الموضوع: انا مدايق

السلام عليكم ورحمه الله و بركاته
طبعا المنتدى الجميل ده كنت بفضفض فيه لأى احتمال مشكله الاحظها فى عربيتي فى قسم الورشه
بس دلوقتى لما عرفت ان فيه قسم اجتماعى قولت احط مشكله مدايقانن انا شخصيا ( و اهه يبقى المنتدى فيه مشاكل العربيه و صاحبها كمان )
باختصار اخت مراتى بنت عندها 30 سنه و هى اخر اخت ليها ما اتجوزتشى رغم اخلاقها و جمالها (زى معظم البنات دلوقتى ) و البنت دى بعتبرها اختى بجد و نتيجه لأستعجال حماتى على جواز البنت لاسباب ( الخوف من فوات قطار الزواج , الحاله الصحيه المتدهوره باستمرار لحماى و يلحقو يجوزو البنت قبل وفاته ) خليتها تتدبس فى خطوبه فاشله من شخص دون المستوى رغم اعتراض الجميع حتى العروسه نفسها و الحمد لله اتفسخت الخطوبه بعد 3 اشهر بس.
وبناء عليه كنت بدورلها على عريس مناسب قبل ما حماتى تدبسها فى جوازه فاشله تانيه و تبقى حكمت على البنت طول حياتها
و الحمد لله فى خلال الفتره اللى فاتت دى كنت اتعرفت على زميل ليا فى العمل على دين و خلق ولكن عيبه ان مستوى اهله الاجتماعى قليل اوى
و خليته يشوف العروسه و حصل قبول بس كان ليه بعض التحفظات عليها لأنها اكبر منه بسنه ونصف و اقنعته بعدم اهميه التحفظات دى و انه ياخد اول خطوه و يجيب اهله و يروحو يزورو العروسه فى بيتها
و فى الزياره دى فوجئت ان والد العريس فاتحهم فى طلب الجواز و اتكلمو فى التفاصيل بتاعت الجواز و الطلبات و خلافه
و حصلت مشكله و مشاده فى الكلام بين حماتى و ووالدة العريس ( لأن العريس عنده شقه فى مدينه بدر و العروسه عندها شقه فى عين شمس و حماتى عاوزاهم يتجوزو فى شقه عين شمس علشان تبقى جنب بنتها و المواصلات سهله من هناك و ام العريس عاوزة شقه بدر علشان يبقو عايشين فى شقه الراجل مش فى شقة الست - شغل حموات بقى ) لدرجه انى تصورت ان حماتى رفضتهم و بتللك

و الحمد لله تم احتواء الموقف و تهدئة و الفضل يعود ليا بعد الله سبحانه و تعالى
غير برضه ان تدخلى ساعد حماى على تقبل العريس و اهله ... لأنه كان مقلق منهم لأن والد العريس اصر بشده ان من اول زياره يقرو الفاتحه رغم المشاده اللى كانت بين الحموات دى واللى بجد كانت حتنهى الموضوع ساعتها !!!
و تدخلى برضه خلى حماتى تحس بأنها قست جداا عليهم فى اول مقابله و اقنعتها أنها تعزمهم علشان يصفو النفوس و اى رواسب بينهم ... و ده تم بالفعل و حرصت حماتى و العروسه نفسها انى احضر العزومه دى تحسبا لأى خلاف يحصل علشان اتدخل و اهدى الجو
المهم الحمد لله بعد العزومه دى كان العلاقات فى افضل حال و النفوس اتصافت بشكل كبير

اللى دلوقتى مدايقنى انى عرفت ان العريس و العروسه بقو يدارو اخبارهم عنى زى اى حد غريب ... رغم انى كنت حاضر الموضوع من اوله خالص حتى الاتفاق على الشبكه و التكاليف و خلافه كنت فيها و من البدايه انا اللى عرفتهم على بعض

خاصه انى عرفت من حماتى بشكل غير مباشر (ان العريس) قرر تعجيل الجواز و تبقى شبكه و وكتب كتاب و دخله فى شهر 2 و طبعا العروسه وافقت ( زى اى بنت فى المسائل دى) وبالفعل نزلو مع بعض يشترو الحجات اللى نقصاهم اول امبارح - بس لاهو و لا هى قالولى رغم ان بالمصادفه اتصلت بالعريس فى الوقت اللى كانو فيه بيشترو الحجات ... بكده يبقى حيتجوزو بعد شهرين و نص من معرفتهم لبعض ( هما اصلا اول مره يشوفو بعض كانت فى اول 12 و بكده كل علاقتهم لاتتجاوز 22 يوم اصلا لغايه دلوقتى )

... الوضع ده طبيعي لو كانت العلاقه اللى تجمعنى بيهم بعيده و حقهم انهم يخبو قرارتهم عنى
لكن العريس زميلى فى الشغل و على المكتب اللى جنبى ... و العروسه اخت مراتى و بعتبرها اختى بجد و المجهود ده عملتو علشانها هى اصلا مش علشان العريس و من الاخر برضه انا شايف ان الموضوع ماكنشى حيتم لولا تدخلى المستمر
اللى صعبان عليا انى بالفعل بذلت مجهود كبير فى انى اوفق بينهم و انى اخلي االعريس يشوف العروسه من البدايه اصلا و انى اخلى اهل العروسه يتجاوزو عن العيوب اللى موجوده فى اهل العريس و فى العريس نفسه خاصه ان العريس نفسه ساذج اوى فى المسائل الاجتماعيه دى

هل انا محق فى زعلى و لا ايه ؟؟؟
انا عارف انه موضوع منتهى و مافيش فى ايدي حاجه اعملها بس بجد انا حاسس بغصه و مدايق
و اسف على الاطاله

المشاركة الأصلية كتبت بواسطة wesam_salom

والحمد لله انك بعيد علشان تقدر تشوف الموضوع احسن من بره وتشوف لو فيه حاجه ممكن تنهى الموضوع تقدر تنبههم كطرف محايد من غير ما حد يعتبرك طرف فى الموضوع

انا كان ده اسلوبى فى الفتره اللى فاتت لما الواد زميلى كان بيقولى فكنت بنبهه علشان اخطائه اللى تخرب الدنيا ...بس دلوقتى هو عزلنى عن الموضوع و بالتالى ماقدرشى اقوله حاجه لو عرفت من بره

المشاركة الأصلية كتبت بواسطة ahmed2y

الشباب ردو عاليك وقالو كل الى يمكن يتقال

بس انا عاوز اقولك على حاجة تانية يا راجل ريحوك بلا وجع قلب انت عملت الى عاليك واكتر بكتير كمان خلاص بقى سيبهم يشبعو ببعض الناس مبيجيش من وراها غير وجع القلب دا بركة يا راجل انهم عملو كدة

وتقبل تحياتى

ياروقانك هههههههههههههههه
والله عندك حق