ممكن مساعدة!!! فيات 132

**Sucree** · 01-12-2010 04:37 PM

بسم اللة الرحمن الرحيم
يا جماعة انا معايا عربية 132 1800 مو 74 و انا بظبطها دلوقتى و عايز اعرف اية احسن حاجات ممكن تتجابلها علشان العربية تشد حيلها كدة و تبقى عروسة تانى d: فا ياريت تفيدونى بخبرتكم

**Sucree** · 03-12-2010 02:10 AM

اية يا جماعة .... مفيش الى حد عندو فكرة عن تظبيط ال 132 ؟؟؟؟؟

**sharko** · 04-12-2010 11:20 PM

السلام عليكم و رحمة الله و بركاته

بص يا باشا أنا كمان معايا 132 1600 موديل 72 و عندى خبرة كويسة نوعاً ما فى ال132

بس الموضوع متوقف على إنك عاوز تصرف كام و عربيتك حالتها إيه؟؟؟؟؟؟

أهم حاجة فى ال132 إنك تظبط موتورك و عفشتك و فراملك و كاوتشك و ساعتها حتعرف ليه بيقولو عليها مرسيدس الفيات

أنا بإذن الله حجيب مساعدين مونرو زيت على غاز لسة سائل عليها النهاردة هشام لهيطة بالتليفون قاللى الجوز عامل 270 جنيه قدام و ورا يعنى الأربعة على بعض ب540 جنيه مش عارف أنا حاسس إن السعر قليل شوية بس و الله أنا كلمته فى التليفون و ده الرقم لو حابب تتأكد

0225755359
و السوست ب 250 جنيه الجوز قدام زى ورا برضو يعنى الأربعة ب 500 جنيه

و الخطوة اللى بعدها بإذن الله حجيب جنوط 15 و كاوتش عريض شوية

بس لسة ما إستقريتش على نوع الكاوتش و المقاس الكويس

بفكر أجيب بريدجستون 195\60 أو 205\55

مش عاوز الكاوتش يبقى واطى أوى عشان العفشة المونرو ناشفة شوية

ممكن كمان تظبط الصالون من جوة فرش جلد و كدةو تعمل كمان فرش جلد للأبواب

شوف كددة أنت ناوى تعمل إيه فى العربية و بإذن الله أقدر أفيدك أكتر من كدة

**Sucree** · 06-12-2010 01:28 AM

شكرا يا باشا على الرد الجميل دة .... بس كنت عايز اعرف بس ... يعنى اية مساعدين زيت على غاز و بيعملو اي ؟؟؟

و كنت عايز اسأل على حاجة كمان .... العربية عندى مش بتجيب اكتر من 120 !!!!! هل دة طبيعى ولا فى حاجة بتتعمل فى الموتور تخلية ميزيدش عن كدة ؟؟؟ علشان انا سألت 2 ميكانيكيين واحد قالى ايوة و التانى قالى مفيش حاجة اسمها كدة !!

**sharko** · 06-12-2010 05:14 AM

المشاركة الأصلية كتبت بواسطة sucree

شكرا يا باشا على الرد الجميل دة .... بس كنت عايز اعرف بس ... يعنى اية مساعدين زيت على غاز و بيعملو اي ؟؟؟

العفو يا عم ماتقولش كدة

بص على حد علمى فى 3 أنواع من المساعدين

أول نوع مساعدين زيت بس ودى بتوفرلك أقصى درجات الراحة فى المطبات و الحفر علشان بتبقى طرية مش ناشفة

يعنى المساعد بيدخل و يخرج بسهولة بس دي أدائها بيكون عادى مش رياضى يعنى لو حابب تاخد ملف جامد على سرعة عالية حتلاقى العربية كلها ميلت عكس إتجاه الملف عشان المساعدين طرية فبتنضغط

تانى نوع مساعدين غاز بس و دى بتبقى ناشفة جداً و أدائها رياضى جداً ولو خدت بيها ملف على سرعة عالية حتلاقى العربية ماشية طبيعى و مش حتميل بس على عكس المساعدين الزيت فى المطبات مش مريحة خالص و بتخليك تحس بالمطبات كلها عشان هى مش مصممة للطرق المكسرة

يبقى من الآخر كدة لو أنت مشيك هادى و جوة البلد و مابتحبش الجرى يبقى تجيب المساعدين الزيت المريحة

لو انت غاوى سباقات بقى و شد و غرز وكدة يبقى تركب مساعدين غاز بس إستحمل بقى المطبات الحلوة

تالت نوع مساعدين بقى اللى أنا ناوى أجيبه بإذن الله اللى هو غاز و زيت فى نفس الوقت

و ده بيبقى مش طرى أوى و مش ناشف أوى يعدى معتدل

أنا مثلاً مش بتاع جرى و حركات و أغلب مشاويرى جوة البلد بس بحب أحس إن العربية ثابتة تحت رجلى لو حبيت أجرى بيها عشان كدة حجرب المساعدين المونرو الغاز على زيت دى عشان فى ناس كتير أوى هنا فى المنتدى بتشكر فيها

**sharko** · 06-12-2010 05:37 AM

المشاركة الأصلية كتبت بواسطة sucree

و كنت عايز اسأل على حاجة كمان .... العربية عندى مش بتجيب اكتر من 120 !!!!! هل دة طبيعى ولا فى حاجة بتتعمل فى الموتور تخلية ميزيدش عن كدة ؟؟؟ علشان انا سألت 2 ميكانيكيين واحد قالى ايوة و التانى قالى مفيش حاجة اسمها كدة !!

أنا بعانى من نفس المشكلة دى فى عربيتى بس أنا عشان مابحبش الجرى و مش بسافر بالعربية كتير مش فارقة معايا بس اللى أعرفه إن موتور ال132 لو مظبوط بيجيب 160 مستريح و بعدين ده أنت 1800 يعنى موتور وحش

بص خلى الميكانيكى بتاعك أول حاجة يشوفلك حالة الموتور و يكشفلك على الإسطوانة

وبعدين ركب طقم كهربا نضيف بوجيهات و سلك بوجيهات و أبلاتين و كوندنسر و خليه يظبطلك الكهربا كويس

و هات بالمرة فلتر بنزين و فلتر هواء جداد

و شوف واحد بتاع كاربيراتير كويس خليه يظبطلك الكاربيراتير و إتأكد إن البكات اللى راكبة مقاسها مظبوط

عشان فى ساعات صنايعية بتحب تعمل واجب يقوم يضيقلك البكات بتاعة الكاربيراتير عشان يوفرلك فى البنزين

بس فى المقابل بيخنق المكنة و بيقلل سحب العربية

و كمان شوف واحد بتاع تاكيهات و خليه يظبطلك تاكيهات العربية

بعد ما تعمل الطلعة دى حتحس أصلاً إن العربية صغرت 20 سنة و حتلاقى المكنة بقت ناعمة زى الحرير

إطلع جرب بقى يا باشا و إدعيلى بس نصيحة منى بلاش تجرى أوى لو الفرامل و العفشة عندك مش تمام

عشان ال 132 عيبها إن الفرامل بتاعتها مش جامدة أوى بس ياريت بعد ماتجرب تقولى حسيت بفرق ولا لأ

**Sucree** · 06-12-2010 03:22 PM

متشكر جدا يا اخ شاركو و ان شاء اللة هعمل الكلام دة و هبقى اقولك على النتيجة..... بس لسة بدرى شوية علشان العربية عند بتاع الدوكو دلوقتى ولسة قدامها بتاع اسبوع كدة ... فا ربنا يسهل