طرومبة المية وسير الكاتينا لانوس
السلام عليكم
يا شباب أنا معايا دايو لانوس 99 وكان عندي مشكلة إن مياة الرادياتر بتنقص جامد ورغم كده مؤشر الحرارة كان بينزل عن الطبيعي بتاعه ; رحت التوكيل اللي في أبورواش وقال لي عندك طرومبة المية والثرمستت عاوزين يتغيروا .
المهم غيرهم المية بقت مظبوطة ودرجة الحرارة مظبوطة وكله تمام
بعديها بـيوم كده بدأت احس إن العربية سحبها تقيل جدا ; وبحتاج ادوس بنزين جامد جدا عشان يادوب تتحرك ; وبقت تاخد وقت طويل عشان تدور ; وبعد ماقعدت اركز مع العربية لقيت إن في صوت طالع من عند سير الكتينا ; صوت كده زي ماتكون حاجة خشنة بتحك في حاجة خشنة
رجعت التوكيل قال لي إنت عندك سير الكتينا والبلية بتاعت الكتينا عاوزين يتغيروا ; رغم إن أنا كنت مغير السير والشداد من 10,000 كيلو
أنا عارف إن عشان يفك طرومبة المية لازم يفك سير الكاتينا الأول ; أنا سؤالي حاجتين :
* هل كان المفروض يغير سير الكاتينا مع الطرومبة ؟ أو يعني مشكلة السير دي حصلت بسبب إن اللي فك السير أول مرة ركبه غلط مثلا ؟
* ثانيا ; عاوز اعرف سير الكاتينا والبلية بتاعتهم يبقوا بكام ; هما قالولي في التليفون 600 جنيه بالمصنعية والضرايب ; هل ده سعر طبيعي ولا نصابيين ؟ أنا عارف إنه أكيد اغلى من بره عشان توكيل بس أنا حاسس إنه اغلى بـزيادة
ومشكورين مقدما