الموضوع: السليكتور سويتش / موضوع شامل / وحصري لنايل موتورز

[justify]بسم الله الرحمن الرحيم [/justify]
ملحوظه :الموضوع كله من اجتهادي الشخصي وغير مسموح بالنقل او الاقتباس الا بأذن شخصي مني
وارجو منكم الدعاء لي
نبتدي الموضوع

طيعا في الفتره الاخيره ظهرت مشاكل كتيير وشكاوي كتيير من السليكتور سويتش او بمعني اخر اعطال في الفتيس الاوتوماتيك غير معروف سببها علشان كده لازم نعرف ايه هو السليكتور سويتش

دلوقتي لما احنا بنيجي ندي اوامر للفتيس الاوتور (غيارات d .n .r )
عن طريق العصايه الاوامر دي بتتنقل للفتيس عن طريق واير مرتبط بالفتيس من جوه
طبعا الكونترول بتاع العربيه لازم يحس بالاوامر دي كمان وهنا ظهرت فكره السليكتور سويتش وهو عباره عن بورده بسيطه جدا بتعرف الكونترول وضعيه عصايه الفتيس ايه او بمعني اخر الغيار اللي واخده الفتيس ايه والسليكتور ده موجود فوق الفتيس ومرتبط بالعصايه وبالدراع بتاع الفتيس نفسه زي ما هنشوف في الصور
السليكتور لما يبوظ بيخلي الكومبيوتر بتاع الفتيس في وضعيه safe mode يعني الفتيس يبقي مانيوال كامل بس بدون دبرياج ويبقي الغيار ال d بدل الرابع وده لان الكومبيوتر مش بيبقي حاسس بوضعيه العصايه خالص
اعراضه
1-لمبه الفتيس تنور وتدي ايرور 56
selector switch in-correct signal
2-لمبه ال s تنور وتطفي او لمبه الفتيس تنور مجرد عصايه الفتيس ماتتحرك من مكانها حتي ولو العربيه مش دايره (يعني فاتح الكونتاكت بس )
3-لما تجيب ال dواي من اللمبتين منورين العربيه تمشي بس تبقي مكتومه (كأنك طالع علي الرابع بعربيه مانيوال )
سعره
السليكتور بيتباع استيراد ومش موجود جديد لانه بيعتبر جزء من الفتيس واغلب اللي بيبيعوه استيراد بيفكوه من فتيس يكون بايظ وحساساته سليمه يعني هيكون مفكوك من فتيس خلع وممكن يكون متصلح قبل كده كمان وبيتباع ب150 جنيه للفيكترا a والفيكترا b1 وب250 جنيه للفيكترا b2
نبتدي الشغل
الادوات المطلوبه
1-مفتاح 10
2-مفتاح 13
3-مفك عاده صغير جدا زي بتاع الساعات
4-مفك صليبه كبيره يكون مناسب للمسامير بتاعت السليكتور علشان ماتبوظش
5-بنسه ببوز
6-فرشه اسنان تكون خشنه شويه
7-لتر بنزين

خطوات العمل :-
نفتح كبوت العربيه
هنلاقي السليكتور علي ايدينا اليمين تحت البطاريه
[img2]http://img715.imageshack.us/i/34604170.jpg/[/img2]
علشان نفك السليكتور هنعمل الاتي :-
1-نفك قطبين البطاريه بمفتاح 10 السالب الاول وبعدين الموجب
2-هنرفع علبه الفيوزات اللي قدام البطاريه
3-هنلاقي مسمار 13 ماسك البطاريه في القاعده بتاعتها هنفكه
4-هنطلع البطاريه بره العربيه خالص
5-هنلاقي مسامير تثيت قاعده البطاريه في جسم العربيه هنفكها هما عباره عن 6 مسامير 13
هيبقي قدامنا السليكتور بالشكل ده
[img2]http://img502.imageshack.us/img502/2483/44714809.jpg[/img2]
6-هنفك الصواميل اللي عليها العلامات دي (اي صاموله تعصلج رشه wd 40 تفي بالغرض
هنلاقي الواير بقي لوحده والسليكتور لوحده بالشكل ده
[img2]http://img375.imageshack.us/img375/5053/11459120.jpg[/img2]
7-هنرفع السليكتور لفوق بشويش لغايه مايبقي حر الحركه
8-نمشي وراء الكابل اللي طالع منه لغايه مانلاقي الفيشه بتاعته
9-الفيشه لونها اسود في احمر وبتبقي تقريبا جنب قربه المياه لتحت (في الفيكترا بي )
10-هرفع الكليبس الاحمر بتاع الفيشه بمفك عاده رفيع ونفك الفيشه من بعض وهتبقي بالشكل ده
[img2]http://img814.imageshack.us/img814/1920/81343260.jpg[/img2]

11-هنسحب السليكتور بره العربيه خالص ونطلع نشتغل فيه علي رواقه
12-دي صوره للسليكتور كامل
[img2]http://img257.imageshack.us/img257/807/71167490.jpg[/img2]
ودي صوره للفيشه بتاعته
[img2]http://img192.imageshack.us/img192/1632/68216478.jpg[/img2]
ودي صوره للجزء اللي هنشتغل فيه
[img2]http://img808.imageshack.us/img808/2997/46463288.jpg[/img2]

خطوات التصليح بقي ودي المهمه
1-هنقلب السليكتور للوش التاني هنلاقي المسامير بتاعته 6 مسامير صليبه المسمار اللي يعصلج معاك فكه بالبنسه علشان ماتبوظش الراس بتاعته
http://img718.imageshack.us/img718/8633/86914376.jpg
2-هتلاقي السليكتور بقي جزئين بالشكل ده
البورده (شايفين كميه البراده والتراب اللي فيها )
[img2]http://img24.imageshack.us/img24/4577/81182545.jpg[/img2]
السلايدر (الجزء المتحرك) وده اغلب الشغل فيه
[img2]http://img18.imageshack.us/img18/629/72886743.jpg[/img2]
3-هنبداء بالبورده
4-هنستخدم بخاخه فيها بنزين (انا استخدمت بنزين 80 وكانت النتيجه هايله ) ونرش علي البورده وننضف بالفرشاه كويس ونكرر العمليه كذا مره لغايه ماترجع زيرو
وادي صورتها بعد التنضيف
[img2]http://img841.imageshack.us/img841/4531/50781682.jpg[/img2]
5-نيجي بقي للسلايدر زي ما احنا شايفين صورته عباره عن جزء بيتحرك علي جزء معدني ثابت
6-هننضف الجزء المعدني الثابت بالفراشاه والبنزين كويس
7-الجزء اللي بيتحرك هنلاقي فيه 3 رقائق نحاس صغيرين جدا ودول سبب المشكله واهم حاجه في لسليكتور كله هنسحبهم وننضفهم كويس ودي صورتهم
[img2]http://img12.imageshack.us/img12/1034/32945454.jpg[/img2]
8-تحت الرقائق دي هنلاقي سوستتين واحده عباره عن 2 متوصلين ببعض ودي صورتها
[img2]http://img828.imageshack.us/img828/1140/79945749.jpg[/img2]
والتانيه سوسته لوحدها
هنسحبهم بالمفك الرفيع ونحاول نشدهم علي خفيف لان اغلب مشاكل السليكتور ان السوست دي بتبقي ضعفت فمش بتخلي النحاس ده يلامس البورده
9-هنركب السوست والنحاس ونضغط علي النحاس كذا مره لقيناه بياخد ويدي معانا والسوست ارتفاعها حلو وهتلامس اليورده كويس نقفل السليكتور كويس
لقيناها برضه بتهبط تاني
نسحبهم ونحط تحتهم حته قصدير صغيره في المجري بتاع كل سوسته علشان نعليها شويه
ونجرب برضه
10-هتبص علي الفيشه بتاعت السليكتور قبل ما تقفل لو فيها حاجه مقطوعه او كده
[img2]http://img24.imageshack.us/img24/7061/34936562.jpg[/img2]
11-تقفل السليكتور كويس وتخلي بالك من الجوان بتاعه وتخلي بالك ان النحاسات التلاته راكبين في مكانهم
تربط مسمارين بس وتحرك الصاموله اللي فوق علشان تحرك السلايدر كام مره كده
وتفك تاني تشوف النحاسات التلاته في مكانهم وملامسين في البورده ولا لا
لو تمام يبقي تقفل خالص لو غير كده تحاول تظبطهم
12-تقفل السليكتور كويس وتنضفه من بره بالبنزين وتنضف السوكيت كويس بالبنزين والفرشاه
13-تركب السليكتور في العربيه ومتخافش سواء السليكتور او قاعده البطاريه او اي حاجه تاني مالهاش غير وضع واحد تركب فيه يعني مفيش حاجه هتركب غلط بأذن الله
14-توصل البطاريه وتجرب وتدعيلي
وكده نكون صلحنا السليكتور وعرفنا طريقه فكه وتركيبه
واي استفسارات انا في الخدمه

ياريت من المشرف يصغر الصور الكبيره في الموضوع علشان الصفحه تبقي مظبوطه