استاذ اسلام
السلام عليكم ورحمة الله وبركاته
انا هاتكلم عن خبرتي مع عربيتي . موضوع السخونية ده انا الحمد لله عمر العربية ماسخنت مني ابدا وانا اول لما اشتريت العربية وكانت زيرو كنت مضايق جدا انهم مش عاملين مؤشر حرارة في الموديل الجديد بتاعنا . وكل الحكاية لمبة هاتنور لما العربية تسخن . لكن الحمد لله اللمبة دي مانورتش ابدا .
موضوع الرجة دي فعلا بدا يبقى شائع خصوصا مع دخول الشتاء والبرد وطبيعي ان البرد ينشف كل شيء مطاط . انت لو مسكت الدواسة بتاهة العربية الساعة 7 صباح في الايام دي هاتحس انها ناشفة جدا وعلى الساعة 2 الظهر كده مع وجود شمس هاتلاقيها مرنة زي حالتها العادية . ومن هنا قدرت اشك ان الرجة دي سببها قواعد الموتور واللينك اللى انت بعتهولنا اكدلي المعلومة واشكرك عليها .
صوت الموتور عالى وهي باردة ( مش ال rpm عالى ) يعني حوالى كده ربع ساعة مثلا الصبح بدري بيكون صوت الموتور مرتفع شوية وبحس ان العربية خشنة شوية لكن كل الاعراض اللى قولتها دي بتختفي اول لما العربية بتسخن .وتبدأ تتحرك بيها . بس ممكن يكون الصوت العالى نسبيا مقارنة بعربيات تانية ان حوض المتور صغير اوي على المتور ولو بصيت على حوض الجيتز هاتلاقي بقية الموتور داخل تحت المرايا ويمكن تحت التابلوه كمان , علبة زيت الفرامل مكانها يمكن تحت نهاية البرابريز الامامي , دي نقطة .
والنقطة التانية ان الخامات المستخدمة في التقفيل الخاص بالصالون من تحت التابلوه اعتقد انها مش كويسة اوي . انا بقول كده لاني ساعات بحس بحرارة الموتور داخة على رجلي وخصوصا في الصيف ولما بيكون الجو حر .
بس في حاجة ؟؟؟
انا شاري العربية في شهر 10 2007 انا اول يد ومن ساعتها وانا ماشي على جدول الصيانة بس كل 10000 مش 5000 وبغير كل حاجة وفي التوكيل لغاية 80000 كيلو .
بعد كده بصراحة بدأت اهمل شوية موضوع الصيانة وبقيت بهتم بالصيانات اللى في تغيير حاجات مهمة زي صيانة ال 120000 عشان بيتغير فيها سيور وبلي وشدادات وكده . عشان كده معلمتش صيانة من 90000 لغاية 120000 بس بغير انا الزيت والبوجيهات كل 100000 بره .
العربية كانت كويسة جدا لغاية 90 الف . سواء شتاء او صيف برد صقيع حر مافيش فرق خالص ومافيش اي ملاحظات لا صوت عالى ولا اي حاجة .
وبرضه ملاحظ الشكاوى جاية من ناس عربياتهم موديلات حديثة يعني 2010 او 2009 .
انا عامل حاليا 128000 وبدات احس بحاجات ناس تانية بتحس بيها عاملة 18000 و37000 كيلو .
ده بالنسبة للمشاكل اللى انت قولت عليها
يارب اكون افدتك بخبرتي .