طلمبة البنزين باظت sw307 وصلحتها!!

يوم الإثنين اللى فات وانا عالدائرى العربية قطعت فجأة وبدون أى مقدمات وحاولت أدورها مفيش ودى أول مرة تعملها وقطرتها لحد البيت وكنت فعلا مضايق ومش عارف أعمل إيه :I_angr1[1]:

المشكلة: بعد الإتصال والسؤال تم تحديد المشكلة بأنها عيب فالبنزين أو طلمبة البنزين.

قرار جرئ: فالحقيقة قررت بعد معرفة المشكلة انى أحلها بنفسى وربنا يستر.(وقررت أعمل الموضوع ده علشان أشاركم المشكلة اللى بتواجه وهتواجه ناس كتير وإزاى تم حلها الحمد لله)

سألت عن سعر الطلمبة الجديدة لقيتها تتراوح بين 1100 و1200 جنيه بس واحد أعرفه عنده محل قطع غيار فشارع مجلس الشعب نصحنى انى ماغيرش الطلمبة كلها ولكن أغير بس الموتور اللى هوا قلب الطلمبة واللى هو فيه المشكلة.

وبدأت فعلا فى فك الطلمبة ودى الخطوات للإفادة:

أولا أنا من ساعة ماجبت العربية وانا بسمع صوت زنة كده أول ما أدور الكونتاكت والصوت ده بيجى من الكنبة اللى ورايا وعرفت ان هى دى الطلمبة..بس إزاى أوصلها؟؟

1) فكيت الكنبة اللى ورا كرسى كرسى وده سهل جدا الحمد لله ولم يتطلب أى عدة

2) بعد كده رفعت الفرش اللى تحت الكراسى بس براحة أوى علشان ممكن بسهولة يتقطع

3) لقيت غطاء أسود وتم فكه برفعه مع اللف

4) لقيت وش الطلمبة اللى هو عبارة عن خرطومين راكبين (واحد للخارج وواحد للراجع) وفيشة (للأسف ماعرفتش أصور بس لقيت صور لطلمبة زى اللى عندى وهى موجودة تحت فالموضوع).

5) تم فك الخرطومين الأول وعمل إختبار للطلمبة عن طريق فتح الكونتاكت (بدون تدوير العربية) إذا جابت بنزين يبقى المشكلة مش فالطلمبة وده يبقى موضوع تانى بس لو ماجبش حاجة ودى الحالة بتاعتى يبقى كده خلاص ده عيب طلمبة.

6) تم فك الفيشة وبعد كده يتم فك الوش البلاستيك اللى مثبت الطلمبة فى مكانها واللى هوا كان أصعب جزء فى عملية الفك لأنه مربوط جامد جدا والمفروض انه يتم فكه بأدوات مخصوصة وطبعا ماكنتش معايا بس تمت بعد شوية دق وتخبيط وبدون خسائر الحمد لله.

7) بعد كده تم رفع الطلمبة وهى على فكرة غاطسة فى تنك البنزين على فكرة (ماعدا الوش طبعا) علشان كده يتم رفعها شوية شوية لحد لما تصفى كل البنزين اللى جواها

8) بعد كده رحت للراجل وهو بصراحة اللى قام بفك وش الطلمبة الى أن وصل للقلب وفكه وركب القلب الجديد اللى هوا بوش ألمانى ومكتوب عليه Made in Germany بس الراجل قاللى انه صينى!!

9) تم تركيب القلب وأخدت الطلمبة وركبتها مكانها تانى ووصلت الفيشة وجربت أفتح كونتاكت الأول وكانت النتيجة

الطلمبة جابت بنزين والحمد لله

وأخيرا تم تقفيل كل حاجة زى ما كانت والعربية دارت والحمد لله

على فكرة تكلفة الموضوع ده 90 جنيه فقط لاغير حتى الراجل مارضيش ياخد أى حاجة غير تمن الموتور :colsmil:

يارب ماكنش طولت عليكم وأكون أفادتكم وانا تحت أمركم لو فيه أى استفسار

تحياتى للجميع وكل عام وانتم بخير


http://img.diytrade.com/cdimg/823150...Module_NEW.jpg

صورة الطلمبة


http://cdn3.iofferphoto.com/img/item...9/709/FQ4o.jpg
صورة القلب البوش (الموتور)

تسلم ايدك علي التجربخ الجميله دي و اللف مره بقولها ان احسن واحد يخاف علي العربيه صاحب العربيه نفسه

ربنا يبركلك فيها

تجربة جميلة بس لازم تتعمل ى مكان امن بعيد عن اى شرار او كهربا

شكرا يا نور باشا على الرد وفعلا شعور جميل لما تقدر تصلح عربيتك

A.Saad بصراحة تجربة جميلة وفعلا احنا كنا حريصين ان الموضوع يبقى فالأمان ومفيش أى كهربا أو نار طبعا

شكرا على الرد وانا تحت أمركم فى أى حاجة

الله ينور عليك انا كنت لسه معدى فى الموضوع ده قريب بس بصراحة خفت انى اغير المتور واشتريت طلمبة بعد لما مكانيكى قالى ممكن سحب العربية ميبقاش مضبط وانا بسافر كتير, المهم ربنا يسترها معاك و لو تجيب واحد احتياطى تسيبه فى العربية ميحسرش انا انشاء الله حشترى واحد بقى و اركبه فالطلمبة الاديمة و خليها استبن
و بالمناسبة طلنبة 307 الهاتش باج غير بتاعت SW و انا ممكن ارفع الصور و part number هنا و نقول للادارة بقى تثبت الموضوع.
و بالنسبة لتركيب الوش البيربط الطلنبة المكانيكى ورانى طريقة كويسة و هي ان اتنين قدام بعض بمفكين كبار و كل واحد يلف من نحية
و الف مبروك

مبروك عليك التصليح..انا عملت قبلك الموضوع دا في بنت عمها الرينو (فرنساوي برضه)..بس الطلمبة bosch بتعمل 230 جنيه..لكن الاهم كان هو البار!!! ضغط البنزين في طلمبة البنزين بتتقاس بالبار..المهم البار مايبقاش اقل..

شكرا على الرد يا محمد باشا وفعلا فكرة الاستبن دى حلوة وانا فعلا هاعملها...وياريت لو تقولنا الفرق بين طلمبة الٍSW و الXT
وعلى فكرة مفيش أى مشكلة واجهتنى فالسحب لحد دلوقتى والحمد لله

ecybrarian شكرا على المرور والرد وياريت تقوللى إزاى أعرف البار الفعلى دلوقتى وهو المفروض يبقى كام

انا ماعرفش مواصفات طلمبة ينزين البيجو ايه بالظبط...بص على الموقع دا http://www.bosch.com.au/......./lang...l_Pump_WEB.pdf

الموقع لا يقبل العناوين الطويلة..حاول تنقل عنوان الموقع متقطع من السطور تحت

http://
www.
bosch.
com.
au/
......./language1/downloads/BOSCH_Fuel_Pump_WEB.pdf

تسلم ايدك ياباشا بس ياتري كل انواع العربيات ليها المواتير دي لوحدها ولا لا

جميع انواع العربيات التي تعمل بالرشاشات injection يوجد بها نفس طلمية البنزين..الفرق في المواصفات

صور طلمبة 307 هاتش باك

http://i585.photobucket.com/albums/s...a/IMG_3012.jpg

http://i585.photobucket.com/albums/s...a/IMG_3011.jpg

9 part number: 1525.T

تسلم ايدك يا باشا قلب جرئ ومغامر والله بس برافو
وياريت كل واحد عنده تجربة ناجحة كدااا يقولها علشان الكل يتعلم ويستفاد ان شاء الله

بجد تسلم أيديك علي الشغل الجميل اللي أنتا عملته بأيديك في العربية.
وتسلم أيديك أكتر علي مشاركتك لينا بتجربتك دي.
عشان أكيد في ناس كتير هتستفيد من التجربة دي وتدعليك, وأنا منهم..

وأكيد إن شاء الله كل اللي يقرأ هيستفيد من تجربتك دي يدعيلك بالخير بدل ما كان يدخل في مواال و يتسوح في التوكيلات ويغير طرنبة كاملة زي ما حصل مع ناس كتير.
وربنا يبارك لك فيها يارب ويحفظهالك..

كنت حابب بس أنبهك لنقطة صغيرة.
أنا معرفش أنتا قطرت عربيتك مسافة قد أيه ؟ كانت قد أيه ؟
عشان كان مكتوب في الدليل أنو غلط أنك تقطرها لمسافة أكتر من 60 كيلو. وبحد أقصي للسرعه 50 كيلو.
ومن كلامي مع مهندس ميكانيكا بسألة عن السبب قالي عشان حتي لما بتحط الفيتيس علي ال n بتفضل الغيارات في شبه حالت تعشيق بس مش كاملة. ما بين ال r وال d. علي عكس المانيوال ممكن تقطره لأي مسافة وبأي سرعة.
عشان كدا بيفضل سحب العربية علي كساحة من اللي بتشيل العربيات دي.

وإن لم يكن أنا شفت حركة تانية بس كانت معمولة في عربية خفيفة كانت فيرنا تقريبا,
كان رافع وش عربيته علي ضهر ونش من اللي بيسحب العربيات اللي راكنه مخالف في الشوراع
وكان سايب الفردتين اللي ورا علي الأرض طبعاً, متهيألي دي كانت أوفر والله أعلم.

موضوع جميل ومفيد ربنا يكرم صاحب الموضوع

انا عندى مشكلة تنى فى ال 206 ان الجزء الحاص بخرطوم الرايح الموجود فى وش طلمبة البنزين لتانى مرة الاقى فية شرخ و بيسرب بنزين و مش عارف دة من اية ارجو المساعدة

مش قلت لك ناس كتير هتستفاد من التجربة دي وتدعيلك.
دلوقتي انا العربية قطعت مني امبارح وانا ماشي بس دورتها ودارت تاني وكنت رايح فرح ركنت برة وانا طالع اغير مكانها مردتش تدور خالص ولا بقيت أسمع صوت الزنة اللي بتطلع من الكرسي اللي ورا يمين اللي هوا بتاع طلمبة البنزين
وقطرتها لحد البيت عشان كان الوقت متاخر والمسافة مكنتش كبيرة الحمد لله
دلوقتي انا عايز مكان المحل اللي جبت منه الموتور عشان انزل اجيب واحد منه
وياريت لو تقولي فكيت الفرش ازاي لأني فكيت الكرسي بس مش لاقي اي مكان افك منه الفرش.

سؤال تاني هيا الطلمبة عاملة معاك أيه دلوقتي بعد ما ركبت لها الموتور مظبوطة وقرايات البنزين مظبوطة ؟
وهل ليها فيوز ممكن ابص عليه الأول.