الموضوع: أسترا انجوي - Test Drive

متشكر جدا يا جماعة لكل الردود
اما موضوع التقصيرة تاني :

حكاية ان الفتيس بينظم "معدل نقل السرعات تبعا لأسلوب القيادة" فالمقولة دي مطاطة شوية .
* الفكرة في عدد دورات الموتور اللي بينقل عندها لمجموعة الحركة التالية (و ليس سرعة النقلة نفسها) . و للعلم اي فتيس اوتو بيعمل كده لو قرصت عليه بيأخر النقل ولو ماشي بالراحة بينقل بدري .

* أنا جربت اكبس بنزين (رياضية رياضية يعني) و الrpm يا دوب عدى 4.5 و هوووب .....كأنك دوست فرامل خفيفة لمدة ثانية كده و بعدين نقلت التاني و انطلقت بتسارع ممتاز .

* بعد كام لفة كده صاحب العربية دربني على تلافي التقصيرة دي ...ازاااي ؟؟؟
دوس بنزين ....تسارع تسارع تسارع 4.3.2rpm. و انت طالع على و نص ....ارفع رجلك (و كأنك هاتنقل مانيوال تمام) و في نفس زمن نتشة المنيوال اكبس بنزين تاني (يعني الفرق بين رفع الرجل و اعادتها يادوب ثانية او اقل ) مش هاتحس بتقصير و لكن بنتشة رياضية جدا و هاتشوف تسارع يعجبك

* المشكلة ان التركيز او التعود مش هايريح اللي فاكر ان العربية اوتو و مش غاوي جري .

* موضوع تسقيط النقلة من الرابع للتاني :
طبعا لازم تعدي على التالت بس نظريا فقط - لأنك هتخبط عصاية الجير لورا مرتين متتاليتين تلاقي نفسك على التاني

و تحت امركم

السلام عليكم..
معلش انا اسف اتأخرت شوية في الرد وده عشان مكنتش ف البيت اليومين اللي فاتوا دول..
اولا. احب اشكر صديقي مصطفي باشا فاروق.. الراجل ما شاء الله عليه قمة في الادب و الاخلاق و الذوق.. ربنا يكرمه ويوفقه. ثانيا احب اباركله علي العربية وانها ما شاء الله تقريبا زيرو.. ربنا يباركله فيها و يكفيه شرها..
ثالثا.. علي كلام شاركي كمان.. احب ابارك لمضطفي علي الفرش اللي ركبه.. واللي انا لأول وهلة وافتكرته فرش المصنع..
ما شاء الله فيمنتهي الجمال و الدقة في التصمبم والتفصيل..
نيجي بقي لتقييم شخصي بعد تجربة العربية..

أولا رأيي في العربية من جوة..بصراحة انا شايفها من جوة عادية.. مش في منتهي الشياكة ولا وحشة.. لأ هي احلي من عربيات تانية كتير.. بس برضه في اشيك من كده.. جايز برضه انا ملقتش اشوفها كويس قوي بس يمكن عشان كل حاجة متجمعه في اماكن صغيرة.. ادتني ايحاء بكده..
كل حاجة متجمعه ازاي هاقولكم..
يعني معظم معلومات العربية بتتعرض علي شاشة المعلومات اللي في نص التابلوه..وده مخلي العدادات شكلها في منتهي البساطة و يمكن حسيت من كده انها فاضية شوية كمان..
بس بره هارجع واقولكم اني مركبتش العربية كتير وكمان مكنتش مركز في شكل التابلوه و العادات قوي..
انا كنت مركز اكتر مع الفتيس والنقلات و الحاجات اللي كان يهمني قوي اني اجربها واعرفها كويس..
نيجي لحاجة تانية.. الا وهي ان فرش الابواب مش اجبني بصراحة.. واقصد بيه مسند الباب و المكان اللي فيه الاكرة.. و المقبض اللي باقفل منه الباب..و مكان زجاج الكهربا.. وده رأي شخصي ممكن يتوافق مع رأي ناس و ناس تانية تبقي مش شايفة كده..
نيجي للدركسيون اللي مكسو بالجلد فهو في منتهي الشياكة.. والمالتي فانكشن جامد قوي.. وان كنت مش فاكر اللي علي الشمال بيعمل ايه.. انا فاكر انه البكرة بتغير منها المعلومات اللي علي الشاشة بس مش فاكر بصراحة الازرار بتعمل ايه..
نيجي بقي للفتيس الايزي وده من الحاجات اللي انا معجب جدا بالعربية بسببه..
هو انا عندي نقطة سلبية..واحدة بس..
مع النقاط الايجابية الكتير وهي ايه بقي النقطة دي..
اني دلوقتي ماشي بالعربية.. وبعدين لقيت قدامي الطريق قفل شوية باهدي مش محتاج اني افرمل بس مجرب بارفع رجلي من البنزين.. ولو كنت انا فوق مستوي نقلة معينة.. اوتو بتنقل علي النقلة الاعلي.. وبالتالي لما احب ازود تاني بتبقي علي نقلة اعلي وبتاخد شوية وقت علي ما بتتسارع في النقلة الاعلي او تنزل للنقلة الاقل..
مثال عشان انا عارف اني لخبطتكم شوية..
يعني انا كنت ماشي علي التاني,, و بعدين داخل علي شوية زجمة.. فهديت باني شيلت رجلي من علي البنزين.. ولوحدها هي نقلت علي التالت.. وبعدين الطريق فتح شوية فحبيت اقرص شوية عشان اطلع من الزحمة.. اخدت وقت شوية علي ما التسارع بتاع التالت حصل عشان كان علي ار بي ام واضي. وعلي ما نزلت للتاني اخدت شوية وقت.. بس كده.. دي النقطة السلبية اللي عندي.. وانا شبه متأكد اني حسيت بككده عشان اول مرة اسوق ايزيترونيك.. وكمان عشان مسوقتش اوتو من زمان..
نيجي بقي للنقل
ة اللي شاركي قال انها كلمة مطاطة شوية.. انا اقصد معني الكلمة..
وهو ايه..؟؟ انك دلوقتي ماشي سواقتك هادية.. تمام لما تيجي تنقل العربية بتاخد وقت شوية طويل علي ما تنقل..لكن لو انت قارص علي العربية و بتجري بيها او علي ار بي ام عالي.. الاستجابة بتاعتها في النقل.. سرعة النقل يعني بتكون اعلي.. بتنقل اسرع.. ارجو اني اكون عرفت اوضح وجهة نظري.

نيجي بقي لزرار السبورت مود او القيادة الرياضية..
فده واللي انا فاهمه انه لما باشغله.. العربية مش بتنقل غير لما توصل لأر بي ام علي.. عشان تطلع اقوي عزم و تسارع للعربية.. و كمان اكيد ده بيفرق في سرعة استجابة الفتيس في النقل.. نفس النقطة اللي كنت باوضحها لشاركي..
انا عن نفسي لم تتح لي الفرصة لتجربة النظام الرياضي.. بس ان شاء الله هاجربة قريب.. بس في التست درايف بتاعت التوكيل ان شاء الله.. عشان العربية اللي سوقتها بتاعت واحد حبيبي.. و ممكن كان يتضايق لو حبيت اجربهاز عموما ممكن اقوله يجربها هو ويقولنا..
في حاجة تانية عجبتني قوي..
في العربية زرار كنب الفتيس عليه علافة شبه بتاعت التكييف..انا افتكرتها الاول التكييف فعلا.. بس اللي صديقي قاله انه بيشغل حاجة انا مش عارف اسمها وهو مش فاكره هو كمان.. وده بنشغله في حالة الارض فيها زيت او ارض مزحلقة.. بيحافظ علي ثبات العربية و يمنع الانزلاق..
يا ريت يا جماعه اللي عنده معلومات اكتر يقولنا ايه النظام ده عشان انا بصراحة مش عارف..

بالنسبة لمساجة العربية فتعتبر صغيرة.. يعني محستش بفرق مساحة كبير بينه وبين الكرسا بتاعتي. و الشنطة مساحتها معقولة..
موضوع مسند الذراع فعلا احمد سامي عنده حق.. بس بيتهيألي ان غرضة الاساسي وده اللي انا بايتعمله فيه انه اسند عليه مش اشيل فيه حاجات.. التابلوه و الدرج بتاعه واسعين قوي و ممكن اشيل فيهم اي حاجة..
موضوع حامل الاكواب بايخ جدا فعلا.وفي حاجة تانية كمان مصفي فاروق قاللي عليها ان الشمايات مفيهاش مرايات.. ودي ممكن تكون حاجة بايخة بالنسبة للبعض..
الجنوط نضيفة قوي و الدليل ان في فردة كاوتش ف العربية اللي سوقتها فيها بالونة او بيضة زي ما البعض بيسميها و الجنط زي الفل ولا فيه اي عوجة و ده عيب الكاوتش اللي سمكه قليل شوية.."55 يعني" بس عادي مش كتير لما الواحد بيلبس بلاعات او خفر من النوعيه اللي تعوج جنط او تبوظ كاوتش..
"ولو اني انا حصلت معايا مرتين اهو اول ما جبت العربية من 3 شهور.. بس انا واحد باعترف اني حظي صعب شوية وكمان الطرق اللي بامشي منها وحشة.. وكمان في اماكن ممكن اول مرة امشي فيها بيبقي بالليل ودي حاجة سيئة"

النظام الصوتي معقول جدا.. صوت الموتور نفسه لما الواحد بيقرص علي العربية شوية في منتهي الجمال رياضي و ممتع قوي..
بس ده رأي الباب لو حد كبير هيقولك صوته عالي مزعج..ودوشة وكده..
بس غير كده انا تقريبا مش شايف ان في اي حاجة تانية..
وبرضه ده مش هيغير من رأيي انها بقت واكتر من الاول.. المرشحة نمرة 1 عندي لما اشتري جديد ان شاء الله..
معلومة عرفتها بالصدفة.. الكورسا برة في منها فيها تقريبا نفس امكانيات الاسترا او اقل شوية ممكن و برضه ايزي ترونيك و 1200 سي سي و احتمال تنزل مصر قريب..
بس العربية دي او نزلت بيتهيألي انها سعرها مش هيقل عن 120 الف وده سعر يعتبر مبالغ فيه شوية للعربية
ي وبرضه نفس سعر المازدا 2 و البيجو ال207 وانا شايفه سعر عالي شوية.. وبرضه نفس فئة سعر الايبيزا الجديدة ولا السويفت و الحاجات دي.. اللي انا شايف ان فئة سعرها المفروض تبقي في حدود ال80 الي 90 الف.. ومتعديش ال100 بس هنقزول ايه بقي.. السوق المصري غريب وكل حاجة بتغلي مع انخفاض يعر الدولار و الاسعار العالمية..

اسف جدا علي الاطالة و اتمني اني اكون عرفت اوصف تجربتي كويس..

اووووووووووبس.. معلش انا اسف الرد طلع طويل جداااااااااا
بس معلش انا انهمكت في الرد و ماخدتش بالي من الطول..
انا اسف جدا تاني معلش
اعذروني
لما بافتح في موضوع مش باعرف اسكت غير لما اخلص..

المشاركة الأصلية كتبت بواسطة sharky

تقرير واقعى جدا و يتميز بالدقة فى المعلومات و أنا موافقك عليه 100%
لإنى جربت عربية حبيبى مصطفى فاروق على السريع و ربنا يبارك له فيها بإذن الله و الف مبروك على الفرش يا مصطفى

يا شركي شكراً ليك جداً ،الفرش فعلا كويس ولزم تشوفو.
بجد إنت جدع جداً. أنا فعلاً حبيت رينو من شركي وكنت حشتري ميجان بس النصيب. الحمد لله، الالماني بردو بيفرق.

المشاركة الأصلية كتبت بواسطة Ahmad Allawy

اووووووووووبس.. معلش انا اسف الرد طلع طويل جداااااااااا
بس معلش انا انهمكت في الرد و ماخدتش بالي من الطول..
انا اسف جدا تاني معلش
اعذروني
لما بافتح في موضوع مش باعرف اسكت غير لما اخلص..

يا سنيور أحمد، خد ووقتك كولو في الكتابة، الروم بتاعت اوبل محتجالك.
الحمد لله أنا إتشرفت بمعرفة شخص محترم زي أحمد.