الموضوع: فقت امتى

اعتقد انى فقت تماما على قصة الرسومات المسيئة للرسول يوم نشرت اول مرة من سنتين

كانت بالنسبة لى سببا فى التعمق فى دراسة امور كثيرة جدا فى شتى شئون الحياه، وادت الى تغير رؤيتى لأشياء كثيرة جدا كنت آخدها على انها مسلمات(بفتح السين وتشديد وفتح اللام) غير قابلة للنقاش

المشاركة الأصلية كتبت بواسطة noni67

انا فقت يوم وفاة اخى الصغير
لأننا كنا فى فرح احد اصدقائنا ليلا وروحته لحد باب البيت
والصبح وانا رايح شغلى فوجأت بأمى بتتصل بيا على المحمول بتقولى انها بتصحيه علشان يروح كليتة مش عايز يصحى
الموضوع ما استغرقش معايا اكتر من ربع ساعه لحد ما وصلت وجدت عربية اسعاف تحت البيت
طلعت طبعا جرى فوجأت بأمى مرمية على الأرض ووالدى بيبكى بمرارة ورجل الاسعاف بيقولى البقاء لله
ما صدقتش وجريت جبت دكتور اكد لى كلام المسعفين
طيب ليه وازاى قالى فشل تنفسى ادى الى فشل فى الجهاز الدورى ووفاة
من ايه ده اصلا جته وبيلعب كمال اجسام ولا بيدخن ولا حتى بيشرب شاى او قهوه
قالى قضاء الله
عايز اقول كلم الكام ده بقالة 7 سنين
ولحد اللحظة دى باحلم بيه داخل عليا زى عادته
او وهو بيتحدان يرفع عربيتة الجولف من على الارض
او وهو بيسبح زى الانش فى مطروح
كتير باحس انى مش مصدق وان هوه جى تانى
من يومها جالى السكر من الزعل وما بقتش مهتم باى شىء فى الدنيا لانى عرفت ان احنا كبنى ادمين ولا حاجه ممكن نموت فى ثوانى وكأننا لم نكن اصلا

you made my cry ...

انا طول عمري كنت عايش زي اي شاب عايش حياته الثانوية ثم الجامعيه
رحلات فسح تنطيط مش عارف ايه كل حاجه

ولكن كان دائما ليا نظرة تأملية في كل شئ البشر الكون الجمادات كل شئ
وكان ممكن اقف بالساعات علشان اتفرج على حاجه معينه وبتأمل فيها او في موقف معين

عالعموم

كان في خال صديق ليه ربنا كرمه وملتزم دينيا وهو برضه بسبب خادثة حصلتله كان في سالم اكسبريس وشاف الموت امامه

المهم سمعني شريط للشيخ محمد حسين يعقوب في وصف الجنه
سمعت الشريط
بقيت مستغرب
الكلام اللي فيه ده صح
طيب انا عارف انه صح
طيب انا مبفكرشي فيه ليه
طيب هيا الناس بتجري ورا الدنيا ليه
هما مش عارفين الجنه دي فيها ايه ولا عارفين ومش مهم عندهم

حسيت ان في حاجه غلط
وان اللي احنا فيه ده غلط
وكده مش هينفع وبما اني من متخذي القرارات الحاسمة والحمد لله
قررت اغيير ومكنش بإيدي خالص

كل ما في الامر اني كل شويه انزل اشتري كام شريط وقبل ما انام اسمعلي شريطين تلاته
وبدأ التغيير والله هو الهادي طبعا قبل كل شئ

لقيت نفسي بعمل حاجات انا مكنتش اتغيل اني اقدر اعملها من اساسه
وهو ده اللي اسمه يهدي الله من يشاء فعلا
لأن الواحد مكنششي مخطط لشئ خالص ولا بأيده ولا بقوته
انما انت ما عليك الا النيه السليمة مدعمه طبعا بفعل حتى لو صغير جدا وهذا يجعلك لا تستصغر اي شئ فيه نية صالحة ولا يوجد ما يسمى بقشور ولب في الدين

وعلى فكره السبب الرئيسي في الأستجابة ان الواحد انعزل عن المؤثرات الخارجيه من مفسدات وحاجات زي كده وتفرغ لشئ واحد وهو تنمية الدين والمعلومات فيه
وبدأ التغيير لأن لا يوجد ما يعوقه من مؤثرات خارجية

والله الهادي والحمد لله على نعمة الأسلام