الموضوع: ارجو الافادة لشراء سوناتا 2010 بعد التخفيض اللى عملة غبور

المشاركة الأصلية كتبت بواسطة som3aa

يا جماعة انا عندى العربية 2400cc موديل 2007 (أول دفعة من التجميع المحلى) بقالها معايا حوالى 3 سنين و نص , العربية تجميع محلى مش تصنيع محلى

الضريبة لما جددت (انا كنت مرخص 3 سنين فى الاول فمدفعتش حاجة , التجديد كان ب 2600 جنيه بعد خصم استعمال 15%) معنى كدا ان الضريبة اول سنة لو جديدة حوالى 3000 جنيه و شوية.

ال2000cc ضريبتها 1000 جنيه و بتقل 5% كل سنة (لو جديدة زيرو)

مميزات العربية :1 - بصراحة عربية محترمة جدااا مبتعومش و الكلام دا و ثابتة جدااا على سرعات عالية اوى و علطول بمشى على سرعات زى 160 على الطرق السريعة و اكتر كمان لو مسافر فى طريق نظيف .
2- العربية واسعة جداااااا جدااا يعنى
3- محتجتش الضمان غير فى حاجتين (كوبلن كان ساعات بيعمل صوت لما بلف الدركسيون على الاخر و قولتلهم على الصوت فى الصيانة غيروه فى الضمان و الشماسة (اللى بتنزل من السقف علشان تحجب الشمس ) و دى برده غيروها فى الضمان علشان كان عليها recall بره , يعنى عربية اعتمادية جدا و عمرها مثلا ما عطلت و لا حاجة زى ما اشتريتها من 3 سنين و نص بالظبط
4- العربية شكلها جميل جدا من بره
5- من الاخر عربية ممتازة فى كل حاجة فعلا فمش هعد اكتب كتير عن العربية علشان فعلا هى ممتازة فى كل حاجة و خصوصا كمان عزل الصوت و الحجم و الثبات الرهيب و الجودة و كل حاجة ماعدا العيوب
6- الكراسى مريحة جدااا جداااا
7-صاج العربية قوى جدا و بيستحمل الصدمات الشديدة
عيوبها
1- العربية نازلة من 2004 (بره) يعنى تكنولوجيا قديمة سواء فى الموتور مثلا اللى 161 حصان بس (2400) او 143 حصان (2000) يعنى مثلا الانترا الجديدة بتنزل بموتور 1600 و 140 حصان , تانى حاجة الفتيس 4 نقلات بس و العربية تقيلة وزنا فال 2400 يدوبك كويسة فى السحب و كدا بس متوقع ال2000 مش هتكون قد كده (بس طبعا لو قارنتها بالفانتازيا (الاوكتافيا) (علشان عندنا فانتازيا بتاعت والدتى) مثلا كانك بتقارن موتور 128 بموتور ميتسوبشى و لا بتقارن كورولا بفيرارى لان المواتير بتاعت الجيتا و الفانتازيا فعلا عيب تنزل فى عربية كدا و عن تجربة شخصية ).
2- الfacelift المضروب اللى نزله غبور , كله صينى و مش اصلى سواء الشاشات و الشاشة بتاعت الgps و الزينون التعبان الى ب 600 جنيه عند غبور و المرايات (انا مجربتوش الصراحة فمش عارف كويس و لا وحش).
3- العربية ال2000cc غبور الله يخليه شايل منها حاجات عن ال 2400 زى الcruise control و الairbag بتاعت اللى جنب السواق و التابلوه الابانوس.
4- جودة الفرش بتاعت الinterior وحشة اوى (اتحسنت بعد كدا فى الدفعات اللى بعد بتاعتى) بس فعلا تحس الفرش معمول فى ورشة ب 100 جنيه
5-اهم عيب فى العريبة الinterior بتاعها , اولا جودة التقفيل فيه مكانتش كويسة فى اول دفعة بتاعت 2007 (بيقولوا الكلام دا فى الدفعة دى بس) يعنى مثلا القايم بتاع حزام الامان مكنش متركب كويس فطلع لبره مثلا و حاجتين كمان مكنوش متثبتين كويس فى الinterior كانوا بيعملوا صوت و طبعا ثبتوهم فى التوكيل و انا واقف فى دقائق و عموما الinterior بتاعها مش اوى يعنى فوق المتوسط تقدر تقول , مش جميل زى الفانتازيا مثلا بس احسن من عربيات كتير بنفس التمن (العربية مثلا لون التابله اخضر مش ازرق و احمر زى العربيات الجديدة فمفيش العصرية فيها من جوه برده).
6- بالنسبة لقطع الغيار علطول كانت متوافرة (انا غيرت باب علشان كان اتخبط و الحاجات العادية بتاعت الصيانة و الشماسة و كبلن فى الضمان) دا كل اللى احتاجته و الشماسة مكانتش موجودة و جابوها فى اسبوع تقريبا من كوريا و كانت ب 1000 جنيه عندهم لو منغير ضمان , التيل مثلا علطول موجود و المرة الوحيدة اللى ملقتش فلتر الهواء فى صيانة ال60 و جابوه فى اسبوع برده بس انا استنت لصيانة ال65 لحد مغيرته بس عموما قطع الغيار متوفرة جدا و الباب كان ب 2600 و نيجى لنقطة اسعار قطع الغيار اولا الصيانات رخيصة جدا بس مشكلتها انها كل 5000 مش 10000 طبعا دا من غبور , بره 10000 بس قطع الغيار فى الاول كانت غالية جدااااا بس رخصت كتير فى الاخر يعنى مثلا الفانوس الواحد كان ب 2000 جنيه دلوقتى الفانوسين الخلفيين ب 2000 جنيه , الامامى كان ب 1750 مش عارف كام دلوقتى , الباب ب 2600 (من 6 شهور مثلا) , التيل كان ب 1000 جنيه الامامى (بيتغير معايا كل 15000 كيلو تقريبا) دلوقتى اعتقد ب 850 و دا غالى طبعا , التيل الخلفة كان ب 650 مش فاكر اتغير و لا لأ (بيتغير كل 25000 كيلو) , المرايات الجديدة ب 440 جنيه الواحدة بس (صينى تقريبا مع الfacelift المضروب ) , الأصلية كانت من سنة كدا قبل الfacelift ب 880 جنيه الواحدة , الشبكة ب 650 جنيه , دى اسعار قطع الغيار غالية طبعا نسبيا بس بالمقارنة للفيكترا مثلا قليلة جدا , بس الصيانات العادية بتبقى رخيصة حتى صيانة ال60000 كانت ب 2000 جنيه كلها تقريبا حاجة كدا

بس كخلاصة عن العربية :

العربية ممتازة جدااا جداااا يعيبها انها قديمة فى التكنولوجيا و الشكل الداخلى , التكنولوجيا زى الكاسيت الجديد التاتش و الbluetooth و الزينون و الحاجات دى و الفتيس ال4 نقلات و الموتور مش قوى اوى ( بالنسبة لانه 2000cc) و لون التابلوه من جوه و كدا , يعنى من الاخر اللى عايز عربية بجد و مستعد يتنزل عن فتحة السقف و الالحاجات المنظر زى لون التابلوه و الكلام دا العربية تناسبه جدا و خصوصا لو لعائلة لانها واسعة جداااا و كمان شكلها جميل , فى 2007 وحتى 2008 ناس كتير جدا كانت بيعجبها العربية و توقفنى تسالنى عليها فى الشارع
حاجة تانية نزول شكل جديد (بره لانه مش هينزل مصر لان هيونداى رفضت تجميع عربيات هنا و الفرنا كمان هتقف تجميعها فى 2012) فدى بتضايق بعض الناس
غبور منزل تمنها للرقم دا للتصفية لان اعتقد دى اخر دفعة هينزلها و بعدين خلاص مش هينزل تانى و بالسعر دا هى لقطة الصراحة حسب استخدام الشخص , يعنى مثلا بالمقارنة بالكورولا و الالنترا و الكلام دا انا اشتريها منغير مفكر , بس بالمقارنة للفانتازيا مثلا اللى هى ارخص منها بره لأ الفانتازيا فيها حاجات كتير اوى و تكنولوجيا احدث كتير زى الtype pressure و الbluetooth الاصلى و لون التابلوه و حاجات من الكلام دا مع موتور اقل ما يوصف عنه انه لا يصلح لعربية بالحجم دا فى الفانتازيا و طبعا interior الفانتازيا شيك جدا .

يعنى اللى عايز عربية بالتمن دا تبقى لقطة بس لو عايز يزود يجيب الفانتازيا مثلا لو مش فارق معاه الموتور.

على فكرة انا مكتر فى العيوب علشان ابقى صريح 100% مع اى حد بيفكر يشتريها لان المميزات كتير جدااا كفاية انها فئة الكامرى و بتنافس الكامرى و الاكورد بره مصر فعلا و لو اشتريتها كانك اشتريت كامرى بالظبط فى الاعتمادية و الشكل و حتى الinterior.

بصراحة السعر لقطة , لو 2400 يبقى احسن بس هيفرق كتير فى اعادة البيع و الضريبة طبعا

نسيت فى ال2400 , استهلاك البنزين لما بملى التنك (70 لتر) بيدينى حوالى 570-595 كيلو امشيهم و انا شايف ان دا كويس

لو احنا كنا فى 2007 تانى كنت اشتريتها تانى بدون ادنى تفكير نهائيا , لو احنا انهردة قبل العرض مكونتش اشتريتها بسبب نزول الفانتازيا اللى مثلا ب 200 الف فيها زينون و فتحة سقف و شاشة تاتش و gps و كل دا اصلى و مرايات كهربء و تابلوه ابيض و و وو حخاجات كتير اوى جميلة فعلا ماعدا الموتور

انما بالسعر الجديد بتاع غبور الصراحة الموضوع محتاج تفكير جامد انا علشان سنى صغير بحب العربية العصرية فممكن افكر شوية , بس لو حد مش فارق معاه الكلام دا يجيبها و هو مغمض و الصراحة انا مجربتش الشاشة و الحاجات اللى غبور نزلها بس للعلم دى مش اصلى بس مش عارف حلوة و شغالة كويس و لا لأ .

معلش يا شباب انا جاى ارد بالشكر بجد ليك يا باشا ردك جميل جدا ويتعملو موضوع لوحده

جزاك الله خير وكل الاعضاء الخدومه المتعونه يا باشا

تصنيف السوناتا فى فئة السيدان المتوسطة فى امريكا...


http://usnews.rankingsandreviews.com/cars-trucks/rankings/Affordable-Midsize-Cars

/