وداعـــاً أوبترا سيارتى الأصيلة
الحمد لله يا جماعة بعت عربيتى الأوبترا بعد 3 سنوات و نصف من العشرةو الذكريات الجميلة و الحقيقة كانت فيهم نعم الصاحب و وش السعد على من يوم ما جبتها ليوم ما بعتها حتى بيعتها كانت زى النسمة و الله كعادتها معى ... كفاية كده أحسن خلاص الدمعة هتفر من عينى
المهم عربيتى كانت 2007 أوتوماتيك فابريقة برة و جوة و غيرتلها 4 فرد كاوتش و بطارية من شهرين بالكتير و عاملة 51000كم و بعتها بـ 70750 أخدها منى دكتور أسنان ربنا يبارك له فيها و يكفيه شرها
و بعتها لإنى بفكر أجيب فانتازيا مع العلم إن عربيتى كانت نعمة و فضل بس أهو نجرب الألمانى و ربنا يوسع على الجميع
و طبعا منتدى الشيفروليه دى بيتى التانى و رابطة الشيفروليه إخواتى و الله و مع إنى ماليش مواضيع كتيرة و لا مشاركات بس دايما بتابع و هتلاقونى معاكم على طول
فى النهاية ربنا يبارك لكم فى عربياتكم جميعا و يوفقنا لرضاه و يرزقنا شكر نعمته