الموضوع ان حصل النهارده معايا حاجة غلسة اوى

من فترة و انا زهقان من الشغل و حاسس بملل و ضغط نفسى و مش قادر .. اخدت اجازة و قعدت مع نفسسى و قعدت اتكلم ايه اللى جرى فى الفترة اللى فاتت ؟
هل الشغل اتغير؟؟ .... لا
هل زادت حاجة عليا فى شغلى ؟؟ ... لا
هلالمديرين اتغيرو او حد بقى بيعاملنى باسلوب مختلف ؟؟؟ .... لا

طب ايه اللى حصل ... مش عارف
استعذت بالله .. و قررت انى ارجع زى الاول نشيط واعامل الناس كويس و ابتسم فى وش العملاء و ابقى تمام التمام

و فعلا روحت النهارده الشغل و كلى حماس و مقرر انى مش هكشر و لا هتضايق و لا اضغط على اعصابى و لا حاجة

و فعلا بدات اليوم جميل و ظريف و الناس مبسوطة و بهزر مع الناس و حاجة اخر تمام
على الساعة 3 مثلا جالى واحد معرفش ازاى قدر انه يستفزنى لدرجة انى كنت فعلا ممكن اتصرف بغباء شديد معاه لكن بسرعة قومت من مكانى و كان مديرى بيكلمنى و صوتى كان بدأ يعلى .. بس الحمد لله انى قومت قبل ما انفجر

المشكلة بقى ان احنا فى اخر السنة دلوقتى و التقارير اللى بيعملوها المديرين عن الناس اللى تحتهم ميعادها اليومين دول

و افاجئ بان التقارير دى هتتعمل بكرة

يبقى الواحد ماشى كويس طول السنة و مفحوت و فى يوم واحد كل الحاجات الكويسة اللى كانت بتتعمل تتنسى و يبقى فى عقول الناس الصورة الاخيرة ... انى اتخانقت مع الراجل

انا دلوقتى مش عارف اعمل ايه
لا حول و لا قوة الا بالله