اكله رهيبة جداااااااا بعملها بمعدل كل اسبوع مرة (( طبعا وانا لوحدى لان انا واخويا الناس الوحيدة اللى بنحبها فى البيت انما باقى البيت بيقولونا انتوا محسسنا انكم هنود ولا جايين من باكستان ))

المقادير :
1 كيس مكرونه (( يكفى لشخصين ))
2 علبك تونة نضيفة ويفضل (( تى سى بوى )) مش دعاية للتونة ولكن انضف نوع فى السوق مالوش ريحة خالص
زيتون اسمر مخلى ومقطع
فلفل اخضر حراق او عادى حسب المزاج والكيف
2 بصل صغير للتقطيع
جبنه رومى (( دى اختيارى بس بتبقى حلوة اوى ))
ا كيس صلصة يكفى لكيس المكرونة


طريقة التحضير :
يقطع البصل فتافيت فتافيت ثم يوضع على النار حتى يتم اصفراره
ثم يوضع عليه قطع الفلفل والزيتون حتى يصبحوا نسيج واحد
ثم توضع الصلصة والبهارات اللازمة من فلفل اسود وملح (( حسب الطلب ))

وتترك على الناس لحد ما تتسبك _ ثم توضع التونة من غير اى زيت عليها علشان بتبقى زفرة اوى بالزيت اللى فيها

وهاتك يا تقليب _ وهاتك ياتقليب يابو العيال
بعد كده تحط الجبنة الرومى قطع صغيرة اوى اوى علشان تبقى كلها حاجة واحدة

طبعا تكون انت سلقت المكرونه ابيض من غير صلصة خالص بس ابقى حط عليها ملحك عادى

بعد كده هات طبق حلو حط فيه الخليط الرائع ده _ وطبق مكرونه حلو كده يملى العين

وخد شوية من الخليط فوق الطبق وكل ياباشا بالف هنا وشفا

طعمها رهيييب جداااااااااا ومش بتاخد وقت وهتحس بتغيير فى الاكل احسن من الروتين اللى عايشين فيه


وقلولى رايكم بس محدش يضرب لو معجبتوش