ارض المعارض هوالمعرض اعتقد بدء اليومين دول او هيبدء لسه مش عارف ده هيفيد اكتر لو انت مش مستقر على اي نوع واعتقد هتلاقي تخفيضات ان شاء الله هناك .
مكان تالت ممكن تروحه هو السلاب واعتقد ليه فروع يمكن 3 او 4 فروع ....انا باتكلم على القاهره .
ارجوا اني اكون افدت حضرتك وربنا يوفقك ويتمم لك على خير ان شاء الله .
أولاً ألف مبروك وربنا يتمملك بخير
وأهلاً بيك في المنتدى وبأول مشركة ليك :)
كليوباترا عاملة 40% خصم في معرض القاهرة الدولي، وحاجتهم كويسة، وفرق السعر مش كبير بين المعرض والفجالة. فيه ناس بتقول على شارع ترسا في الهرم ومنطقة تانية قرب عزبة النخل مش فاكر اسمها وسوق السيدة عائشة وسوق إمبابة كل دي مناطق مشهورة بالسعر الأرخص بس أنا ماجربتهاش الصراحة وأظن فرق السعر مش هايكون كبير للدرجة.
ربنا يوفقك
الف مبروك ورنبا يوفقك
انا قريت النهاردة في اخبار اليوم انهم عاملين تخفيضات جامدةةة جدا لحد 40%
اسئل ودور وخد خطيبتك وروح اتفرج وختار وربنا يوفقك
اولا .. الف مبروك و ربنا يتمم بخير
ثانيا .. احييك علي النيك نيم الظريف جدا اللي انت مختاره :)
ثالثا .. لن ازيد علي كلام الاخوة الا ان اغلب منتجي السيراميك موجودين في معرض القاهرةالدولي و كلهم عاملين تخفيضات مش بطالة .. لذلك هيكون عندك فرصة كويسه للاختيار ما بين كليوباترا و كافة الماركات التانية.
شكرا يا جماعة على الروح الحلوة دي الي بجد مش هلاقيها في مكان تاني
ان شاء الله هننزل معرض القاهرة ونشوف اية النظام
على فكرة ممكن تشوق للارضيات بورسلين فرز تاني
مش بيبقى فيه عيوب ظاهرة وبيبقى شكله كويس في الارضيات
لكن سيراميك الحمامات و المطابخ والحوائط يستحسن فرز اول
ألف مبروك ويارب يتم عليكو بخير
هوال الموضوع معتمد على نوع وشكل المواد الى أنت اعايزها
يعتى أبدأ بسوق السيده عيشه وبعدين
روح المعارض وربنا يوفقق
ما اانصحش بالبورسلين خليك في السيراميك
الافضل كليوباترا ويليه الجوهرة
ورويال بعدهم
اهم حاجة تختار صنايعي كويس يركبلك والمصنعية في حدود 8 - 10 جنيه للمتر ارضيات
والف مبروك وربنا يتمملك بخير
الف مبروك،
بارك الله لكما وبارك عليكما وجمع بينكما فى خير..
لكن الحقيقة معرفش حاجه فى موضوع السيراميك ده..
يا حرااااااااااام :)
انا بصراحة معرفش موضوع السيراميك دة بيتجاب منين بس كويس موضوعك هيبقي
مفيد جدا لخطيبي يا ريت بقا تعمل سلسلة مواضيع عن السيراميك و الرخام والبورسلين بعدين ممكن باة ندخل على العفش و الدهانات
بجد البنات مش بيتخرب بيتها كدة زى الولاد
ربنا معاااااك
أولا ألف ألف مبروك و ربنا يتمم بخير
و ثانيا .... أنا ساكن جنب الناس بتاعة السيراميك اللي في ترسا الهرم
لو تحب تقولي علي اللي أنت عايزه و أسألك الناس اللي هنا .... و أعتقد أنهم من أرخص المناطق بتاعة بييع السيراميك ..... مليين الشارع كله
الف مبروووووووووووووووووووووو وووووووك وعقبال لما تجوز اولادك
كليوباترا من افضل الانواع وليهم معرض كبير فى الفجالة
الف مبروك يا عريس
وخليك في كليوبترا خصوصا في جو التخفيضات دة
كليوباترا كويس جدا جدا من حيث الانتشار و الاسعار و الى حد ما الشكل و الجودة لكن مع احترامي للجميع فالجوهره افضل انواع السيراميك من حيث الجودة و المتانه و من حيث التصميمات و الاذواق الراقيه لكن سعرها طبعا اعلى من الكليوباترا
لكن على اي حال هيه مش هتفرق كتير انا نصيحتي ليك انك تروح معرض يكون فيه كل الانواع علشان تقدر تختار الذوق و الشكل المناسب ليك يعني تقدر تروح حاجة زي السلاب مثلا عشان تتفرج هناك فقط لأنهم عارضين بشكل كويس جدا و بتقسيمات في الحمامات و المطابخ حلوة هتفيدك كتير اوي اوي في التنفيذ و عندهم كل دول لمنتج معين يعني دور فيه حاجات رويال و دور في كليوبترا و دول في الجوهره و كدة و بكدة هتقدر تكون فكرة كامله عن كل الانواع و الاشكال و طريقه التركيب و التنفيذ على الواقع
تشوف بقا يا ريس ايه اللى عجبك في دول و تروح تاخد رقم الموديل من عندهم و تنزل تشتريه من اي مكان ارخص و لو الارضيات فممكن فعلا تجيب فرز تاني مبيكونش فيه اي عيوب ظاهره لكن هيفرق جامد معاك في السعر و لكن في الحوائط زي المطبخ و الحمام لازم يكون فرز اول عشان اي حاجة هتبقا باينه جدا لأنها في حيطه
و تحت امرك في اي استفسار تاني و ربنا يتمملك بخير
انا مش عارف ليه محدش قال : الفجااااااااااااله..
الفجاله فيها سيراميك بالكووم .. + كل مستلزمات الحمام و المطبخ ..
انا رأيي خليك مع فرز اول .. هاتلاقي العمليه مفرقتش كتير .. ده غير ان فرز تاني فيه عيوب في المقاسات خفيفه هاتشوهه المنظر :mad:
مبروك يا عريس ;)
احنا بنعمل لنفسنا مش ليكو :p :D :D
لاء لاء باهزر .. انتو ليكوا النص طبعاُ في الشقه .. بس هانسيبلكم الجزء بتاع المطبخ بس :D
سؤال لدكتور سمارت .. ماتنصحش بالبورسلين ليه :confused:
بيشو...
الف مبروك يا باشا وربنا يتمم بخير
لو عاوز نصيحتي من الاخر روح ( مخزن ) السلاب مش المعرض اللى في مدينة نصر وهناك هتلاقي اسعار مافيش بعد كدة ودة خلاصة خبرتي لاني بقالي سنة ونص متجوز واشتريت من هناك وكلة فرز اول ومافيش غش
سوري يا باشا الكلام اللى هقولة دة مالوش دعوة بموضوضوع السيراميك بس كنت عاوز اسألك عن اخبار عربيتك البونتو ..... عاملة اية معاك ..... واخبار قطع الغيار والصيانة اية ولو موديل 95 تعملها كام ؟
واهم اهم حاجة بقى التكييف في وسط البلد في الزحمة اخبارة اية وعلى الطوالي اخبارة اية ؟
واكون شاكر ليك جدا لو ترد علي .
مبروك مبروك مبروك
كلكم بتباركوا له على ايه
يا ابنى انت صعبان عليا صدقنى
اخلع
لو خايف تطلع عيل ادامهم ولا يهمك
اطلع عيل يوم تعيش راجل طول عمرك
جواز اية وقرف ايه يا عم عيش لك اليومين الحلوين دول
اما موضوع السيراميك فعن تجربة بلاش ابوس رجلك
تلج يا بوى فى الشتا وزحاليق فى الصيف
انا عملت شقتى كلها سيراميك جامبوا المتر بالشىء الفولانى وحياتك انت 180 متر سيراميك قطموا وسطى
وبعد سنة واحده لصقت عليهم باركية المانى وارتحت من 3 سنين يااااااااااااااااااااه لا تتخيل الراحه
شيىء ولا الخيال فى التنظيف والمنظر والنظافة والشياكة
انما سيراميك يغور
وطلع كمان الباركية ارخص منه
ثانك يو مدام :D
SOON isa
هعهعهع .. بس انا بافكر فيه الباركيه برضه .. اصل انا شاب كلاسيك .. (او ممكن بورسلين اسود كده.. ) و بافكر كمان اعمل ورق حيطه لون دارك .. و الصالون يبقي نبيتي دارك برضه .. برنس :cool:
ده غير ترتيب الاولويات اليومين دول و المعلم الكبير قافش عليا قفشه منيله .. فموضوع تجهيز الشقه ده شكله هايتاجل شويه :mad: اصل انا مش من اولوياته :D
برضه نفس النظام .. انا هاعمل الشقه ليا .. و هاسيبلها المطبخ برضه :p:p:D:D
د
بس خد بالك الباركية و ال hdf و الكلام دة مينفعش فى ريسبشن عشان خاطر مش بيتنضف بالمية فيفضل دايما انه يبقي فى الاوض بس بره صعب اوى و هتبهدله معاك
انا كمان بحب النبيتي جدا بذات لما يبقي تدخل معاه زيتوني او دهبي بس بلاش برضه بورسلين اسود على الارض عشان هتضيق المساحة عندك لإلو هتعمل مثلا صالون نبيتي فى دهبي يبقي الارض يفضل تكون لونها creamy كدة بس مصفر خفييييييييييييف اوى و بلاش برضه تعمل حيطة لون و حيطة تانية لون تانى نبقاش موضة ..لأ اعمل الاوضة كلها لون عادى و لو عندك عامود طالع كدة من الحيطة او حته داخلة منه العب فيه براحتك ..يعني لو الصالون بتاعك باة نبيتي اعمل الحيطة offwhite ة تعالى على حته من الحيطة طالعة برة شوية اعملها مثلا نبيتي فى درجة تانية من النبيتي الاغمق اوى سامبوكسة كدة و خلى الدهانات كلها فاتحة بس العب باة براحتك قى كرانيش السقف ..عارفها اللى هية بتبقي بلاستيك كدة و تدهن اى حاجة بدل الاسمنت و الارف بتاعه فممكن تعمل الكرانيش دى sponge نبيتي و اقلام رفيعة اوى بالورب كدة فيها دهبى بس مش مستقيمة لأ كأنها مرسومة بالأيد كدة
بعدين نصيحة مبقاش موضة السجاجيد الكبيرة اوى دى اللى بنحطها تحت السفرة و فى الصالون و الكلام دة دلوقتى كله سجاجيد صغيرة و تتحط كأنها مترمية كدة و يا ريت تبقي حرير او handmade عشان تبين جمال الرخام او البورسلين او السيراميك كمان بس لو الارضية عندك مش قد كدة يبقي هات سجاجيد عادية
بس كدة خلاص:D
اولا الف مبروك مقدما
ثانيا مرحبا بك في نايل موتورز
ثالثا :
نصيحة بلاش سيراميك وبورسلين في غرف النوم بالاخص
ممكن تعمل الغرف خشب لكن مسمار مش لزق وفيه منة انواع و اسعار كتير وممكن تلاقية في منطقة ميدان صلاح الدين في روكسي
السيراميك بيديك شعور رهيب بانك في مستوقد فول أثناء الصيف ... وفي ثلاجة موز أثناء الشتاء
علي الاقل غرف النوم خليها خشب احسن وممكن تخلي الريسبشنات بقي حسب الظروف والاذواق والأهم ..... رأي المدام
ايه الحلاوه دي .. مصممين ديكور يا جدعان هعهعهع
لاء لاء مش ده اللي في دماغي .. انا باحب الواني دارك و مياه واحده .. كله يمشي مع بعضه ... الستايل كله يبقي دارك مافيا ستايل .. بافكر في :
البورسلين في الصاله + باركيه في الاوض ..
اوضه النوم تاخد لون خوخي و الباقي ياخد ورق حائط (الاوضه يعني ال 4 حيطان زي بعض ) ..
الصالون يبقي جلد نبيتي (مش الصالون المدهب ده .. لاء التاني اللي مكسي جلد) ..و ممكن جلد سكري او سمني فاتح ..
اوضه النوم طبعاُ من الجماعه بتوع دمياط .. السجاجيد الكبيره اصلاً مابحبهاش ..
صوره توضيحيه خرمت دماغي :
http://www.4shared.com/file/41685577...ified=875fdcc6
بس خلاص :D
نفس النظام كده .. الصالون و الركن و ورق الحيطه .. يبقي برنس ده :cool:
هيا مالهاش غير المطبخ في البيت .. مش عاجبها ترجع عند ابوها ههعهعهعهعهع
بعدين هاحطلها ترابيزه عاديه حديد و في المطبخ هاتبقي مناوله مفتوحه كبيره تشتغل مكان السفره .. اصل السفره مابحبهاش ..بتاخد مكان علي الفاضي و الحمد لله يعني الضيوف عندنا مافيش حد فيهم في رئاسه الجمهوريه ولا بتاع هعههعهع
ده غير المناوله هاتبقي علي نظام البيتزاريا الايطالي و رخامه اسباني سوداء كبيره و شغل 10/10 .. لو مش عاجبها بقي ... تبقي تنام في المطبخ بتاعها هعهعهعهعهع
بص يا سيدى اولا الف مبروك وبالزرية الصالحة إن شاء الله وربنا يكملك على خير
اولا : فيه مصانع فى العاشر رخيصة وبتنزل عروض حلوة
ثانيا : اسال على مخازن كليوبترا هتلاقى فيها العروض شغالة وفيها تشكيلة حلو وطبعا ارخص من المعارض بتاعت الشركة لا المعارض بيديك العر محمل بثمن تركيب الالوان مع بعض ( وده انت ممكن تعمله )
ثالثا : لو سعر السراميك هيوصل 50جنية نصيحة ركب باركيه صينى فى الغرف الداخلية وخلى الباقى سراميك الباركيه بـ 58 جنيه ده عند اغلى محل باركيه فى عمارات الشرطة فى المهندسين
وربنا يتمملك على خير
معلش يا بيشو xpert اني ماردتش بسرعه
فيه ناس كتير ردوا قالولك ان السيراميك برد وزحاليق ... فعلا عندهم حق
مابالك بقى بالبورسلين ناااعم جدا ممكن تبقى تلعب عليه Skating :)
يا جماعة الخصومات هتخلص28/3 وهي موجودة في جميع فروع سيراميكا كليوباتارا والسلاب وهي ليست 40% بل 30%+10% على السيراميك و 10%+5%على البوسلين.
الخدعة:أنك عشان تتمتع بالخصم دة لازم تدفع الفلوس كاملة قبل 28/3مش مقدم بس.
خلي بالك:معرض القاهرة جناح كليوباترا فية موديلات جديدة2008 مش هتلاقيها في حتة تانية بس للأسف استلامها بعد شهرين.
الف مبروك ورنبا يوفقك
كليوباترا
المصنعية فى حدود
سفل 1.5 إلى 3.5 للمتر
حوائط 7 إلى 11 للمتر
الارضيات 7 إلى 9
الوزرات على حسب الصنايعى ممكن تتحسب من ضمن مقاس الحوائط أو يحسبها منفصلة