سائقي التاكسي هم الأسوء على الإطلاق
السلام عليكم ورحمه الله
طبعا الموضوع باين من عنوانه
أنا عارف إن فى السنين الاخيره أشتهروا سائقى الميكروباصات بأنهم الاسوء على الطريق لكن بخبرتى المتواضعه وتجربتى لسنين من السواقه فى مصر أقدر أجذم بإن سائقى الميكروباص براء من المنصب الرفيع دا :)
وعايز أقول أن الاستفزازات الى لاقيتها خلال سواقتى أكثرها من سائقى التاكسى مش الميكروباص
مش طبعا بقول سواقين الميكروباص دول ملايكه لكن تعالوا نفكر بهدوء
دايما هتلاقى سواق الميكروباص واخد يمينه وبجد يمين الطريق فى مصر وخصوصا الشوارع الكبيره الى بيمشى فيها الميكروباصات أصبح "territory" للميكروباصات ومتقدرش كسائق ملاكى أنك تمشى فيه 500 متر على بعضهم
طيب
بس دى عربيات نقل جماعى تعتبر
كل شويه تقف تنزل أو تركب ومن حقها
ومش طبيعى أنك أنت كسائق ملاكى أنك تمشى يمين الطريق وتطالب أنه يكون سالكلك!
فى طبعا سواقين ميكروباص بيمشوا على الشمال لكن بجد دى أعداد قليله جدا جدا وغالبا دا مش سواق
كمان شوف الميكروباص هناك بيزاحم مين
دا بيزاحم الاوتوبيسات والنقل بأنواعه والميكروباصات الى زيه علشان أكل العيش والزيون
يبقى لما تدخل أنت مبينهم متزعلش لما حد يرمى عليك
هما أساسا بيرموا على بعض
يبقى سواقين الميكروباص دول غشما بس فى الاخر محدش يدخل عش الدبابير ويقول هما لسعونى ليه!
خد شمالك وأمشى "كسائق ملاكى" ومش هتلاقى أى ميكروباص مضايقك إلا قليلا
ويوم متاخد يمينك علشان تركن أضرب أنتظار وعرف الناس أنك هتركن لكن مش تازحمه طول طريقه وهو أساسا متعفرت كل شويه يرمى ويفرمل ويجرى علشان ينزل زبون أو يلحق أخر
نيجى بقى للألعن وهو سائقى التاكسي
أنا شايف أنهم آفه الطريق الحقيقيه
أسوأ شىء فى التاكسى هو شىء واحد بس
والشىء الواحد بس دا هو الى عامل جميع المشاكل الى ممكن تتعرضلها وانت سايق
وهو
الرشقان
سائق التاكسى دايما رافع شعار الرشقان وملء المساحات
يبقى طريق حارتين والكل ماشى عربيتين جنب بعض ويطلع سواق التاكسى الراشق يرشق جنبك ويزنقك علشان يملا مساحه وخلاص
او طريق 3 حارات والحاره اليمين عطلانه علشان عربيه عطلانه فيها والكل ماشى حارتين بس يجى التاكسى يرشق فى الحاره العطلامه وقبل ميوصل للعربيه العطلانه يروح رامى بوزه علشان يخش هو...فتك يعنى
سواق التاسى بيجرى بأسلوب أغبى وأغشم من الميكروباص
خد بالك أن حجمه أصغر وأثبت وأفضل فى المناوره والمعظم دلوقتى فيرنا وعربيات حديثه نوعا ما يعنى عربيات جرايه
مش زى زمان 124 و 125
فأخينا بقى بيشد ويجرى ويزنق و يرمى ويعمل كل ما ممكن يضايقك وأنت سايق وكله تحت شعار الرشقان
كمان التاكسى بقى ملوش territory بل أنه يمين ماشى شمال ماشى فى النص قارفك وفى كل الجهات
وكمان بقى معندوش ثقافه أنه يقف لأى سبب
التاكسى مفهوش فرامل
لو الى جانبه رمى عليه هو بدوره يرمى عليك
ولو حارته وقفت ... إزاى ... حارتك ماشيه؟ هاتنى مكانك... وأرمى وأرشق!
قليل بردو لما تلاقى سواء تاكسى ذوق
يعنى معمريش أديت إشاره يمين أو شمال وسواق تاكسى وقف يعدينى لا إزاى وراه الديوان
فأخيرا التاكسى هو الاسوء على الاطلاق وبدون منازع
لأنه نظريا محسوب علينا ملاكى "كعربيه" لكن الى سايقه سواء ميكروباص :))
يعنى سواقا لميكروباص غشيم لكن فى منطقته
دا غشيم وماشى حواليك من جميع الجهات
يبقى خالى بالك من سواقين التاكسى إنهم الاسوء