تقرير صيانة الاف كيلو للجميلة ريو

**kdosoki** · 27-12-2010 09:58 AM

تقرير صيانة الاف كيلو
اتصلت ب 19542 وحجزت ميعاد بعد اسبوع فى روكسى 9 صباحا
( غالبا الكوول سنتر بيبقى مشغول طول النهار وهو شغال 24 ساعة واللى عايز يحجز بسرعة يتصل الصبح بدرى او بالليل متأخر )
كنت فى التوكيل الساعة 9:15 كان فيه صف طويل يدوبك دخلت من البوابة وانتظرت لحد ما المهندس مصطفى قابلنى وسألنى على رقم الحجز
- مع ان الامن سألنى وكمان المفروض يكون عندهم الحجز مش كل شوية واحد يسأل -
كان معاه جهاز كمبيوتر فى ايده استلم منى العربية وطبع لى ورقة شكلها حلو مكتوب فيها بيانات السيارة واللى انا طالبه وكتبلى السعر
وقالى ان المصنعيات مجانا
جه واحد مكشر نزلنى من العربية علشان يحط دواسة وكيس على الكرسى وكيس على طارة الدريكسيون وبعد ما خلص رزع الباب ومشى
انا انتظرت جوة التوكيل بعد ما المهندس قالى ساعة ونص يا باش مهندس
دخلت جوه مكان انتظار جميل جوه المعرض
ولقيت جنب التليفزيون شاشة بتعرض قائمة الاسعار للصيانات كلها لجميع الموديلات وكمان اعلانات عن زيت شل الترا واعلان جميل جدا عن العربية سول والاهم من كده لقيت اسمى وبيانات العربية بتاعتى بتظهر فى جدول على الشاشة المهندس قالى لما تيجى علامة خضراء امام اسمى اروح الخزنة ادفع.
حسن عملى شاى جميل جدا وشربت ميه ساقعة
وبعد ساعة تقريبا خلصت العربية
كنت طلبت انضف فلتر التكييف ( شكلهم نسيوا )
العربية نضيفة جدا من جوه وبره
الامن هناك متعاون جدا
مشيت بعد ساعة وتلت تقريبا وده كلام رائع - انا كنت متوقع اكتر من كده بعد ما شفت الزحمة وانا داخل -
انا بحاول ارفع صور علشان تبان ومش عارف لما اعرف هرفع شوية صور يمكن تستفيدوا بيها

**kdosoki** · 27-12-2010 02:57 PM

تقيميى للصيانة ( ضعيف - جيد - جيد جدا - ممتاز ) لو كانو نضفوا فلتر التكييف كان هيبقى ممتاز
تقيمى لمركز صيانة روكسى ( ضعيف - جيد - جيد جدا - ممتاز ) مكان صغير انما مرتب وكل واحد عارف بيعمل ايه فبيقدروا يعملوا شغل كتييير فى مكان صغييير
تقيمي للعربية ( ضعيف - جيد - جيد جدا - ممتاز ) كان هيبقى ممتاز لو كان فيها الاتى
فانوس ستوب خلفى

العجل اعرض من كده شوية

مسند يد للسائق

مكان احط فيه المناديل الورق

**yasso0101** · 28-12-2010 09:27 AM

مبروك على الصيانه

**sara2001** · 28-12-2010 09:41 PM

الف مبروك على الصيانه
اعتقد حضرتك اول واحد من الأعضاء يشكر في فرع روكسي

**JUVENTUS** · 28-12-2010 09:51 PM

مبروك يا خالد باشا

**sara2001** · 29-12-2010 02:51 PM

المشاركة الأصلية كتبت بواسطة kdosoki

اعتقد ان التقييم مينفعش يتبنى على زيارة واحدة ( اذا كانت بالسلب او الايجاب ) وممكن يكون حظى كان حلو فى الصيانة الاولى والصيانات الجاية هتبين التقييم الحقيقى
بس اللى انا شفته وقلته فى تقييمى لمركز الصيانة
انه من الواضح ان الناس اللى بتعمل شغلها بالكفاءة دى والسرعة دى فى مكان صغير زى ده ... اكيد عارفين بيعملوا ايه!
وفى الاخر دى وجهة نظرى وعايزين نعرف وجهات النظر الاخرى لزوار فرع روكسى والفروع الاخرى

انا مش بشكك في كلام حضرتك
واكيد الصيانه كانت كويسه وبإذن الله اللي بعدها تكون احسن
لكن ده كان الرأي السائد هنا في القسم مبني على تجارب البعض في فرع روكسي
وفعلاً التقييم مش بيظهر من مره واحده
كل مره في ظروف مختلفه بتأثر على التقييم