الموضوع: هل فيه هنا طبيب باطنة او جراحة ؟ (مرارة ولا قولون) ؟

سلام عليكم
انا ان شاء الله مقبل على عملية جراحية في منطقة اسفل البطن

الفكرة ان انا عندي حصوة في المرارة قطرها حوالي 13 ملم
و عندي مجموعة اعراض بتحصل لي لما اكل اكل معين (اي حاجة فيها دهون او دسمة شوية - سمنة , قشطة , كبدة , جمبري , ضاني , اي سمك غير البلطي , اي حاجة معمولة بزيت و مش متجففة كويس )
( كتمة بتيجي على فم المعدة (احيانا غاز و احيانا سائل) بتخليني مش عارف اتنفس الا بصعوبة ده غير الألم طبعا , و اقعد اخد في سفن اب و فوار و اتمشى و اعمل لحد ما تروح و ارتاح , , و بصفة عامة بطني ملبكة و اغلب الوقت فيها غازات كتير في المعدة و القولون ) , و الاعراض دي بتجي لي بمعدل مرة كل اسبوع او اتنين مرة

المهم ان الدكاترة اختلفوا في المسألة دي , فيهم اللي يقول لي ده القولون ( انا فعلا عندي قولون عصبي , لما باتضايق اوي باحس بقلبان في بطني بس احساسه مختلف عن الاعراض السابقة خالص , و بيحصل كل فين و فين اصلا) , و فيهم اللي يقول لي لازم تشيل المرارة كده كده , و فيه اللي قال لي مش هانعرف غير لما تاخد علاجات قولون الاول , و فيه اللي قال لي اي حاجة بتتعبك ما تاكلهاش , فانا احترت :(

دلوقت انا كده كده هاعمل عملية تانية فهل:
- استئصل المرارة معاها و خلاص
- اعمل العملية التانية و انتظر لما اشوف علاجات القولون هاتعمل مفعول ولا لأ , ولو ما عملتش اعمل عملية تانية للمرارة
- مش عارف :(