نطرة في الفتيس اللأوتوماتيك للصني أثناء الحركة!!
تحياتي للجميع...
يا جماعة محتاج مساعدتكم ضروري في المشكلة دي، وهي ان طول ما أنا ماشي بالعربية بحس بنطرة في الفتيس مع كل نقلة مصحوبة بصوت زي تكة أو خبطة خفيفة في العفشة أو الفتيس!! أوقات كتير بتكون جامدة وأوقات أقل بتكون ضعيفة، وأكتر وقت بحسها لما أطلع بالعربية من الأول للتاني (بيكون في نطرة محسوسة) ولما أشيل رجلي من علي البنزين وتبتدي العربية تهدي بتحصل نطرة جامدة في النقلة من التاني للأول!!!!
:majd(4):
أنا بعمل الصيانات في السبع المعادي بصفة مستمرة كل 10000، وفي صيانة ال 50000ك الأخيرة بلغت بالمشكلة دي وطلبت انهم يكشفوا على الفتيس والزيت بتاعه، وطبعاً بعد ما اتلطعت كتير جداً (مع اني كنت حاجز) نزلت استلمت العربية بعد ما اكتشفت انهم خرجوها من أكتر من نص ساعة وشكلها يقرف من برة وجوة بعد الصيانة مع اني كنت جايبها بتبرق وده طبعاً لأنهم مغسلوهاش حتى من بره!!
المهم، دخلت دفعت وخدت وصل الاستلام وسألت المهندس عن الفتيس وكان باين عليه جداً انه مش فاكر أنا بتكلم عن ايه أصلاً، سكت شويتين كده وبعدين قاللي ان كل حاجة تمام وزي الفل!!! طبعاً عرفت انه مفيش حاجة اتغيرت بمجرد ما مشيت:unhappy4: بس مقدرتش أرجع تاني عشان كان عندي شغل ومتأخر بسببهم جداً.
العربية Automatic - EX موديل 2009 الشكل القديم وداخلة على 56000ك يعني فاضل 4000ك وأطلع من الضمان، فأرجوكم انصحوني أعمل ايه بسرعة ولو في حد حصل معاه اللي بيحصلي يحكي لنا عن تجربته علشان كلنا نستفيد.
أسف على الاطالة ولكن علشان تعرفوا اللي أنا بعانيه:dzey: تم تغيير كومبريسور التكييف في الضمان من فترة لتوقفه عن التبريد تماماً ومن ساعتها التبريد رجع ولكن في صوت خافت ظهر من وقت التغيير لما بأشغل التكييف يشبه صوت تسريب بيروح وبيجي بصفة مستمرة داخل الصالون خصوصاً مع زيادة البنزين! طبعاً اشتكيت و طلعنا جربنا لكن مهندس التكييف صمم انه مش سامع أي صوت نهائياً مع ان مهندس الاسقبال كان معانا وسمعه وصديق ليا معاه نفس العربية كان معانا وسامعه ولكن مفيش فايدة، والنتيجة ان مفيش حاجة حصلت ولا حتحصل .. هل حد حصل معاه صوت زي ده؟؟ وياترى ده ايه واتعالج ازاي؟؟؟؟
أخيراً باور الديكسيون تقيل بالمقارنة بقيادتي لسيارتين صني مختلفتين ل 2 من أصدقائي وتجربتهم لسيارتي، مع ان العفشة عندي حاسسها مش ماسكة نفسها (صامولة رجلاش الدريكسيون)!!!!
أعتذر مرة أخرى عن الاطالة ومنتظر مشاركتكم في أسرع وقت.
