الموضوع: نطرة في الفتيس اللأوتوماتيك للصني أثناء الحركة!!

المشاركة الأصلية كتبت بواسطة ahmed.tv

ان شاء الله خير واهدا وكل امورك حتتحل على خير

اهم حاجة فى الاول لازم تعرف وتتطمن ان الضمان 3 سنين او 100 الف كيلومتر وايهما اقرب
فلسه بدرى على خروجك من الضمان , الا لو عملت حاجة خارج التوكيل ولعبت فى العربية بره التوكيل

روح لهم تانى من بدرى واعرض مشاكلك ومتستلمش العربية الا لما كل مشاكلك تتحل على خير وجرب العربية معاهم

يا أستاذ أحمد أنا شاكر رد سيادتك جداً وإن شاء الله هاعمل بنصحيتك وأروحلهم قريب.

المشاركة الأصلية كتبت بواسطة momo_sunny

ياريت حضرتك تبلغنى بالاخباراول باول
لان تقريبا عندى نفس المشكلة
خصوصا لما العربية بتنزل من التانى للاول

أكيد هأعمل كدة وشكراً لمرور سيادتك.

المشاركة الأصلية كتبت بواسطة peaceman

اهلا بحضرتك و احنا ممكن نشوف مع بعض حل للمشاكل ديه و لو متحلتش يبقي لازم لازم تروح التوكيل و متمشيش من هناك الا لما المشاكل كلها تتحل :

1- هل حضرتك جربت تعمل ريستارت للعربية ..
علي فكرة لو حضرتك عملت ريستارت هتلاقي ان موضوع الفتيس ده اتظبط و السبب اللي انا لاحظته لما بسوق عربيتي و بعمل كيك داون كذا مرة اعتقد ان كمبيوتر العربية بتبرجل شوية و مش بيظبط موضوع النقلات
و لما بعملها ريستارت بلاقي نفسي مبحسش بالنقلة خالص خالص .. جرب كده و قولنا
طبعا طريقة عمل الريستارت يا ريت تكون في منطقة هادية و تقفل زجاج العربية خالص و تكون مبطل العربية :

الطريقة

دور المفتاح في الكونتاكت بس متدورش العربية لغاية ما تلاقي لمبة الاوفردرايف تنور و اول ما تطفي تقوم قافل الكونتاكت و تركز لغاية ما هتسمع تكة في العربية من ناحية اليمين
اول ما تسمع التكة تقوم مدور تاني المفتاح في الكونتاكت من غير ما تدور العربية لغاية لما تلاقي لمبة الاوفردرايف تنور و تطفي و بعد كده تقوم قافل الكونتاكت و بعدين اول ما تسمع التكة في العربية من ناحية اليمين
تقوم تدور العربية علي طول و تمشي بيها و جرب و قولنا ايه الاخبار هل بتحس تاني بموضوع النقلة ولا لأ.

2- بالنسبة لثقل الدركسيون :
في حاجتين ممكن يظبطوا الموضوع ده و الاولي هي بالترتيب انك تظبط الكاوتشات بتاعتك نيتروجين بالمقاسات الجديدة من بريدجستون و هي 36 امامي و 33 خلفي .. ان شاء الله تلاقي الدركسيون اخف و بقي اسهل في اللف
الحاجه التانية و هي ريجلاش الدركسيون لو في دربكة في العفشة يبقي احتمال العفشة عايزة تتربط كويس او رجلاش الدركسيون عايز يترجلش

انا بفضل تشوف القياسات الاول لأنها ظبطت معايا الدركسيون و بقي خفيف و انا معايا 2009 ex اوتوماتيك برده

و اي خدمة

أستاذ بيشوي .. سعيد جداً بمشاركة سيادتك وبمحبتك وبكل المعلومات القيمة اللي حضرتك أفدتني جداً بيها خاصة وأفدتنا جميعاً بها.
هأجرب أعمل ريستارت زي ما سيادتك نصحت وهابلغ حضرتك بالنتيجة.

كل عام وسيادتكم جميعاً بألف خير وصحة وسعادة

أستاذ بيشوي. أنا عملت ريستارت للعربية زي ما حضرتك نصحت لكن المشكلة مازالت قائمة.

أنا لقيت مشاركة عالخاص من الأستاذ Ahmed Hawas وهو مشكوراً أفاد بالأتي:

"في الغالب بتكون من الكنترول فالف بتاع الفتيس الأوتوماتيك
بيرفعوا العربية عالكوريك ، وبيتم فك غطاء قاعدة الفتيس
وبعد ذلك بيفك حوالي 14 مسمار من مجموع 32 مسمار وده بيخليك تشيل الكنترول فالف فقط
بدون ما تشيل مجموعة البلوفات
وهنا يتم تنظيفه بضفط هواء عالي حيث توجد بعض الأوساخ والزين المتجلط أو المتزنخ في مسار الزيت
وسبب ذلك ظروف التشغيل القاسية وتشغيل الزيت أكتر من عمره أونوعية زيت رديئة

والحوار ده مشهور ومتكرر جدا في موديلات كتير ، ويارب نكون أفدناك"

وإنشاء الله لما أروح التوكيل هأطلب منهم تنظيف الكنترول فالف ده.