أجبلك منين فكة تعريفة.........الموارد المهدرة >>>>>>>.وجهة نظر

**د.أحمد السعيد** · 22-12-2010 07:54 PM

تقعد مع الناس الكبار اليومين دول يقولك

ياااااااااااااااااه فين أيام زمان أيام الخير والعز كان الدنيا حلوة والأسعار منخفضة

والأشية معدن

كان الواحد يروح للبياع بالتعريفة البياع يزعق معاه ويقول

أجبلك منين فكة تعريفة

تعالوا مع بعض نحسب شوية حسابات بسيطة لبعض الموارد المهدرة والتى توجه إلى

أشياء غير مفيده بالمرة وقد تكون مضرة

أولا الكورة أو الرياضة عامة

تعالوا نحسب حسبة بسيطة كدا على فرقة واحد من فرق كرة القدم وما يصرف عليها

وطبعا لا يخفى عليكم أن المجتمع لايجنى من إحتراف الكرة إلا كل خراب من العديد من الأوجه

فريق سين من الدورى

يحتوى على 30 لاعب
أقل لاعب بياخد 500 ألف

أكثر لاعب بياخد 6 مليون

يعنى لما نحسب المتوسط يطلع أكثر من 3 مليون

3*30=90 مليون فى السنة

دا غير المصاريف والمعسكرات والمكافئات

ومرتبات المدربين وغيرة

خلينا نضحك على أنفسنا ونقول 110 مليون فى السنة

دا أكتر نادى

أقل نادى قول بيصرف 40 مليون

المتوسط =75 مليون

75فى 16 نادى =1200 مليون فى السنة

دول يشغلو كام واحد يكون مرتبهم فى الشهر2000 جنيه

هيشغلوا

50000 واحد

خمسين ألف واحد هيعيشوا عيشة إلى حد ما كويسة

طيب نسيب الكورة

ونروح للمسلسلات

السنة دى فى رمضان كان فى أكثر من100 مسلسل جديد

طبعا مفيش حد عاقل يقدر يقولى إن إحنا إستفدنا حاجة من المسلسلات

كلفوا كام دول

قرأت عن تقرير بتقول إنهم كلفوا تقريبا 750 مليون جنيه

نحسب حسبتنا البسيطة

31250 واحد هيتعينوا براتب شهرى 2000

تالت حاجة

برامج الفضائيات

سواء برامج تحليل مباريات الكورة

أو برامج النميمة والكذب

أو برامج الأغانى

أو برامج المسابقات الهايفة

ممكن نقول على الأقل

500 مليون سنويا

نحسب

20833 واحد تقريبا هياخدوا 2000 جنيه شهريا

ولو فكرنا أكتر هنلاقى حجات كتير إحنا محسبنهاش

ممكن تكفى الكثير من الفقراء المعدمين

واحد يقولى ياعم إنت عايز الدنيا تبقى سودة خالص مفيهاش أى ترفيه

أرد عليه وأقول

1- ايه اللى يمنع إننا نلعب كورة كهواية ونستمتع ونستفيد بدنيا

2-بالنسبة للمسلسلات فليس بها أى معنى مفيد
ومتابعتها مرض

3-وهو أهم بند مش معقول ندور على اللى يرفه عنا ونحن نتقاتل
على رغيف العيش وأنبوبة بتوجاز

أعتذر للإطالة ولكن الأمر خطير

جزاكم الله خيرا

**adel1212** · 22-12-2010 08:53 PM

فعلا الامر جد خطير جدا جدا جدا

**MISS_MONA** · 22-12-2010 09:18 PM

يا سيدى دع الخلق للخالق هو يحكم
احنا نعمل اللى نقدر عليه والباقى ربنا يفرجها
انما لو احنا قعدنا نحسب مش هناخد غير حرق الدم ومش هنستفيد حاجة

**Ahmed_lol2007** · 22-12-2010 09:31 PM

بجد كلامك كله مظبوط
ولو احنا عملنا كدة وسيبنا العك والمسلسلات والارف دة وخدنا الفلوس بتاعتها فتحنا بيها مصنع شوف كام واحد هيشتغل ونبنقى قللنا نسبة البطالة بس هنقول لمين الكلام دة كله همه على كرسيه

**د/أحمد ابراهيم** · 22-12-2010 09:41 PM

كلام في الجون (على رأي شباب الايام دي)

على كل الطرح ده عايز يوصل لمستوى تفعيل اعلى عشان يكون له صدى

تحياتي

**sha2e** · 22-12-2010 10:39 PM

مع حضرتك حق فى كل كلمه
وللاسف الواقع بيقول ان مصر اصبحت بلد طارده للعلماء والمتفوقين وجاذبه للعيبة الكوره والفنانين أو كما يطلقو عليهم المبدعون
وعمر ما البلد حاله هيتعدل طول ما الهرم مقلوب بالشكل ده

**fepsceasar** · 23-12-2010 12:40 AM

حقيقى كل كلامك صح وأضيف شوية حاجات
1-بالنسبة للكورة اللاعبين عندنا بيقبضوا كمحترفين ويلعبوا كهواة شوف الواحد من دول يهبد على قلبه أد كده ويزوغ من التدرييب ويطنش المعسكر ويروح يشرب شيشة ويتمنظر على البنات علشان كده الأسعار بتاعت اللعيبة دى بتموت الكورة عندنا مش العكس وبتقتل فكرة الاحتراف، وما حدش من عندنا بيفلح برة، يقولك وانا هوجع دماغى ليه وتدريب صبح وبالليل ومدير الكورة يقولى نام الساعة10 بلاش وجع دماغ وانا هنا مقضيها والنتيجة لا تخفى على أحد.
2- بالنسبة لبرامج الرياضة (اسف ياريت الرياضة دى الكورة) كلها كلام مكرر زى بعضه وياريتهم بيناقشوا فنيات لا كله كلام فاضى واخبار ما حدش عايز يسمعها، واعتقد ان الفرجة عليها كتير ممكن تجيب بلاهة.
3-بالنسبة للمسلسلات مش عارف مين اللى بيصرف على الكم ده كله وليه بينتج أساسا ده كفاية كل شهر مسلسل أو 3-اتنين ويكون مستواه محترم ويجيبوا اعلانات والناس تكسب وكل حاجة، وبالمناسبة ما فيش نجم مسلسل بياخد لو حده اقل من مليون جنيه وبعد كده هتبقى الحلقة بمليون جنيه مش حسد ده أر، هل فى جمهور للدرجة دى!!!