الموضوع: معقولة الاتوماتيك ماتتجرش ?

المشاركة الأصلية كتبت بواسطة Dr_ahmedrady

الحقوني
انهارده اول مره اعرف إن الاوتوماتيك مينفعش تتجر لو عطلت ع طريق .

طب والحل
في ناس قالولي اي حد ميكانيكي هيشيل حاجه منها فيلغي الاتوماتيك و تتسحب عادي , بس هل ده ميضيعش الضمان?

ياخوانا حد يشرحلي , لو الاتوماتيك عطلت ف الطريق و بعيد عن ميكانيكي اعمل إيه?

حاضر حاضر

الاعضاء افادوك و اليك القصه من الاول

زمان انا و انت و معظم حبيسي العربيات المانيوال كنا نسمع عن العربيات الاوتوماتك الوحشه دي انها لما تعطل يا حرام صاحبها يقعد جنبها ايده علي خده و الدمعه هتفر من عينه و هو شايف اخواته في الشارع اصحاب العربيات المانيوال اللي لما تعطل يزقوها و يمشو تاني

حاجه كده زي جحا و الحمار و ابن جحا

ده انا كنت ببقي فرحان اني راكب مانيوال و عارف القاعده الشهيره

العربيه تعطل هانزل ازقها

طيب و العربيه لما بسلامتها تعطل بتعطل ليه و ايه اللي بيخلي الزق يمشيها؟؟

و العربيه الاوتوماتك لما تعطل ايه اللي بيعطلها و ليه مش بتتزق؟

بالنسبه للمانيوال العربيه ممكن تعطل لاسباب كتير اعرف منهم حبه و الباقي لا

نمسك شويه في اسباب تعطل العربيه الاوتوماتك و اسباب عدم قدرتها علي التحرك

طبعا غير الاعطال العاديه بتاعه اي عربيه الاوتو بيفرق ان نقل الغيار مسئوليه الجير بوكس و البطاريه

لو البطاريه نامت مش هينفع العربيه تدور بالزق

لكن لو حبيت تزق العربيه او تحركها من مكان لمكان فالمفروض تفصل الغيار و تمور الفتيس N

و في حبيبتنا الصني في زرار جميل اسمه shift lock break لونه احمر تدوس عليه و تقدر تحرك الفتيس زي ما تحب

(نصيحه علي ذكر الموضوع, لو راكن موازي للرصيف خلي العربيه مموره دايما علشان لو حد من اللي بيلاقو رخصهم في اكياس الشيبسي كان راكن وراك او قدامك فممكن يقعد يبوس في العربيه لحد ما الجير بوكس مره في التانيه يزعل من كتر البوس ده و يعلن تمرده عليك)

طيب نرجع للموضوع تاني

امتي احقر بطاريه في مصر بتسلم نمرها؟

سنه مثلا ده لو انت مش مهتم لا بالبطاريه ولا بالدينامو ولا بتاخد بالك من علامات ضعف البطاريه
او من هواه ترك العربيه تنور الشارع و انت راكن لتاني يوم الصبح !

لو الموضوع عامل ليك قلق كبير و خايف منه بجد

خلي معاك كابل توصيل الكهربا في شنطه العربيه احتياطي

انا عن نفسي عملت كده بعد ما البطاريه عملتها معايا مره علي طريق السويس
(كانت البطاريه عايزه تفارقني و انا كنت متمسك بيها لاسباب ماديه قصدي عاطفيه و عملت فيها عنتر و نزلت اشتري حاجه و سبت النور و الفلاشر شغالين , و طبعا انك تاخد وصله بطاريه علي طريق سفر بالليل حاجه و انك تدور علي كابل و حد يوصلك حاجه تانيه خالص)

و بالمناسبه بعد ما غيرت البطاريه و بشوف ناس بتزق و طالع عينها كنت بحاول اعرض عليهم اني اوصل ليهم كهربا بالكابل

و ياريت اللي معاهم مانيوال يفكرو جديا في اقتناء الكابل ده مش غالي قوي يعني (النضيف حوالي 70-80 جنيه) و بدل لما البطاريه تنام تدور علي حد يزق و ترمي مره و اتنين اولاني تاني و مارشدير كمان, توقف اي عربيه و تمد ايدك لاحشائها زي اي جراح مخ و اعصاب و تقوم بالعمليه ببساطه شديده