اكرة باب ريجاتا نوفا يمين = 625 جنيه

**amro1965** · 31-12-2010 06:04 PM

اكرة باب ريجاتا نوفا يمين = 625 جنيه
ذهبت الوكالة علشان الاكرة بعد ماعملت تصادم كانت نتيجته طيران الاكرة والحمد لله ان كله جه فى الحديد
الاكرة لوحدها ثمنها نهائى 150 جنية فى الوكالة ونادرا لما تجد تاجر يبعها لوحدها
قلت اشترى باب كامل لان الباب عندى برضه اتأثر بسبب التصادم سعرة 400 نهائى جنيه طبعا بمشتملاته سنتر وزجاج وخلافه لان فى هذه الحاله هتقلل من باقى الطقم الاربع ببان
فى النهاية اضطريت اشترى جنب كامل بابين بمشتملاتهم بمبلغ 625 جنيه بالانتقال
وكانت تراودنى نفسى اشترى الطاقم كامل اربع ببان بدون اكرة واحده كان نهائى 1000 جنيه لكنى فضلت اشترى بابان وقلت لحالى طالما ان سيارتى مريحانى ومفيش نيه بيع مش هيخسر
وطالما ان اى قطعه لوحدها بتبقى غالية لهذه الدرجة ونادرا لما تجد تاجر يفكها لك م الطقم
البابان افضل من اللى عندى هل اركبهم وارش السيارة كلها ولا اغير الاكرة وامشى على كده لغاية نهاية الترخيص فى مايو القادم
تلك واحدة
الثانية لون عربيتى ابيض وانا عاجبنى لون الببان لونهم اخضر غامق هل فى المرور فى مشكله لو غيرت لون العربية قبل الفحص
اتمنى مشاركتى الرأى

**kempel** · 31-12-2010 07:09 PM

غير اللى العربية محتاجاه بس وماتجبشى حاجة العربية مش محتاجالها يعنى لوباب واحد اللى عايز يتغير غيره لو الاكرة لوحدها بس غيرها وماتغيرشى اللون اللى بره علشان هاينزل من سعرها وكمان لازم يسحق البوية القديمة كلها يعنى العربية فى الدهان تيجى على الصاج والموضوع ده مكلف ومالوش لازمة واللون الابيض احلى لون فى الريجاتا والله الموفق

**misoalex** · 03-01-2011 05:30 AM

المشاركة الأصلية كتبت بواسطة kempel

غير اللى العربية محتاجاه بس وماتجبشى حاجة العربية مش محتاجالها يعنى لوباب واحد اللى عايز يتغير غيره لو الاكرة لوحدها بس غيرها وماتغيرشى اللون اللى بره علشان هاينزل من سعرها وكمان لازم يسحق البوية القديمة كلها يعنى العربية فى الدهان تيجى على الصاج والموضوع ده مكلف ومالوش لازمة واللون الابيض احلى لون فى الريجاتا والله الموفق

مين قال ان العربيه عشان تغير اللون تجيب العربيه على الصاج وتحرق البويه مين قال كده

عادى يا باشا رش عربيتك اللون الى على نفسك عادى بس مترشش دواخل طبعا حترش خارجى فقط

ولو حتعمل كده اعملها قبل الفحص وانت بتفحص حتشترى استماره تغير لون وتحطها فى نموزج الفحص

بالتوفيق

**mohamed_e36** · 03-01-2011 06:10 AM

اولا الف مبروك على الابواب الجديده وربنا يحفظلك عربيتك
معلش سؤال كده عالماشي حضرتك متعرفش سعر الارع ابواب كاملين بتوع ال132 يوصلو لكام
وجزاك الله كل خير

**amro1965** · 03-01-2011 08:14 AM

هى بتختلف من عربية لعربية وبتختلف ايضا بالاشياء التى تحتويها الابواب مثل سنتر زجاج كهرباء وخلافه افضل شىء انزل بنفسك واسأل ومتخدش المعلومه من تاجر واحد سيبة اسأل غيرة من وجه نظرى ممكن يعمل من 700 الى 800 للاربع ابواب