هو أنا مفهمش قوي في معظم المشاكل المطروحة, و أعتقد ان اي شخص اي كانت مجالات خبرته أكيد مش حيفهم في كل حاجة, فلازم أول خطوة تبقى تشكيل لجنة من الخبراء لكل مجال من المطروحين على حدة تبقى مهمتها انها تدرس المشكلة أو الوضع المطروح و تقدم حلول عملية في أطار اللوايح الموجودة عشان متصطدمش بيها عند التنفيذ.
اللجان دي لازم تشتغل تحت اشراف مباشر مني و يبقى فيه مهلة زمنية محددة للأنتهاء من الخطط وهما كمان لازم أفكارهم تبقى قابلة للتنفيذ في أطار زمني محدد.
مفيش مانع اني أطرح تصور عن الحلول و اتناقش مع الخبرا بتوعي فيه:
يعني موضوع التعليم ده مثلا أنا متصورة انه أكبر من مسئول اقليمي ايا كان, لأن لازم من أوائل الحلول انه الأجور الخاصة بالمعلمين تزيد و ان المناهج تتحسن, و ده شغل وزارة التعليم. اللي ممكن المحافظ يساعد فيه انه يفرض رقابة مستمرة على المدارس, انه يقيم مسابقات بين المدارس في محافظته بحيث يبقى فيه تنافس بينهم, انه يدعم مجموعات التقوية في المدارس العامة من ميزانية الوزارة عشان تكون في متناول الطالب البسيط و يهتم بالاشراف عليها.
موضوع تشجيع الاستثمار ده برضه محتاج تشريعات و قوانين تخرج من سلطة المسئول المحلي, لكن مهم جدا لأي مسئول انه يحرص انه يزيل التعقيدات البيروقراطية اللي بتواجه المستثمرين و اللي كتير منها بيبقى من الأفراد نفسهم و تعنتهم في تنفيذ القوانين. كمان مهم قوي ان المسئول ده يكون عنده تصور لنوع الاستثمار اللي يفيد المنطقة بتاعته. يعني كمثال, لما تكون محافظة مثلا فيها اراضي كتير مش مستغلة و ممكن تستصلح و عنده نسبة كبيرة من السكان فلاحين و مشتغلين بالزراعة, يبقى هو المفروض يهتم باجتذاب رأس المال الي يستثمر في الزراعة, بحيث انه يستفيد من موارد المحافظة و يشغل الأيدي العاملة المتوفرة. لو المحافظة ساحلية مثلا ممكن يشجع المشاريع الخاصة بالثروة السمكية سواء أساطيل الصيد أو المصانع الخاصة بالتعبئة و التصدير و غيره. لو محافظة تصلح للصناعة بحيث انه متوفر فيها العمالة و قريبة من مناطق استقدام الخامات و كدة يبقى يشجع اقامة مصانع. المهم ايا كان نوع الأستثمار انه يدرس كويس مدى أستفادة المحافظة بتاعته من المشروع المطروح. يعني مثلا كلنا سامعين المسئولين المصريين طول النهار بيتكلموا عن تشجيع الأستثمار و رغم كدة لو بصينا على الأستفادة الفعلية حنلاقيها صفر. أولا لأن أغلب المستثمرين اللي بيقولوا عليهم دول بتلاقيهم بيتجهوا للاستثمار العقاري, و ده في حد ذاته مش وحش, انما المشكلة اننا بنلاقي ان المستثمر هو الوحيد اللي بياخد كل الاستفادة و مفيش اي استفادة حقيقية للبلد. يعني تلاقي الشركة واخدة الأرض برخص التراب و واخدة اعفاءات ضريبية و بنية تحتية ببلاش و و و, و في الأخر بتعمل مساكن بملايين و تكسب مليارات من الهوا, خصوصا ان أغلب الشركات دي بتاخد قروض من البنوك بضمان مشروعاتها, يعنى حتى السيولة المستخدمة مش بتضخها من جيبها. انما الصح انك حتى لو حتدى الشركات الأرض بأسعار رمزية لتشجيعها لازم ده يقابله استفادة للبلد نفسها. يعني ممكن تلزم الشركة ان نسبة معينة من المساحة دي تتبني للدولة ببلاش و تتعمل مساكن متوسطة, بحيث ان ممكن الدولة تقدر تستغلها في حل مشكلة تانية زي موضوع العشوائيات, بأنها تعمل اعادة تسكين للناس اللي في العشوائيات في الأماكن دي و ويتعمل أعادة تخطيط للعشوائيات.
موضوع ال social capital انا مش فاهمة يعني ايه.
موضوع البنية التحتية ده بقى من اهم المواضيع اللي لازم استعين فيه بخبراء في الهندسة ده اولا. ثانيا لازم يبقى فيه تنسيق بين الهيئات المختلفة اللي بتعمل الشغل. يعني ممكمن تتعمل خطة خمسية او عشرية مثلا لتطوير البنية التحتية للمحافظة, و تتنفذ على مراحل ممكن عن طريق تقسيم المحافظة لأحياء يبدأ الشغل بها على التوالى أو عن طريق تقسيم الشغل الي مراحل يعني مثلا شبكات الصرف الاول, بعدبن المية, بعدين الكهربا بعدين الغاز, بعدين الطرق........الخ. طبعا المهندسيين الأستشاريين هما اللي بيحددوا المراحل دي لأنهم ادرى ايه المفروض يتعمل الأول بحيث انه كل هيئة بتستلم المنطقة من الهيئة اللي قبلها و تكمل الشغل من غير ما تبوظ حاجة زي ما بنشوف دلوقتي. يعني بنلاقي مثلا ان المحافظة رصفت شارع معين و بعد كام شهر يجي بتوع الغاز يكسروا اللي اتعمل عشان يركبوا المواسير, و ده تهريج طبعا و سببه الرئيسي عدم التنسيق. طبعا كمان لازم الرسومات بتاعة الشغل ده يبقى معمول فيها حساب اي تعديلات أو صيانات محتاجة تتعمل في المستقبل, و دي حاجة أساسية بتتعمل في الدنيا كلها و ليها تصميماتها هندسيا.
موضوع العشوائيات ده انا رديت عليه في نقطة الاستثمار, باختصار اقدر اشوف مستثمر يعمل مساكن اقتصادية للناس اللي في العشوائيات دي مقابل انه ينتفع بالأرض بتاعت العشوائيات في مشروع استثماري.
نقطة رأس المال دي برضه مش واضحة قوي, بس بيتهيألي قصدك حيوفر رأس المال أزاي؟؟
الموضوع طبعا معقد بس هو مرتبط بشكل أساسي بموضوع الاستثمار. زي ما قولت لازم يكون فيه تشجيع للأستثمار بحيث انه المستثمر يكون بيضخ راس مال في مشاريع تفيد المكان مش بس تفيده هو. يعني لو خدنا مثال للمشاريع الزراعية مثلا, لازم يكون فيه مقابل مجدي للمحافظة من انها تدى للمستثمر حق انتفاع بقطع أرض معينة, يعني ممكن مثلا لو الأرض دي في الصحرا على حدود قرى معينة, يلتزم المستثمر انه يساهم في البنية التحتية للقرى دي. نفس الكلام قولناه في الاستثمار العقاري. طبعا ده غير ان الاستثمارات دي بتدخل دخل تاني عن طريق الضرايب.
النقطة الأخيرة How to deal with difficulties حلها هو للي قلته في بداية كلامي. لازم استعين بأهل الخبرة في المجال اللي بتواجهني فيه المشكلة, لأن من أهم اسباب تأخر بلدنا للأسف هو الأعتماد على من يظن انهم أهل ثقة بدلا من الأعتماد على أهل العلم و الخبرة القادرين فعلا على ايجاد الحلول. و ياريتهم حتى أهل ثقة, نقدر نقول أهل الولاء لأشخاص بعينهم!!
أنا رغيت كتير قوي مش كدة؟؟؟ يا ريت تقول لنا بقى انت مجال دراستك ايه؟