الموضوع: امتى نعرف نسوق

كتير وانا بسوق عربيتي بفتكر المنتدى وبقول لما هرجع هحاول اعرض الموضوع ده وهو امتى بجد نبقى من الدول اللي فيها مرور صحيح و سليم .. عدم الوعي المروري بقى فوق الحد والطرق بقت من ضمن اسباب الحوادث وكتير من السيارات ضعيفة وغير قادرة على السير ومسببة للازدحام وعفوا بجد لكل السيدات والبنات اللي بتسوق بجد قربت اقرر اروح شغلي بالباص وما اسوقش بسببهم ..
اول فكرة بتيجي في بال اي حد مننا وقت ما بيقرر انه يطلع رخصة هي الواسطة وعلى فكرة انا كنت منهم بس بامانة الله انا دخلت الامتحان ونجحت فيه بعربية طول عربيتي الحالية مرة و نص .. اقصد احنا ليه مستهترين وليه اصبحنا امام الدول الاخرى اننا همجيين لغاية ما انجلترا حذرت رعايا في مصر من عدم الوعي المروري واللا مبالاه.. ويعني ايه نلاقي واحد ماشي على مهله اوي في حارة سريعه ولا واحد راكن عربيته العطلانة في حارة سريعه ولو جيت تكلمه انت بتعمل ايه هيرد عليك و هيقولك انا حاطط مثلث الامان اهو بعيد.. ولا مكروباص نفسه في كل حاجة عاوز يركن في نص الطريق ويكسر عليك ويطلع وانت ماشي جنبه وانت تقف و وراك عربيات هتخبطك .. ايه الحل بجد !! هو لازم لما اكون في الحارة السريعه وهعدي جمب واحد على الحارة اليمين ان ارعشله واقوله خد بالك انا جاي جمبك اوعى تحدف عليا .. انا لو عملت مشوار 50 كيلو برجع منه جعان و عاوز انام.. ليه كده .. ليه المرور بيفاجئنا كل شوية بقوانين وبتطبق لمدة شهر او شهرين ومش بنسمع عمها حاجة تاني.. و ليه المرور مع الضرائب الباهظة اللي بيسحبها مننا مع كل تجديد او اصدار مش بيكون قدامها على الاقل طرق تحترمنا وتحافظ علينا وعلى سيارتنا.. اوقات كتير بسئل نفسي لما بشوف راجل كبير في السن او وحدة بتسوق عربيتها وهي بتبقى مرعوبة وهي بتشغلها مش بتطلع بيها بس انهم ازاي بيوصول لبيوتهم تاني و مبلقاش اجابة غير ان ربنا وحده له الفضل في انهم رجعو لبيوتهم سالمين او لحركة المرور العشوائية او لصاحب مكروباص وفاكر نفسه انه كينج الطريق او لواحد ماشي في مكان غير مكانه و كتير كتير كتير كلهم ربنا وحده هو اللي ليه الفضل ان رجعهم بالسلامة .. نفسي اشوف مصر احسن من كده