القيادة فى مصر المحروسة والمواقف اليومية التى نتعرض لها

السلام عليكم ورحمة الله

طبعا كلنا كل يوم بنعرض لمواقف مختلفة طوال اليوم اثناء قيادتنا للسيارات ففكرت وقولت ليه منعملش موضوع نتكلم فيه ونحكى المواقف اللى اتعرض ليها كل يوم.

انا عن نفسى ها ابتدى واحكى موقفين حصلولى امبارح والنهاردة والموقفين بيعبروا عن نوعية من الناس فى المجتمع عندنا.

اول موقف اتعرض ليه كان امبارح وانا نازل من البيت كنت مبدل العربية مع واحد صحبى وهو كان راكن فى شارع جانبى بيطلع على الكورنيش، طبعا الحتة دى مش اكتر من 10 متر بس دخول مش خروج، وانا ماشى قلت اكيد هلاقى واحد من حبايبنا واقف يسترزق ومستنى حد يطلع من الشارع بس انا كنت مستعجل فطلعت من الشارع وقد كان لاقيت الامين طالعلى وسط الكورنيش وبيوقفنى ويقولى رخصك، قولتله ليه قالى عكس الاتجاه ولازم الرخص ومسك الجهاز وقعد يتكلم اكنه بيبلغ، قعدت اشرحله واكلمه قالى تعالى نروح للظابط قولتله ها اركن العربية على الكورنيش فى الشمال وانزل، اركب معايا نروح للظابط، قالى لا ارجع بضهرك وانا وراك، قعدت اتسنكح فى الرجوع لقيته راجعلى يقولى والله انا مش عارف اعمل ايه معاك والظابط والحكاية، طبعا انا كنت مجهز اللى فيه النصيب ومستنيه يقول كده، اول ما قال على طول ايدى كانت فى جيبه وانا بقوله متعملش حاجة خالص وانت اولى.

طبعا اتحول وبقى يقول اتفضل يا باشا واهم حاجة ان حضرتك تكون راضى عن الفلوس ومع السلامة وكده.

انا لولا انى كنت مستعجل ولازم اروح المطار وكانت الساعة 3 ونص العصر والطيارة نازلة 4 وكنت لازم انجز كنت رحت للظابط واتكلمت معاه.

مستنى تفاعلكم وقولولى ايه رأيكم فى الناس دى اللى كل همها انهم ينزلوا من بيوتهم الصبح عشان يتبدروا فى الشوارع يسترزقوا من خلق الله!!!!

عزيزى damasry،

أتفق معك أنه هناك الكثير من أفراد الشرطة على مختلف رتبهم من ضعاف النفوس يتصيدون الفرص ليتكسبوا منها، و لكن ألا تجد أنك ساهمت فى هذا التربح الغير مشروع و اتحت الفرصة لأمين الشرطة أن يأخذ ما لا يستحق.
أنت تعرف أنك ستسير فى الإتجاه العكسى و أن من المحتمل أن تغرم فى لحظتها، و مع ذلك سرت فى الإتجاه العكسى، و هذا أول خطأ فى حقك. ثانيا، من الطبيعى أن يعاقب كل من يخطئ و لكن أنت أردت أن تفلت من الغرامة أو تنال أقل شكل لها وقمت برشوة الأمين (الغير أمين) و هذا ثانى خطأ عليك, و لا ننسى أن الأمين أخطأ مرتين، الأولى عندما لم يتطبق القانون و الثانية عندما تركك تفلت من الغرامة المقررة فى حقك.
إذا، أنت ساعدت بشكل ما و دون أن يجبرك أحد أن تخرق القانون و النظام و تقدم رشوة. فلا تلومن أحد غيرك. و لا تلوم على أحد.
إذا أردت الصلاح فابدأ بنفسك أولا و توكل على الله.

أرجو أن تفكر فى كلامى و تتقبله بصدر رحب.

شكرا يا مهندس شريف على كلامك وانا مش ممكن ازعل منه لانه صح طبعا وانا مش بدافع عن اللى عملته بس لما يكون الامين واقف فى شارع طوله كله ٤٠ متر والحتة المخالفة ١٠ متر وسايب مناطق كتيييير محتاجاه يبقى ده نازل يتربح مش همه تطبيق القانون على اللى بيخالف وبعدين من ضمن الاسباب اللى خلتنى اعمل كده صعوبة اتخاذ الاتجاه الصحيح من كتر العربيات اللى راكنه بطول الشارع صفين. فين هو بقى من السيارات المخالفة دى؟؟؟

انا اتعلمت ومؤمن ان تطبيق القانون بيكون بروح القانون وليس بنصوصه وان فكرة معاقبة اللى بيمشى عكس الاتجاه ده للى معطل شوارع وماشى مسافة كبيرة عكس، لكن ١٠ متر وبسبب العربيات اللى البيه سايبها صفين يبقى اعتقد ده تعنت وتعسف فى استخدام الحق.

وشاكر لحضرتك مشاركتك القيمة

والله يا محمد هو الموقف نفسة انت عارف انة معاكس وبالرغم من كدة كنت متوقع ان يظهرلك واحد ويعملك مخالفة وكمان كنت مستنى لما يجيلك وتديلة فلوس انا شايف ان انت اللى غلطان وان هو بيطبق القانون عادى وهو غلطان انة قبل منك فلوس وكان يعملك مخالفة ويطبق القانون عادى زى اى مواطن بس للاسف مفيش كدة علشان كدة كلة برضة بيمشى مخالف سبحان الله فكرة بقى واقف يسترزق او لا ملناش دخل فيها مدام انا ماشى غلط حتى لو متر وهو عندة حق مدام دة مخالف يبقى مخالف ويطبق عليا القانون وعلى الكل

وانا معاك فى نقطة ان مفيش حسن تقسيم للشارع وعلشان تعدى لازم تبقى راكب نقل علشان يوسعولك دة غير الركنة الغريبة فى كل مكان كان الله فى العون وربنا يصبرنا على الناس اللى بتعمل كدة برضو واكيد برضو هما اللى بيشتكو مدام مفيش احترام للمكان ولا للقانون والموضوع ماشى كدة يبقى اكيد حيفضل الحال كدة وحتضطر من تانى تدفع لحد تانى لانك متضطر

ياريت نلتزم بالطريق ونبدا بنفسنا الاول وبالتالى مش حندى رشوة ولا الحال حيبقى ماشى بالغلط ذى دلوقت وربنا ييسر لنا طريقنا جميعا

انت اللي جبتة لنفسك يا damasry, كل الناس حتدخل تطلعك غلطان http://www.nilemotors.net/Nile/image...7E2%5B2%5D.gif

يا سيدي احكي عن الناس اللي بتكسر اشارات و تدخل الناس في بعض و عسكري المرور واقف يتفرج كأنة فيلم اكشن.
ولا اللي بيفتح اتجاهين على بعض عااااااااادي جدا

ولا الناس اللي بتركن صف رابع و تسد الطريق

يا راجل قلبت عليا المواجع

اقتباس:

---

المشاركة الأصلية كتبت بواسطة mohamed.ramah

والله يا محمد هو الموقف نفسة انت عارف انة معاكس وبالرغم من كدة كنت متوقع ان يظهرلك واحد ويعملك مخالفة وكمان كنت مستنى لما يجيلك وتديلة فلوس انا شايف ان انت اللى غلطان وان هو بيطبق القانون عادى وهو غلطان انة قبل منك فلوس وكان يعملك مخالفة ويطبق القانون عادى زى اى مواطن بس للاسف مفيش كدة علشان كدة كلة برضة بيمشى مخالف سبحان الله فكرة بقى واقف يسترزق او لا ملناش دخل فيها مدام انا ماشى غلط حتى لو متر وهو عندة حق مدام دة مخالف يبقى مخالف ويطبق عليا القانون وعلى الكل

وانا معاك فى نقطة ان مفيش حسن تقسيم للشارع وعلشان تعدى لازم تبقى راكب نقل علشان يوسعولك دة غير الركنة الغريبة فى كل مكان كان الله فى العون وربنا يصبرنا على الناس اللى بتعمل كدة برضو واكيد برضو هما اللى بيشتكو مدام مفيش احترام للمكان ولا للقانون والموضوع ماشى كدة يبقى اكيد حيفضل الحال كدة وحتضطر من تانى تدفع لحد تانى لانك متضطر

ياريت نلتزم بالطريق ونبدا بنفسنا الاول وبالتالى مش حندى رشوة ولا الحال حيبقى ماشى بالغلط ذى دلوقت وربنا ييسر لنا طريقنا جميعا

---

اهلا يا محمد، هو انت قلت انى مش غلطان فى حتة الفلوس؟؟؟ ما انا عارف انه غلط بس اتصرف ازاى فى واحد كل همه لم الفلوس

القانون لما اتعمل واتعدل كان هدف المشرع هو تسيير حركة المرور وتغليظ العقوبات للحد من الحوادث، لكن ما اتعملش عشان يسيب شغلته الرئيسية فى انه يحافظ عليا وعلى غيرى وينظم المرور صح ويحد من الاختناقات اللى بتحصل كل يوم الشارع عندى عشان يقف يلم جبايات من الناس، معلش يعنى انا لما بمشى على طريق سريع واكسر السرعة واتمسك رادار بدفع المخالفة وانا مش زعلان لانى عارف انى غلطان وهو مش واقفلى مخصوص عشان يلم منى الفلوس.

لكن فى الموقف ده دا كان تصرفى وها يفضل تصرفى طول ما رجال المرور همهم الاكبر لم الفلوس وبكرة لما تجيب عربية وتمشى كل يوم فى شوارع المحروسة وتكون انت قائد المركبة ها اشوف رد فعلك ها يكون ازاى.

واخر نقطة لما الحكومة تدينا طريق صح يبقى نلتزم بيه

اقتباس:

---

المشاركة الأصلية كتبت بواسطة hussein_emara

انت اللي جبتة لنفسك يا damasry, كل الناس حتدخل تطلعك غلطان http://www.nilemotors.net/nile/image...7e2%5b2%5d.gif

يا سيدي احكي عن الناس اللي بتكسر اشارات و تدخل الناس في بعض و عسكري المرور واقف يتفرج كأنة فيلم اكشن.
ولا اللي بيفتح اتجاهين على بعض عااااااااادي جدا

ولا الناس اللي بتركن صف رابع و تسد الطريق

يا راجل قلبت عليا المواجع

---

والله يا حسين بك انا مش زعلان ان حد يطلعنى غلطان لانى معترف من الاول انى غلطان بس انا ليا مبرراتى اللى التجأت ليها في التصرف اللى عملته.

والله ها احكى على ايه ولا ايه، انا كل يوم بشوف العجب العجااااااب وبتعرض لمواقف فعلا تبكى على حال الشارع المصرى

اقتباس:

---

المشاركة الأصلية كتبت بواسطة hussein_emara

انت اللي جبتة لنفسك يا damasry, كل الناس حتدخل تطلعك غلطان http://www.nilemotors.net/nile/image...7e2%5b2%5d.gif

يا سيدي احكي عن الناس اللي بتكسر اشارات و تدخل الناس في بعض و عسكري المرور واقف يتفرج كأنة فيلم اكشن.
ولا اللي بيفتح اتجاهين على بعض عااااااااادي جدا

ولا الناس اللي بتركن صف رابع و تسد الطريق

يا راجل قلبت عليا المواجع

---

قصدك لما تريلا تخبطني ويجري وقدام الظابط وبشاور للظابط يعمل نفسه مش شايف ويمشي عشان مكلموش!!!

احكيلكم الموقف التانى اللى اتعرضت ليه تانى يوم الموقف الاول

راكن فى ميدان المساحة فى الدقى عمودى على الرصيف وخلصت مصلحتى هناك وطالع من الركنة والسايس موقف الشارع عشان اطلع واول ما العربية نصها بقى فى الشارع، البيه السايس جه وقفلى على الشباك وعمال يحكيلى ظروفى ومش عارف ايه وابصر ايه وكملى الفلوس بريزة وحوارات وطبعا الطريق وقف، من غير ما اخد بالى رجلى خفت من على الفرامل والعربية رجعت وهووووب سمعت واحدة بتزعق وتدى كلاكس

ابص من الشباك اللى مش عارف اشوف حاجة منه بسبب السايس اللى واقف الاقى واحدة راكبة ماتريكس وصممت تعدى من ورايا وهى شايفة نص العربية طالعة بره، طبعا مفيش خبت ولا حاجة، العربية عندى بس ريحت على الرفرف الامامى شمال عندها قام داخل لجوه، وهى قعدت تتكلم كتير وتدى كلاكس.

طبعا نزلت ليها وزعقت فى السايس (اللى هما كانوا اكتر من اربعة) عشان محدش فيهم قالها تستنى او قالى استنى، ورحت للمدام وقلتلها خير وياريت حضرتك تركنى على جنب عشان الطريق يمشى وانا مع حضرتك.

هى ركنت على جنب ولما جيت اركن انا كانت فاكرانى ها اجرى ووقفتلى فى نص الشارع هههههه، المهم ركنت ونزلت، خير وان شاء الله بسيطة وقعدت اشرح لها انها تترد بايدى لو الكارتيرة متشالة او مفكوكة وان الحمد لله مفيش بوية متشالة ولا حتة خدوش، وان انا تحت امرها فى اى تعويض هى عايزاه قالتلى انا اكلم جوزى واشوف رأيه، كلمته وقعدت تشرح ليه وبعدين خدت التليفون وكلمته انا سمعنى وقالى جملة واحدة، انت عايز تقول انها مش غلطتك؟؟؟ قلتله لا طبعا هو خطأ مشترك من المدام عشان ما استنتش عربية طالعة من الركنة ووقفت وراها، وغلطة السايس انه ساب الطريق وقعد يدور على الفلوس واخيرا غلطتى عشان مشيت ورا كلام السايس من غير ما ابص على الطريق.

لقيته بيقولى حضرتك اسمك ايه قولتله فلان الفلانى، قالى انا يا فندم عايز اتعرف عليك ومفيش حاجة خالص وانا اسف على اى ازعاج!!!!!!!! يا فندم انا اللي اعتذر مش حضرتك وده حق المدام فى اى تعويض قالى لا طبعا والموضوع منتهى وادينى المدام.

طبعا انا كنت طلعت كارت باسمى وقولت اديه للمدام عشان لو رجعت فى كلامهما مثلا وحبت تصلح العربية.

المفاجأة بقى انى لما روحت البيت بعديها بكام ساعة لقيت نمرة غريبة بتكلمنى وراجل يقولى انا فلان الفلان زوج المدام اللي حضرتك خبطها وانا لحد دلوقتى مشوفتش العربية بس عرفت خلاص اللى حصل فيها وهى حاجة بسيطة جدا وانا بتصل بحضرتك عشان اعتذرك عن اللى حصل وكفاية زوقك وادبك انك وقفت للمدام وفضلت معاها للاخر!!!!!! وانا شغال فى الحتة الفلانية ولو حبيت اى حاجة منها انا تحت امرك!!!!!

اقوله يا فندم ده اقل حاجة والاعتذار ده واجب عليا انا مش حضرتك يقولى المدام اعصابها خفيفة ولما حصل اللى حصل هى اتلخبطت ونسيت تعتذر لحضرتك!!!!

بصراحة انا مكنتش عارف ارد عليه اقوله ايه، بجد بجد انا كنت مبسوط اوى ان لسه فيه ناس بالشكل ده وتحية احترااااااام وتقديد لهذا الرجل اللى قلما نجد مثله.

إنت متأكد إن الراجل الي إعتذر ده مصري