مقبرة الفيليشيا

**mohamed2007** · 02-01-2011 04:03 AM

حصلت معايا الشتاء اللى فاتت كان يوم المولد النبوى 26/2/2010 وفليشيتى العزيزة الحبيبة كنت لسه شاريها من اسبوع والمطر كان غزير و برك المياة العميقة بالكوم وقفت فى وسط المياة وشمرت البنطلون ولكن هيهات المياه كانت عميقة بس قلت مش مهم وكل العربيات ماشية ولا حد سئل فى وماكنتش عارف اعمل ايه لغاية ماجه فليشاوى زميل (زمالة فى نوع السيارة) ربنا يباركله ساعدنى فى تنظيف الاسبراتير ودارت الحمد لله وتجنبت برك المياه العميقة فى قاهرة المعز .
فالسيارة جميلة ولا يعيبها شئ غير اقترابها من الارض

**crazylambada** · 02-01-2011 06:49 AM

هو كان فيه حاجه تانيه بس حصلت معايا بالصدفه
لما جيت اشتريت سلوك سبليت فاير الكاوتش بتاعها كان ضيق فكان بيمسك في خرج السبراتير و مدخله بتباته فمهما كان الميه بتوصل مكنتش بتعرف تخش جواه فده حل احسن برضه

**Maged_Samy** · 05-01-2011 10:05 PM

انا كنت فى نفس النوه دى وكانت العربيه هتقف وقعدت احرق جامد لغايه ما وصلت امارات مصر المكس ووقفت تحت المظله لقيت الاسبراتير غرقان مياه مع انى كنت مغطيه بكيس بلاستيك .
المشكله ان سير الدينامو لم المياه بيزيد ارتفاعها عن 30 سم بياخد الميه ويضربها فى الكبوت من جوه وترجع على الاسبراتير وحل الموضوع ده سهل انا جبت حته لباد وقصيتها على مقاس الحته اللى فوق الدينامو وربطها وبكدة لما السير يجيب الميه هتضرب فى اللباد وترجع تانى من غير ما تيجى على الاسبراتير وبرده ممكن تلف الاسبراتير والبوبينه بكيس نايلون لزيادة الاطمئنان .... وانزل بيها البحر مش هتشوف فيليشيا تقف تانى .

**medofarou** · 06-01-2011 09:26 PM

انا عرفت المشكلة منين زى ما استاذ ماجد قال عن طريق السير انا كان عاندي فى الكبوت من جوة غطا بس غلطت و شيلتة كان بيشرب المية لان عمرها ما حصلت معايا قبل كدة

**misoalex** · 09-01-2011 06:11 AM

فعلا اللباد الحرارى الى تحت الكبوت مهم جدا وممكن تلف الاسبراتير زى مقال استاز ماجد بكيس بلاستك

والفليشيا عامه اكتر عربيه ملاكى فى اسكندريه والاسكندرانيه بيقدروها

**Maged_Samy** · 09-01-2011 03:59 PM

توضيح :
انا اقصد انى وضعت قطعة من اللباد فوق الدينامو علطول مش فى الكبوت من جوه انا عندى لباد فى الكبوت من الاول وشرب ميه كتير وبعد كده ردت على الاسبراتير .

**benmatar** · 13-01-2011 06:51 PM

السلام عليكم،،، أنصح باستخدام السلوفان الشفاف المطاط بتاع السوبر ماركت وتغلف بيه الاسبراتير وانت بتشده هيكون الاسبراتير وكأنه متجلد ومعزول، ميزة السلوفان ده إنه شفاف وخفيف ومعامل المطاطية بتاعه عالي ومينقطعش منك وانت بتشده وكمان مش لزق عشان ميقرفكش وانت بتفكه لأي سبب زي الصيانة وسعره رخيص ومتجرب... وشــــكرا

**Maged_Samy** · 14-01-2011 01:22 PM

المشاركة الأصلية كتبت بواسطة benmatar

السلام عليكم،،، أنصح باستخدام السلوفان الشفاف المطاط بتاع السوبر ماركت وتغلف بيه الاسبراتير وانت بتشده هيكون الاسبراتير وكأنه متجلد ومعزول، ميزة السلوفان ده إنه شفاف وخفيف ومعامل المطاطية بتاعه عالي ومينقطعش منك وانت بتشده وكمان مش لزق عشان ميقرفكش وانت بتفكه لأي سبب زي الصيانة وسعره رخيص ومتجرب... وشــــكرا

فكرة كويسة - بس انا اخر حاجه فكرت فيها وعملتها النهارده جبت جوانتى طبى من بتاع الدكاترة ولبسته فى الاسبراتير وطبعاً هو عامل ذى البلونه ومطاطى وممكن يستحمل السخونيه اكتر من السلوفان شوية .