الحقيقة يا جماعة انا عمري ما تدخلت فى تقييمي ... لهذه العربيه ... سواء فى منتدى كونتكت ... أو هنا بعض أنضمامي ... عالماً ... أنه كيف أبدي رأييى فى شيئ لم أستعمله ... ولم أجربة ...

المهم أخيراً ... ركبت العروسة الأسبيرانزا ... أمبارح بالصدفه البحته ... أحد زملائي فى العمل من مالكي الأسبرينزا ... لونها أسود... جاله سفرية عمل بره مصر ... فجأة ... فكل اللي عمله ... عدى عليا فى المكتب ... وأداني مفاتيح العربية ورخصتها ... وقالي هو راكنها فيين ... وقالي أتصرف أركنها فى مكان جيد ... وغطيها علشان الشمس ... مع أن زميلي ده مدير كبير أد الدنيا ... بس الحقيقة لما يكون الباركينج ... بتاع العمل ب 400 جنيه فى الشهر ... يبقى نركن فى أبو بلاش ... ما علينا ...الراجل سابني وسافر ...

أغتنمت بالطبع الفرصة ... وقلت أخيراً ... العربية جت لحد عندي ... بعد ما خلصت الشغل ... نزلت علشان أخدها أركنها فى حته كويسه وأغطيها حسب طلبه ...

وده بقى تقييمي للعربيه ... بعد أول مرة تجربه ... لمده عشرة دقائق ....
1- العربيه واسعة ... وهوه حاططلها فرش جلد طبيعي بيج ... الحقيقه مدي فخامه للعربيه ...
2- صوت الموتور عالي ... عالي ... والعزل بتاع الكابينه ... مش أد كده أنا كنت ... بتهز من صوت الموتور :)
3- السحب بتاع العربية ... حلو جداً ... مع أعترافي أن الفتيس ناشف شويه فى النقلات ... والمارشيدير ... تقييل أوى وصعب ... (بس ممكن ده علشان أول مرة)
4- العفشة ناشفه جداً ... فى المطبات ... ولم أشعر بالعيب المشهور اللي سمعت عنه ... بتاع علبة الدريكسيون ...
5- التابلوه أضائته جيده جداً ... الكاسيت روعة ... أحلى حاجة فى القنصول عاجبتني ...
6- التكييف ... جيد ... سقع العربية فى مدة العشر دقائق اللي ركبتها فيها ...

أما بعد ... أحب أقولكم أنا مش مقتنع تماماً بالصناعة الصينية ... ولا المنتجات الصينية ... وبالذات لما تجتمع المعادلة دى ... سيارة صيني + تجميع مصري ... من الأخر أنا كنت عارف وأنا نازل أركبها ... ومع اللي سمعته ... أني هلاقى بلاوى فى العربية ...

إنما لا أخفي عليكم ... حقيقي ... مستوى العربيه فعلاً ... حلو ... ومن الأخر ... كونت رأي ... يا رب ما يزعلش حد مني ....

العربيه دى هايله بفلوسها دي ... يعني العربيه دى فعلاً ممتازه بالسعر ده خاصة وأنا سامع أنهم بيحاولوا فى التوكيل يحلوا المشاكل ...

خاصة لو وضعت فى مقارنة مع ما يماثلها فى السعة اللترية والسعر فى مصر ... العربيه الشاهين اللي اتوقف أنتاجها ... أكيد الأسبيرنزا أحسن كثيير ...
أو الفيرنا ال 1600 ... اللي أعتقد أن بكل منهم عيوب ... ومميزات ... تطغي عن الأخرى ...

تحياتي للجميع ...

م/ حسام منير