مساعدة ضروري - مسافر أوروبا وموش عارف اجهز لبس فيه علشان التلج اللي بره

**ArafatEHegazy** · 29-12-2010 08:07 PM

السلام عليكم ورحمة الله وبركاته

أخوكم محتاج مساعدة لأهل الخبره في السفر للبلاد اللي فيها تلج. أنا مسافر بإذن الله الدنمارك لمده اسبوع. وطبعا متابعين الجو الصعب ودرجات الحرارة في أوربا عامه. يعني المتوقع في الدنمارك ان درجة الحرارة بتكون 7 تحت الصفر في المتوسط .... وممكن توصل ل 20 تحت الصفر كمان.

أنا بقي موش عارف ألبس ايه و طبعا الهدوم بتاعتنا ما تنفعش هناك ببصله. فمطر أشتري حاجات ... ومستخسر أشتري حاجات غاليه على سفر أسبوع فقط ... بس خايف لحسن أتزبط في البرد.

المشكله اني سألت هناك قالولي ان كل الامكان المغلقه (حتى المترو ) مدفي تمام لدجة 23 تقريبا .... فلو لبست تقيل ودخلت مبني ولا حاجه هعرق وهبقي حران ... ولو لبست خفيف .... يبقي هتزبط وأنا في الشارع

يا ريت اللي يقدر يفيدي ايه اللي أنا عايز اجيبه أو اشتريه ومنين أحسن مكان أجيبه ومتوسط الاسعار ... يبقي جزاه الله كل خير

**dr_click** · 29-12-2010 08:37 PM

ايس كاب مهم جداً
جونتيت صوف
بلوفر صوف
جاكيت بكاب بس يكون عازل للحرارة
شربات صوف مهم جداً
جزمة شتوي
إلي فوق أساسي بعد كدة زود إلي إنت عايز زي بالطو طويل صوف

**mohabelnegm** · 29-12-2010 08:55 PM

و الجزمة مهم جدا أنها تكون من النوع اللى بيبقى فيه نقشةو مابيزحلقش لأن التلج فى الشارع فى أماكن كتير بيزحلق كأنك ماشى على ميه بصابون. و بالنسبة للبس أنت بتكون لابس هدومك عادى و فوقيها جاكت تقيل و ألأيس كاب و الجوانتى و لما بتخش مكان دافى بتقلع الجاكت و ألأيس كاب و الجوانتى و لما تيجى خارج تلبسهم تانى. و ان شاء الله عقبال ما توصل تكون درجة الحرارة قربت للصفر و لو -1 أو -2 مش هتكون البرودة بالسوء اللى أنت متصورة. و أهم حاجة خد معاك أكل خفيف يكيفيك يوم على ألأقل تحسبا لأى ظروف هناك.

**A.Saad** · 30-12-2010 01:08 AM

ملابس داخلية صوف بس اتاكد ان جسمك هيستحمل ملمسها
لو البالطو مبطن فرو كمان يبقى افضل

**heshamzaky** · 30-12-2010 09:04 AM

زى ما الزميل قالك كدة صح يعنى الجزمة الى بنعل جلد طبيعى مالهاش لازمة حا تزحلق و تبوظ شوف جزمة الى نعلها كريب زى الكركس و الشياك مثلا و البلوفرات الصوف مالهاش لازمة قوى حا تتحر جدا جدا و انت فى اى مكان مغلق و لو عندك شمسية خدها معاك أحتياطيا و على فكرة فى سويسرا مثلا لو فتحت الشمسية و أنت داخل مكان مغلق بيعتبروها نوع من انواع الحظ السيىء ههههههههه افتحها فى الشارع مش جوة المبنى المغلق يعنى بس عادى يعنى و أيس كاب و كوفية مهمين جدا و جوانتى بس كدة

**AkramArafa** · 30-12-2010 11:28 AM

انا بلبس الفانله الحمالات وفوقيها فانله خروج بكم وجاكت تقيل وممكن ايس كاب و البنطلون الجينس العادي وجزمه عاديه مش لازم تجيب لبس كتير عشان مشوار لمدة اسبوع وبعد كده مش حتلبسهم تاني في الحر بتاع مصر
حضرتك اصلا مش حتحتج اللبس التقيل عشان حتنزل من البيت وبعد كده تركب وسيله المواصلات وبعد كده مكان الشغل وكلهم فيهم دفايات ولو حسبت وقت الوقفه في الشارع مش حيعمل عشر دقايق
بس انتا تكل علي الله و ما تعملش هم حاجه
وربنا يوفقك في السفريه

**amir** · 30-12-2010 03:21 PM

اللي اعرفه بخصوص الموضوع ده من واحد جار ليا بيسافر المانيا كتير

في جواكت تقدر تشتريها من هناك بتتلبس فقط لما درجه الحراره تكون نازله عن حد معين و دي بتدفي جامد جدا

اما و انت مسافر فطبعا تاخد بنصايح الاعضاء

و علي فكره طقم الملابس الداخليه (اللي ظهر في فيلم الارض بتاع الارياف ده) و المسمي بالكلسون بيدفي بطريقه غير طبيعيه و انا اتعرفت عليه في الجيش و استخدمته في منطقه الوحده بتاعتي و دي ملاصقه للجبل و ما ادراك ما الصحراء و الجبل في الشتا
و كان فعلا بيدفي بالمقارنه اني من كتر البرد كنت بلبس كل الهدوم الميري فوق بعضها من غيره و كنت ببقي بترعش من البرد اما و انا لابسه الوضع بيختلف لانه بيكون محوط جسمك بالكامل مع وجود فرق بسيط عنه و ده بيحافظ علي درجه حراره الهوا اللي بين جسمك و بينه دافيه
حاجه زي بدل الغطس كده و ده تفسيري الشخصي البحت

**mohabelnegm** · 30-12-2010 05:53 PM

مع احترامي لكل الاراء بس في كلام غير سليم بالمره.انا عايش في اوربا وفي تلج عندنا الان .سيبك من ايس كاب وجزمه فيها تفشه عشاك الزحلقه والكلام اياه.انا بجري علي التلج برانر مش بجزمه واكرر تاني بــــ رانر.

يا سيدى الفاضل لو أنت راجل بتقدر تمشى على التلج "برانر" ربنا يديك الصحة! لما الواحد بيدى مشاركة و رأى بيكون عن تجارب عدت عليه فعلا....الجزمة لو ملساء من تحت دة بيؤدى للزحلقة ..أنا واحد من الناس كنت فى اليوم بتزحلق مرتين تلاتة لو لابس جزمة كلاسيك ملساء من تحت و منهم مرات كنت بقع على ألأرض بشكل كلى و على العكس تماما لو لابس جزمة فيها نقشة من تحت بيكون احساس تانى فى المشى. و بالنسبة للأيس كاب ايه المشكلة أن الراجل يجيب أيس كاب ...لازم يعنى طاقيه مش عارف ايه زى ما حضرتك كاتب!! يا سيدى الفاضل مش معنى أن الواحد يدى مشاركة فى موضوع أنة يستخف بأراء غيرة بالطريقة اللى حضرتك عرضت بيها رأيك.