هو حل سهل و كويس بس عيبة حاجة واحدة و ليه حل . العيب لو نورت الفوجات الامامية اللمض الخلفية حا تفضل منورة على طول و الحل لو أنت حا تستغنى عن النور الخلفى ممكن توصلهم مع نور الفرامل فقط بس مش حا ينورو لوحدهم تانى فهمت قصدى
هشام باشا صباح الجمال مش فاهم ايه المشكلة ان الفوجات الأمامية تنور مع الخلفية ماهو الفوجات دي يا باشا بتشتغل في وقت الشبورة والمفروض تشغل الوج الأمامي مع الخلفي مش المفروض انك تشغل الفوج على طول لأنه مش هايفيدك اوس غسر في الشبورة
أقولك يا زلبانى بص الفوجات ساعات بتستعملها زى النور الصغير شوية يعنى بتفضل منورها كتير و بتطفى النور العادى لو حد جاى فى وشك . فلو أنت منورها على طول الفوج الخلفى بيضايق الناس الى وراك خصوصا لو واقف فى الاشارة و أنا ساعات بنور الفوج الخلفى لو بركن فى شارع ضلمة . هى مش حا تقول لآ بس هى العملية علشان مفيش مكان للمفتاح بس
بيتباع جديد ولا مستعمل ؟
وثمنه كام ولو منه انواع احسن نوع
اهلا مساء يا تيفا وجيفنتوز واستاذ هشام والناس كلها الموجود والغائب
السلام عليكم
ازيك يا حسنى باشا
بتاع الرادياتير هتلاقى عنده منه كتير
وكمان هتلاقيه فى اماكن الاستيراد بس الاستيراد هتلاقيه اغلى من الجديد
هو هيكون فى حدود 20 او 25 جنيه استيراد
الجديد بصراحه ما عرفش
ولو خدته من عند بتاع الرادياتير بيكون احيانا عنده واحد من رادياتير قديم ممكن تاخده ب 10 جنيه
عادل صباح الفل يا أستاذ عامل أية . أمبارح فهمت لية لما الكهربائى جة يركب الفتاح بتاع الفوجات شرخ فى الوش عارف لية ما أنا قايل لك بص أنت ركبت المجموعة بتاعت المفاتيح الاريعة كاملة لآ كنت تفك مفتاح الفوجات فقط دة بيتفك و يخرم فى مكان المفتاح فقط و يركبة حصل خير و أديك فهمت القصة و الصور أهية
السلام عليكم
ازيكم يا تمبراويه والله واحشنى جدا نفر نفر
اولا انا قرات كل اللى فاتنى واحب قبل ما اكتب لكم تقرير باللى عملته فى العربيه اسلم على حبايبى واخواتى فى المنتدى
بدايه ريم ونوفو
وزلبانى وهشام واسامه وجاليليو وخالد وعلى ومحمد واحمد وزاجووحسنى وموتورلى وياسر وكوهانا وعاطف واحمدميدو وهانى ونونا والناس الجديده كلها واى حد انا نسيت اسمه ليه عندى بيبسى ويسامحنى
بصوا يا جماعه انا من فترة كنت ناوى اغير الاكصدام الامامى وطبعا طالما اغيرة يبقى اغيرة بالفوجات وبالفعل رحت اشتريته بعد الفصال ب 350 جنيه بس انا غلطت غلطه وهى انى ما اتصلتش بهشام كان المفروض انى اتصل ب h وزلبانى والناس اللى ايديها فى الموضوع عشان اكيد كانوا هينبهونى لحاجات مش هاخد بالى منها وانا بشترى لانى مش عارف
المهم اخدت الاكصدام وبعد كده طلبت هشام وحكيت له فاول سؤال قالى جبت الفيش طبعا انا معرفش ان فى فيش للفوجات طبعا لازم يكون فى فيش امال هى هتنور واير ليس يعنى فقلت له لا ورحت تانى العزبه خدت الفيشه بحوالى 20 جنيه او 30 والله ما فاكر ورحت اركب الاكصدام الراجل لطعنى جنبه قالى نص ساعه واركبهولك النص ساعه جابت ساعتين واخيرا بدا فى الفك وبعدين التركيب وللاسف الشديد الاكصدام بيكون ليه من الاجناب فى الجزء اللى عامل زى الشنب جراب من جوه بيدخل فيه بكرة راكبه فى الرفرف هىه دى اللى بتشيل الاكصدام من الاجناب المهم لاقينا بكرة ناقصه مش موجوده والبكرة التانيه كل ما نركبها تفك فضلنا حوالى ساعه نحاول لحد ما الوقت اتاخر وانا زهقت لاقيت الراجل بيقولى بص انا هربطهولك بمسامير من الجنب وخلاص !!! طبعا انا اتجننت طب امال انا غيرت الاكصدام ليه ما كنت سبت القديم طبعا رفضت وطلبت منه يوقف الشغل على اساس انى اجى له الصبح ويكون فكر فى طريقه وحصل فعلا وركب الاكصدام بعد ما عمل حمالتين بصراحه كويسين جدا احسن من البكر وربط من الصدر وربط من تحت والعربيه بطلت تمسح فى المطبات والحمد لله سبت الموضوع ده لبتوع الحى وده كان الجزء الاول من الموضوع
وكفايه كده هكمل فى مشاركه تانيه عشان الحبر خلص
السلام عليكم
بعد ما ركبت الاكصدام طلبت هشام وسالته عن حد يوصلى الفوجات اصل الكهربائى بتاعى اساسا بتاع باب وشباك نجار يعنى
فقالى ان فى واحد يعرفه احمد وانا بصراحه ما قابلتش احمد قبل كدة بس كلمته اكثر من مرة وكان زوق جدا وده شجعنى انى اطلب منه يودينى للراجل بتاعه وبالفعل كلمته ورحب جدا وبصراحه ضيعت عليه اليوم بالكامل من العصر تقريبا الى العشاء وهو مربوط جنبى ما سابنيش فاسال الله ان جازيه عنى خيرا
اما الكهربائى بتاع احمد فده راجل زى العسل اولا لما تشوفه تحس انه مش كهربائى خالص راجل هادى وطيب وودود اول انطباع عنه انا قلت هيقلب العربيه مركب او بسكلته حاجه كده يعنى المهم طلب الاتى
2 متر سلك 3مم و 3 متر سلك 2 مم و10 كلبس بغطاء بسن و شريط لحام وطبعا رحت انا واحمد اشتريناهم ورجعنا
والراجل بدا الشغل وبالصدفه انا كنت شارى انا وهشام كتاوت اضافى فاخده وطلب انه يركبه لانه هيقوى النور فافقت وركبلى التوصيله ما خدتش فى ايده اكثر من نصف ساعه المشكله كانت فى تركيب الزرار اللى بيركب على شمال الدركسيون
مش عاوز اقولكم الراجل قطع قلبى تقريبا انا كان هيجيلى انهيار عصبى وهو عمال بيقطع بالكتر فى الفبر بتاع التابلوه كل ما يقطع حته تقريبا ال rpm بتاعى بيعلى وختمت بانه كسر البرواز اللى بيبات فيه المفتاح حتت صغيرة بس انا وقتها بدات اتخيل شكل المركب او البسكلته اللى انا هركبها عموما الحمد لله كل حاجه ركبت ولزقنا الاجزاء المكسرة بقى شكلها مش حلو بس مش وحش احسن من المركب
والراجل كمان ظبطلى النور وركبلى مرايه شمال بدل اللى كانت راكبه واخد 35 جنيه والطلبات ب 18 جنيه
والفوجات رائعه ماشاء الله جميله جدا وقويه جدا
والشكر كل الشكر لاحمد بيه اللى بصراحه ابن حلال ولو بنتى كبيرة شويه كنت جوزتهاله الراجل عمل معايا كل اللى يقدر عليه واللى ما يقدرش عليه كمان فاسال الله ان يجازيه عنى خيرا
مبروك يا عادل باشا والشباب هنا كلهم جدعان جدا
انا ما انساش ساعة المشكلة بتاعتي لما اسامه جه اخدني بالعربية من التحرير وهشام وعادل كانوا مستنيينا في العزية ربنا يديم المحبة والمعروف بينا دايما
السلام عليكم اخوتي التمبرويه --بصراحه وانا بقرأ المشاركات اكتر حاجه عجبتني مش الحاجات الفنيه الي الاخوه بيسألو فيها انما روح الاخوه والموده السائده في المنتدي وربنا يديم المحبه والاخاء بين كل الاعضاء وتقبلو فائق احترامي واخص بالشكر الاخ عادل والاستاذ هشام وزلباني ويوفنتتس وزيجو ههههه وكل الاخوه في المنتدي وشكراhttp://www.nilemotors.net/Nile/images/smilies/verygood.gif
المفضلات