بعد طول انتظار .. تحويل اللانوس لعربية خرسة
بسم الله
طبعا اكبر و احلى سلام على كل حبايبى
الموضوع ده عبارة عن تكتيم و منع اى اصوات واجهتنى فى العربية و بصراحة كانت منغصة عليا عيشتى و كنت كاره العربية بسببها
الاول قولت كده كده هحتاج لسفنج و قطن و حاجت كده ... بالفعل روحت الصيدليه جبت كيس قطن و روحت لمخزن بتاع سفنج جبت من عنده لوح سفنج رقيق حوالى 2 متر ( كيس القطن ب 3 جنية و لوح السفنج ب 6 جنية )
مشكلتى الوحيدة انى مش عارف ارفع صور بس هوصفلكم بالظبط و العمليه اصلا بسيطة ( بس انا استعنت ببعض الصور من موضوع الاستاذ عصام غنايم بتاع تغيير اضائة التابلوة )
1 - كان فى صوت تزييق جاى من الجنب اليمين بعد تدوير جامد جدا لقيته جاى من الكرسى و الصوت كان عبارة عن احتكاك اللد بالفبرة اللى فى الجنب بتاع الكرسى ( اى حد بيسمع صوت تزييق و هو عنده فرش جلد يبص على الاحرف الفيبر بتاع الكرسى و احتكاكها مع الجلد )
الحل : حطيت حتة سفنج لقيت الصوت بردو فى تزييق شلت السفنج و طيت قطن بقت تمام
2 - الطابلوة : كل ما اعدى على حته مكسرة او على عين القطة احس بشخاليل و كان العربية مجمعها من مقلب للنفايات
المهم فكيت الطابلوة http://up3.up-images.com/up//uploads...9046aea684.jpg
و حطيت سفنج فى الجزء اللى ورا العدادات كانها مخده و ركبت العدادات
و لما تقلب الوش بتاع الطابلوة فى ايديك هتشوف ضهر الساعة و زرار الانتظار http://up3.up-images.com/up//uploads...4fe2e1646a.jpg
برضو حطيت فيهم قطن و حشرت فيهم قطن عشان لما يتهزو و ميخبطوش
و قفلت التابلوة على كده
و بعدين حطيت حتة سفنج فى الجزء اللى بيركب كبس ( اللى هو اول حاجة بتفكها عشان تعرف تفك التابلوة اللى هو الجزء اللى زى حرف u http://up3.up-images.com/up//uploads...e3a387cc34.jpg
3 - فكيت فرش الابواب و بصيت على اى حاجة ممكن تعمل اى صوت ... لقيت ان فى سلك بتاع السنتر و الانذار و شوية سلوك كده ماشيين مع بعض... حطيت تحتهم سفنج و لزقت السلوك عليها عشان متعملش اصوات
لقيت الويرات الحديد اللى واصلة بين اكرة الباب و القفل و كذلك الوير بتاع المسوجر حطيت تحته سفنجة بس متحشروش سفنج كتير عشان ممكن تقفش
قفل الباب و قوم جرب عربيتك البى ام
ملاحظة مهمة : الصور اللى فى الموضوع انا متعبتش فيها دى بتاعه ا/ عصام غنايم و انا استخدمتهم بس يا ريت ميزعلش
و طريقة فك التابلوة فى الموضوع ده http://www.nilemotors.net/Nile/145847-a.html
طبعا و انت شغال يكون معاك عدتك عشان لو فى حاجة مفكوكة او بتشاور عقلها تربطها و تنيمها و تغطيها
.... و انتظروا العزل الكامل للارضية بس لسه بجمع معلومات عن المواد العازلة و مش هيبقى قبل الخميس الجاى عشان اشتغل فى العربية
تحياتى
احمد ابراهيم
