السلام عليكم ياجماعة
كنت عايز اسال على قواعد المكنة لعربية هيونداى جيتز موديل 2006 بكام
ومافيش اخبار عن فوجاتها ممكن تتجاب منين؟ نفسى اجيبهالها تانى بجد كانت مدية منظر جامد
عرض للطباعة
السلام عليكم ياجماعة
كنت عايز اسال على قواعد المكنة لعربية هيونداى جيتز موديل 2006 بكام
ومافيش اخبار عن فوجاتها ممكن تتجاب منين؟ نفسى اجيبهالها تانى بجد كانت مدية منظر جامد
السلام عليكم يا رجالة
انا عملت حاجات كتير النهاردة والحمد لله وهاقولكوا على كل حاجة وبالتصوير يعني حصريا .
الاول ارد على محمد اللى عايز يعرف سعر قواعد الموتور بس يا سيدي . في قاعدتين كبار ودول سعرهم حوالى 650 الواحدة وفي 2 اصغر ودول في حدود 250 الواحدة ودي اسعار غبور .
زي ماقلت قبل كده انا كان عندي مشكلة وهي ان في صوت في الموتور زي حكة كده ولما بدوس دبرياج بيروح الصوت . وكنت شاكك في بلية الدبرياج والحمد لله طلعت هي السبب وحيث ان عربيتي عاملة 132000 فقولت اغير الطقم كله عشان كده كده هافك الفتيس .
بصراحة كنت عايز اركب قطع غيار اصلي وفي نفس الوقت اركب في التوكيل عشان اضمن ان كل شيء يبقى تمام . والحمد لله ربنا وفقني وروحت مركز خدمة لسة فاتح جديد جنب البيت في التجمع الخامس . كنت رايح ابص بصراحة واشوف الاول مستواهم ايه بس لقيت نفسي بقولهم اشتغلوا على الرغم اني عندي وسواس عدم الثقة في المراكز دي . بس زي ماقلت هي مشيت باختيار ربنا والله .
الاسعار كالاتي :
- بلية الدبرياج 160
- اسطوانة 260
- ديسك 300
وكمان غيرت الاتي :-
- بوجيهات 48 جنيه
- فلتر هواء 42 جنيه
- علبة اسبراي لتنظيف بوابة الهواء والايديال 40 جنيه
- مصنعيات 350 جنيه
الحمد لله العربية فعلا فرقت كتير والصوت الحمد لله راح ودواسة الدبرياج رجعت تاني خفيفة جدا جدا زي ماكانت العربية زيرو والموتور اتظبط ومابقاش بينتش كده وهو على السلانسيه .
ناقص حاجة واحدة عندي وهي رجة الموتور الصبح بدري ولما روحت قولتلهم عليها قالولي دي من الحساسات وهانضفها هي والبوابة . بس انا قولتلهم لا مش الحساسات دي قواعد الموتور بس مهندس الاستقبال قالي لا الحساسات فقولت اسيبهم يشتغلوا وياريت تيجي فعلا من الحساسات ويبقى الموضوع تنضيف وخلاص .
المهم والصنايعي شغال في العربية وهو بيقفل الفتيس بقه قالي عندك قاعدتين الموتور مش كويسين وفيهم قطع ومحتاجين يتغيروا . بس للاسف مكانش عندهم ولما عرفت اسعارهم حمدت ربنا انهم مش موجودين .
بس بعد ما خلصوا وبجرب العربية كانت العربية باردة لانها فضلت حوالى 4 ساعات مركونة شغالين في الفتيس . وبما انها باردة يعني في رجة في الموتور . فالصنايعي قالي دي قواعد الموتور . قولتله منا عارف بس ياريت تبقى تعرف المهندس اللى جوه .
قالي يابشا دول ولا مهندسين ولا حاجة هما بياخدوا اللقب هنا بس كده .
انا دفعت اجمالي 1200 . المركز اسمه الجوهري وهو جنب استاد بترو تريد في التجمع الحامس وفي صنايعي هناك حريف اوي اسمه محمد عثمان وعنده خبرة 15 سنة في توكيل فيات و4 سنين هيونداي .
تقييمي للمركز جيد واهم نقطة كنت متكيف منها اني قاعد تحت العربية من ساعة لما روحت هناك وكل حاجة فكها بسال عليها وشوفت كل العملية لايف . وبعد العربية ماخلصت اتغسلت جوه وبره وخرجت مرضي من الشغل والحمد لله .
ودي شوية صور للديسك القديم والجديد والفتيس والبلية .
دي صورة الديسك القديم وحكة البلية معلمة فيه
http://img52.imageshack.us/img52/9794/24012011703.jpg
ودي البلية القديمة
http://img291.imageshack.us/img291/4994/24012011702.jpg
وده الديسك الجديد بعد ماركب بس مالحقتش اصور الاسطوانة
http://img534.imageshack.us/img534/7279/24012011705.jpg
وده المكان اللى بيفكوا منه الفتيس وبيركب منه هنا
http://img12.imageshack.us/img12/5144/24012011700.jpg
اللى باين في الصورة ده الكوبلين الداخلي اللى بيربط في الصليبة اللى هي باينة قدامكوا ومليانة شحم دي
http://img824.imageshack.us/img824/6607/24012011706.jpg
ودي جلة الفتيس اللى بيركب فيها البلية الجديدة في الفورش وهي راكبة حاليا اهي
http://img24.imageshack.us/img24/1995/24012011709.jpg
اتمنى اني اكون عرفت انقل كل حاجة والكل يستفيد
طيب انت شايف ان هما افضل من التوكيل فى ابو رواش ولا نفس المستوى مع العلم ان عربيتى عاملة 30 الف لسة بس مشكلة التوكيل ان الاسعار عالية بس بحس ان العربية خارجة من المعرض علطول و انت قولتلى قبل كدة ان المراكز دى مش مضمونة يا ريت توطحلى النقطة دى
القصة ان كل شى ليه مساؤه وعيوبه
يعنى مراكز الصيانة غالية بس بتكون مطمن لانك فى مركز بتتعامل مع ادارة وكده واينعم ممكن ساعات يعملوا حاجة غلط فىا لعربية بس هما المسؤلين فى الاول والاخر
انا شايف انك تخليك فى حوار المراكز او ابو رواش سيان عشان انت لسه فى الاول برضه
يا جماعة انا عندى مشاكل و فعلا محتاج مساعدة :
اول حاجة الصبح فى رجه واضحة جدا و العربية باردة مع العلم العربية 2010 و ماشى 30 الف بس و مش عارف ليه كدة ؟؟؟
اللمبة الزرقاء بتاعة الحرارة الى فى التبلوه مش بتنور لما باجى ادور العربية و هى باردة ؟؟؟؟؟
والمشكلة الاكبر بقة كتاب الصيانة ضاع و مش عارف ايه الى هيحصل ؟؟؟
رجة فى الاول وبعد كده لما تمشى تروح............ لو كده فاحتمال تكون قواعد مكنة بس هايبقى صعب اوى بسبب انك لسه موديل 2010 وممكن تكون بوجيهات او اسلاك بوجيهات هل عملتلها صيانة
بالنسبة للمبة الزرقاء ممكن يمون فيوز فصل بس لو معاك مفك تيست جربه تشوف الفيوز بتاعها موصل كهرباء ولا لا
كتاب الصيانة بقى معرفش اقولك ايه بس عادى اعتقد .... انا مااستخدمتوش قبل كده بصراحة
من خبرتي مع عربيتي , اقولك يا سيدي
الرجة دي ليها سببين
الاول الحساسات عايزة تتنضف هى وبوابة الهواء وده اتعمل وانا بغير طقم الدبرياج .
الثاني قواعد الموتور ودي عندي بايظة ولسة بايظة عشان مكانتش موجودة عندهم .
وبعد ماخرجت من المركز لقيت الرجة لسة موجودة .
فإذن العيب الرئيسي هو قواعد الموتور . وفي رأي مش شرط انك عشان عربيتك عاملة 30 الف يبقى قواعد الموتور سليمة لان وارد يكون في حاجة اسمها عيب صناعة . يعني ممكن تكوت في قاعدة عندك باظت وده عادي مش معني كده ان العربية مش كويسة . ساعات الواحد بيجيب حاجة جديدة وتطلع بايظة .
المهم انك تسال وتروح تكشف عليها عشان تعرف السبب وماتقعدش تفكر كتير .
ونصيحة انك تروح على ابو رواش عشان موضوع اللمبة دي كمان . وكتاب الصيانة ده انا عمرى ماكتبت فيه حرف حتى ولا طلعته من الدورج بتاع الكومودينو اللى جنبي .
وخليك مع ابو رواش عشان انت لسة في الضمان .
والله يا على انا كنت اتعاملت مع مركز قبل كده وعمل حاجة كده غلط وروحت اشتكيت في ابو رواش فقالولي انهم مالهمش رقابة او قرارات على مراكز الصيانة . لو غلطوا ارجعهلم تاني وطبعا المراكز دي هدفها انها تكسب وطبعا مش هاتاخد منهم حق ولا باطل . غير غبور عنده مخازن بالهبل وقطع الغيار بالعبيط ومش هايفرق معاه انه يشيل قطعه غيار ويحط واحدة مكانها . عشان كده قولت بلاش مراكز خدمة وخليني في المضمون .
لكن انا دلوقتي وضعي مختلف وهو اني خرجت من الضمان عشان كده بقوا كلهم زي بعض وزي ماقت انا كنت عايز اجرب مركز جنب البيت واشوف ايه الاخبار والحمد لله ربنا سترها .
مش معني كده ان كل المراكز كويسة ولا كلهم وحشين بس هي حظوظ مش اكتر .
وبصراحة انا اتعاملت معاهم على انهم ميكانيكي يعني ظبطت الواد الصنايعي وراضيته بورقة من الحجم الكبير نوعا ما وسجاير وشاي والذي منه لغاية لما كسبته في صفى وبدأ يقولي غير دي وماتغيرش دي .
لكن انا انصحك بما انك لسة في الضمان خليك مع ابو رواش