الحمد لله أشتريت السانديرو الكاملة النهاردة - برجاء المساعدة

**amrezzat82** · 19-12-2010 04:53 PM

باركولوا يا وحوش أنضمت رسمي لللوجانونية
أخذت أخر حتة سانديرو فيراني فول أوبشن عند محمد زكي و أستلمتها

بكرة أنشاء الله أخذ جواب المرور

عايز مساعدتكم فى شوية حاجات

- أيه أفضل شركة تأمين (المهندس و لا مصر للتأمين) و فى ناس قالتلي إن واحدة فيهم مش بتصلح عند التوكيل
و المفروض أيه الإجراءات
- أجيب دواسات نظيفة منين؟ (من عند محمد زكي بيجي 150 جنيه)
- أجيب طفاية منين؟ و المفروض كم كيلو؟ و بكم؟
- أجيب غطاء وتر بروف منين؟ (من عند محمد زكي بيجي 150 جنيه)
-أركب لها إنذار و لا لأ؟ و فى التوكيل بكام؟ و لو برة بكام و عند مين؟

معلش طولت عليكم

**hragheb007** · 19-12-2010 09:31 PM

ألف مليون مبروك يا باشا و ربنا يباركلك فيها و يديك خيرها و يبعدك عن شرها

أنا مش هقدر أجاوبك إلا على حاجات بسيطة لحد أما الوحوش ييجوا

بالنسبة لشركة التأمين أنا شايف إن أفضلهم مصر للتأمين و اللى بعدها على طول قناة السويس للتأمين

أما الغطاء الووتر بروف فكان فى وحش من الوحوش كان قايل أنه موجود فى التوكيل بس كان للوجان ب 175 جنيه

و عن الإنذار أنا شايف أنه المفروض أول حاجه تتعمل بعد الترخيص أن شاء الله لأنه مهم جداً

باقى الحاجات مش هقدر أفيدك فيها مبروك ليك يا باشا مرة تانيه و ربنا يبعدك عن شرها و يديك كل خيرها

**A.Saad** · 19-12-2010 09:37 PM

الدواسات النظيفة من مارسو فى التوفيقية او ش دمشق او المصنع فى الوايلى
مبروك
انت جبت من اى فرع فى محمد زكى

**devilishtigers** · 19-12-2010 11:09 PM

الف مبروك وربنا يديك خيره ويكفيك شرها

**Lord_Fouad** · 20-12-2010 12:46 AM

الف مبرووووووووووك و ربنا يديك خيرها و يكفيك شرها

بالنسبة لي انا امنت مع مصر للتأمين لأني مكنتش عارف الفرق .. مشيت بمبدأ "هذا ما وجدنا عليه آباءنا" .. دة طبعا التأمين الاجباري

الدواسات اخدتها هدية من المعرض (الميكانيكيون العرب) قلت اخليهم لحد ماجيب اخرهم و بعدين اشتري جديد

الطفاية من المرور .. هتلاقي كشك للطفايات و كشك للمثلث و شنطة الاسعاف .. الطفاية بـ 121 جنيه .. و المثلث + شنطة الاسعاف تقريبا بـ 73 جنيه

الغطاء .. انا جبت غطا من محل في العاشر من رمضان خامته ووتر بروف من برة و من جوة زي الوبر كدة .. المقاس الكبير عامل تقريبا 150 جنيه

الانذار ناوي اركبه بس لسة مش فاضي له و مستني ردود باقي الوحوش

و مرة كمان الف مبرووووووووووك