تجربتي مع شراء وتعمير الـ127 .. لحظه بلحظه

الحمد لله وفقني الله في العثور على سياره 127 بعد بحث وسؤال ولف ودوخه .. وكان بصحبتي سمكري وعفشجي وميانيكي .. هتسألوني ازاي لقيتهم وخدتهم بسهوله كده ؟؟؟ . الحقيقه همه جيران لي في المنطقه وعلى مااعتقد بيحترموني ويعزوني شويه لأني أعاملهم بكل ذوق واحترام في الراحه والجايه وخدمت اولادهم في المدرسه اللي انا باعمل فيها .. المهم .ز قالوا لي السياره كويسه دواخل وسليمه والحمد لله ومافيهاش لعب ولا لحام ونمر كارتير .. بس الماكينه محتاجه عمره وده لايعيب العربيه ..
اتفقنا مع البائع وبعد الفصال تم الشراء والحمد لله ..
بعد كده ذهبت للتسجيل وسجلنا .. بس لم اوقع كمشتري وانتظرت حتى ميعاد فحصها وتجديد الرخصه لنقل الملكيه ..وبعدين أخذت السياره ورحت للميكانيكي وكانت المره الأولى التي أشعر فيها بقيمة هذه المهنه وعظمة من يعملون فيها .. بجد حاجه تثير الأحترام للناس دول .. فتحنا الكبوت وشد وارفع ياعم الماكينه ( طبعا بعد فك كل أجزاء السياره) وتم الرفع ثم فك الماكينه حته حته ومسمار مسمار .. منظر مخيف أصابني بالرعب .. سألت نفسي .. ياترى هيعرف يرجعها زي ماكانت ؟؟؟
بدأنا نسجل بالورقه والقلم ماسنحتاجه .. طقم بستم .. طقم شنابر .. فلاتر زيت وهوا .. كوع مياه .. بلية دبرياج .. قاعده ماكينه .. جوانات مختلفه ... الخ .. الخ ..
وبعدين رحنا لورشة الخراطه علشان نظبط البستم مع الماكينه مع الشنابر .. وقعدنا ييجي اربع ساعات لغاية انتهاء المهمه .. تكلفت هذه العمليه ( شراء القطع والخراطه )900 جنيه بالتمام والكمال .. رجعنا للورشه وغسلنا الماكينه والأجزاء بالجاز والبنزين غسيل محترم .. وغسلنا السياره برضه بنفس الطريقه .. وبعدها جلست اشاهد عملية ارجاع الحال لما كان عليه وتظبيط كل حاجه في مكانها .. مواااااااااااال
بصراحه احنا عندنا في مصر عباقره .. بعد حوالي خمس ساعات تخللهم شرب الشاي والعشاء تم التجميع والحمد لله .. ثم تسقيط الماكينه في السياره مره أخرى ..
وجاءت المهمه الأخيره والأهم وهي تجربة السياره وتليينها والتي ستستمر ليومين ان شاء الله .. وانا الآن في انتظار النتيجه وعلى احر من الجمر لرؤية عزيزه اللذيذه في ثوبها نصف الجديد .. في انتظار الجزء الثاني من عملية النيو لوك .. ألا وهي السمكره والدهان ... ان شاء الله سأخبركم بالتطورات تباعا

ملحوظه : الموضوع ده اتعمل على مدار يومين .. بس حبيت احكيه بهذه التسلسل علشان نقدر نلم الموضوع دون ملل

الف مبروك هى عربية اكثر من رائعة عن تجربة

الله يبارك فيك .. الحقيقه شعرت من خلال الساعات القليله التي قدت فيها السياره قبل ذهابها لأجراء العمليه الجراحيه انها سياره مناسبة جدا لنا نحن المصريون في حالتنا الأقتصاديه الراهنه وظروف المرور وحالة الشوارع الموجوده عندنا

مبروك يابوحميد
بس هيا مش كان لونها احمر
ايه اللي خلاها ابيض تاني
وبالراحة في التللين بعد العمرة
في تللين واقف وده بيتحرق فيه صفحتين بنزين على الواقف
وفيه تليين ماشيى وده لمدة 1000 كم تمشي بالراحة بدون قرص ولا وزن زيادة
ربنا يباركلك فيها

اه صحيح
بلاش سمكرة دلوقتي
خليها شوية لما تاخد العين عشان ما تاخدش عين جامدة

الله يبارك فيك ياأبو الكرم ..
معلش أنا آسف .. عارف انك بتحب اللون الأحمر .. لكن السياره الحمراء كانت فيها عيوب اكتشفناها والحمد لله قدرنا نلم الموضوع ونرجعها .. واشتريت البيضاء ... معذرة لعدم التنويه .. معلش والله كنت في توهان اليومين اللي فاتوا..
بالنسبة للسمكره .. رأيك هو نفس رأي الوالده .. ومش عارف أنفذ ولا استنى وخاصة ان الفلوس بدأت تتبخر ومكسوف اتقل على الحاجه . هاهاهاها

من خبرتى استنى احسن انا اول مجبت العربية(سوبر فيورا) كانت متوضبة دهان وسمكرة لبست كام عين والحمد لله حصل اللى حصل استنى لما الناس تاخد عليها بعد كدة وضبها

اقتباس:

---

المشاركة الأصلية كتبت بواسطة anawwara

قالوا لي السياره كويسه دواخل وسليمه والحمد لله ومافيهاش لعب ولا لحام ونمر كارتير .. بس الماكينه محتاجه عمره وده لايعيب العربيه ..


ملحوظه : الموضوع ده اتعمل على مدار يومين .. بس حبيت احكيه بهذه التسلسل علشان نقدر نلم الموضوع دون ملل

---

ربنا يبارك لك فيها يارب
ماشاء الله لا قوة الا بالله
الفترة اللي أخدها في العربية توضح إن الميكانيكي بتاعك واضح إنه بيعزك فعلاً :)
انا فاكر إني عملتها في شهر شفت فيهم الأمرين :D

بالمناسبة أنا نفسي أعرف يعني ايه نمرة كارتيرة؟
دايماً باشوفها في اعلانات بيع ال 127 ونفسي اعرف يعني ايه؟

الف مبروك عليك ال 127 :)

انا عن نفسي أخدت ال 127 و ما حطتش فيها مسمار.. باتعلم عليها السواقة زي ما هي.. هو انا ناقصة كمان افكر في سمكرتها و عفشتها؟ خليني اركز في السواقة بس احسن انا متشحورة :(

اقتباس:

---

المشاركة الأصلية كتبت بواسطة AboRoqaiaa

بالمناسبة أنا نفسي أعرف يعني ايه نمرة كارتيرة؟
دايماً باشوفها في اعلانات بيع ال 127 ونفسي اعرف يعني ايه؟

---

دة بيبقى رقم الشاسي بيكون في الجنب اليمين

من حوض العربية. من كتر الرش او المعجنة الرقم

دة بيتطمس فينقلوة بمعرفة المرور طبعاً.

بس في العربيات الحديثة غيروا مكان رقم

الشاسية من الكارتيرة لتحت البربريز.

اقتباس:

---

المشاركة الأصلية كتبت بواسطة Nader

دة بيبقى رقم الشاسي بيكون في الجنب اليمين

من حوض العربية. من كتر الرش او المعجنة الرقم

دة بيتطمس فينقلوة بمعرفة المرور طبعاً.

بس في العربيات الحديثة غيروا مكان رقم

الشاسية من الكارتيرة لتحت البربريز.

---

تمااااااااااااااااااام
نورت المحكمة يا باشمهندس نادر :)

الأخوة الأعزاء .. أبو رقيه .. علا
أشكركم على شعوركم الطيب .. بارك الله فيكم ولكم

الشكر لله وبرضه ما ترشهاش دلوقتي
خبط بيها شوية الاول وخد العين وبعدين رشها كمان كام شهر وتكون فوقت من تمنها

ماشي كلامك يا أستاذ كريم ...

الف الف مبرووووووووووووووك على العمرة


ما شاء الله انت شكلك مهتم جامد بالعربية :)

الله يبارك فيك ..
أنا رأييي انك طالما انعم الله عليك بالسياره فيجب ان تهتم بها .. فهي من نعم الله علينا فعلا

الحمد لله .. بدأت النهارده التليين وعملت أول 80 كيلو .. بس كنت مضطر اعمل طلعتين أمريكاني وانا طالع مطلع رخم شويه وزحمه .. ياترى ده يأثر على الماكينه وهي في التليين ؟؟ طمنوني بارك الله فيكم

انت خلصت تليين على الواقف الاول؟؟

ما دمت مضطر يبقى قدر الله وما شاء فعل

بس بعد كدة خليك حنين عليها.



استحملها دلوقتي علشان تستحملك هي بعدين.

أنت عملت تليين على الواقف بـ صفيحتين بنزين .. مش كده يبقى كفايه ؟؟

التليين وصل والحمد لله ل280 كيلو

تم لحام الرادياتير وتنظيفه بعد تجربه مريره والحمد لله

الحمد لله و ربنا يحفظهالك

أشكرك أخي الكريم

عقبال ال الف كم بعد التليين
وال 100 الف بالعربية عموما
ربنا يباركلك فيها

الله يبارك فيك .. مش عارف أشكرك ازاي ياأستاذ كريم .. ونعم الأخ فعلا .. ربنا يقدرني أرد بعض من جمايلك ياأبو الكرم