الموضوع: bafakkar fe Gen2

السلام عليكم

اولا اهلا بيك معانا فى المنتدى

بص يا باشا

اولا العربية ممتازة جدا و زى فل من ناحية الميكانيكا محدش اشتكى منها و دية حاجة مهمة جدا و كويسة جدا

فى موديلات 2005 و 2006 كان فية عيوب تقفيل تافهة زى مثلا ان الزجاج بيعلق او السنتر بيعلق او لمبة الصالون مش بتنور حاجات كدة بس الحمد لله فى موديلات 2007 و 2008 تم حل المشكلة و العربية مبقاش فيها مشاكل الحمد لله و دة بشهادة كل الى جابها موديل 2007

من ناحية التوكيل فا انا مش من ملاك العربية و لكن من المعجبين بها جدا و طبعا متعاملتش معاة بس هوة كويس مش ممتاز و مش وحش و هوة على فكرة توكيل جيب و ستروين

العربية ممتازة ما شاء الله من كل حاجة

صاج
ثبات
كماليات
محرك

كل حاجة تمام توكل على الله

و على فكرة الياريس مش وحشة برضة العربية ممتازة بس مش احلى من الجين 2 :) فى رأى طبعا و ممكن حد يختلف معايا :)

السلام عليكم
أولا أهلا بك في المنتدى عموما و قسم البروتون خصوصا
بالنسبة لأسئلة حضرتك
أولا الجين 2 إنتاج شركة بروتون ....... و التي بدورها ليست مشهورة في مصر و ناس كثيرين لا يعرفون ما هي بروتون أساسا
و لكن هل هذا يعيب السيارة ؟؟؟ بالطبع لا
هل لو كانت جين 2 من إنتاج تويوتا و ياريس من إنتاج بروتون كانت هاتبيع أكتر ؟؟؟
الإجابة نعم و مليون في المائة نظراً لثقة الناس العمياء في تويوتا في مصرنا الحبيبة

نرجع بقى للأسئلة

العربية مفيهاش الهوا من موديلا 2007
يعني مفيش أي مشاكل و الحمد لله خالص
و التوكيل كويس جدا ........... لم أقابل أي مشاكل معهم على وجه الخصوص و لكنهم يشتركون في نسبة مستوى الخدمة مع بقية التوكيلات في مصر و هذا بما إننا في مصر !
و طبعا هما أحسن من غبور و محدش أشتكى منهم
و نصيحة متسألش الناس على حاجة ......... كل واحد هايفتي و يطلعلك بكلمة
العربية مفيهاش مشاكل لا في الكهرباء و لا الميكانيكا من ساعة ما نزلت مصر
و كل مشاكلها كلنت بتنحصر في التقفيل و زي ما وضح أخونا فهد و قالك
كل المشاكل كانت بتنحصر في الآتي
زرار بيعلق ......... و بتتحل في التوكيل
زجاج كهرباء يعلق .... و برضه كانت بتتحل في التوكيل
و هذه كانت أشهر المشاكل في تقفيل الجين 2 موديلات 2005 و 2006

و انا ( العبد الفقير إلى الله ) عربيتي موديل 2007 و لم تواجهني أي مشاكل على الاطلاق .... و صديق لي سيارته موديل 2006 و عامل بيها عداد كيلومتر فوق 70 ألف و العربية لم يتم تغيير فيها غير تيل الفرامل و الزيوت فقط لا غير
و صاحبي ده قاسي جدا على العربية و ما شاء الله عليها حمالة قسية

و بالنسبة للعربيتين موضع المقارنة
الياريس كويسة علشان موتورها كويس و من إنتاج تويوتا .......... و بس
و سعرها مبالغ فيه جدا على عربية 1300 من غير كماليات
و كمان بتيجي و فيها عيب و هو اسطوانة دبرياج يجب تغييرها في التوكيل و يقوم التوكيل بالتغيير مجانا و خدمتهم ممتازة على حد كل من تعامل معهم . و العيب على ما أعتقد توقف منذ موديل 2008
و خلى بالك ........ عمرك سمعت حد قال إن الياريس فيها عيب اسطوانة دبرياج ؟؟؟!!!
طبعا لا ........ علشان ثقافة الناس ........ تعيب في اللي متعرفوش و تمجد اللي تعرفه حتى لو ميستهالش التمجيد

انا عايزك تبص على مواضيع قسم البروتون و تقرأ تجارب الاعضاء عن الجين 2 و برضه مش هاتتعب لأن التجارب موجودة في المواضيع المثبتة

و رجاء اخير لكل من يقرأ الموضوع من أصحاب التويوتا ياريس
هذه مناقشة عن السيارات فقط لا غير ........ و أرجوا أن لا يغضب أحد بسبب رأيي

المشاركة الأصلية كتبت بواسطة aboalm

اقتباس ((طبعا لا ........ علشان ثقافة الناس ........ تعيب في اللي متعرفوش و تمجد اللي تعرفه حتى لو ميستهالش التمجيد )) و الله عندك حق يا اخ توت
لكن لى سؤال بسيط ليك ايه حصل و غيرت التوقيع بتاعك و بتدعى على بتوع الغرز؟ حصل حاجه لا قدر الله؟

كذا مرة و في مواقف عديدة ألاقي نفسي هامعمل حادثة بسبب إنسان عديم الإحساس بيعمل غرزة
يعني من حوالي عشرة أيام ........... واحد راكب 504 و بعدين هو كان في الحارة الشمال .......... و أنا في النص ............. و جنبي عربية في الحارة اليمين
و أخينا ده لقى عربية نقل قدامة و مكنش فيه مسافة بيني و بين العربية النقل كافية إنه حتى يعمل فيها غرزة ........ المهم راح كاسر عليا يمين و لقيت نفسي يا إما أكسر على اللي على يميني أو أدوس بنزين و في الحالة دي كنت هاخبط فيه أو أفرمل و أفتحله طريق
و علشان مراتي كانت معايا مقدرتش أعمل معاه حاجة
............. و ببص لقيته بيتكلم في المحمول كمان !!!!!!!!!!!!!!!!
بس أرجع و أقول
حسبـــــــــــــــــي الله و نعم الوكيل في الشرطة التي لا تفعل شئ لإيقاف هذه المهازل على الطرق
و طبعا مواقف من دي كتير و يوميا
و طبعا لو مش عايز حد يكسر أقدامك لازم العربيات تكون لاصقة في بعض و ده خطر جدا فبضطر أفوت و اللي عايز يعدي يغور في داهية بعيد عني و مرة أخرى
حسبي الله و نعم الوكيل فيهم و في اللي خلاهم يسوقوا و في اللي ما بيعاقبهومش على مصايبهم

المشاركة الأصلية كتبت بواسطة IslamGen2

ايوة يا توت باشا تضايق منهم ماشى لكن تدعى عليهم بجهنم مرة واحدة يا قلبك يا اخى هههههه ^^ ، انا بقول المسامح كريم والاحسن انك تشيل التوقيع دة وادعى ان ربنا يصلح الحال =)

المسامح كريم طبعا ........ بس لما دمك يتحرق كل يوم و تحس إن حياتك معرضة للخطر بسبب فعل غبي و يتم فعله بالقصد التام ......... يبقى يستاهلوا الدعاء عليهم ........ ماداموا لم يحترموا حياة الناس على الطريق و لا ممتلكاتهم

و شكرا على التفاعل يا باشا