في البداية أحب أهنيكم بمناسبة السنة الجديدة وكل عام وانتم بخير
أنا متعود إني في ليلة راس السنه لازم أدلع نفسي فقلت في سري متيجي يبو حميد تحرم نفسك السنه ده من الدلع وتدلع العروسه (اللي هي الكروز) طبعا أنا كان في نيتي من أول مشترتها إني أركبلها زينون بحكم سفري كتير بليل بس طبعا زي منتو عارفين في أولويات علشان كده قررت إني أدلعها بحته زينون بس المشكله مش في الفلوس المشكله كلها فين الحاجه النضيفة اللي متخفش ونته مركبها.
طبعا سألت كتير ودورت كتير على النت وفي السوق وطلعت بالزتونه اللي مفادها (إن كل اللي السوق صييييييييييييييييني باستثناء الزينون بتاع هاشم باص واللي في ناس كتير مقلداه في السوق) وكان برده أدامي أوبشن جامد بس مكنتش ميال ليه أوي وهو إني أشتري الموديول بتاع الليكزز أو RX وجبله لمض نضيفه وده بيتباع جديد على ebay بس المشكله الجمارك والتوصيل ونتو عارفين بركات الجمارك المصرية بتعتنا.

المهم جبت نمرة التوكيل وكلمت الأستاذ مصطفى الزرعي بصراحه راجل في قمة الأخلاق والذوق وكان باله طويل معايا طبعا حجزت الكت ده بعد متأكدت من نوع اللمبه اللي هي H4 الواطي والعالي في لمبه واحده 6000K وكانوا عاملين تخفيض على الطقم من 1750 إلى 1350 طبعا الحاجه ألماني 100% المهم مكتفتش بكده قبل مروحلهم كنت فتحت موقع Philips وبصيت على الكيت والكود اللي مكتوب على اللمبه والحاجات اللي تثبت إنها أصلي مش مضروبه

Philips Lighting Hong Kong - Xenon HID conversion kit

أسيبكم شويه مع الصور
أولا الفيلبس الأصلي الكت عباره عن علبتين بنفس الشكل ده غير الصيني اللي بييجي في علبه واحده وشكل مختلف





ده شكل الموديول الأصلي غير كده مضروووووووووووووووووووووو ووووووووووب حتى لو مكتوب عليه Philips
وخدين بالكو من الكلام الألماني وكلمة Xendrive XLD 288 (85288) ده في الأوريجينال بس


علبة تقليد بس اللي هيشوفها هيبصملك إنه أصلي



موديول تقليد


الموديول الأصلي طالع منه كابلين واحد أبيض والتاني أزرق غير كده مضروووووووووووووووووووووو ب


كده خلصنا من حوار الموديول نيجي بأه للأنيل وهي اللمبه اللي مفيش حد في العالم عرف يعمل لمض زينون بجودة فيلبس

ده صورة اللمبه الأصليه بتاعتي H4 الواطي والعالي في نفس اللمبة لو تاخدو بالكم هتلاقو مكتوب H4 H/L 85816 وده معناها H4 High/Low أما 85816 ده كود يوضح إن اللمبه ده 6000K لأن في لمبه تانيه مخصصه ل4200K وكل ده موجود في جدول في الموقع الرسمي لفيلبسز
Philips Lighting Hong Kong - Xenon HID conversion kit

غير كده وكده اللمبه الأصلي هتلاقي مكتوب Philips Germany أما المضروب هتلاقي عليه OHON Philips Patent Licence
وعلي رأي المثل (الكداب ملوش رجلين) فيلبس مبتصنعش لمض غير 4200K و 6000K أنا مش عارف اللي في السوق 8000 و 12000 يؤلك لمبه فيلبس أصلي يا باشا خدها على ضمانتي


وخدين بالكو من الرنج الأحمر ده فيلبس بتميز لمضها برنجات مخلتفه يعني H4 اخضر مش عارف 9005 أحمر زي اللي في الصوره


صورة لمبه مضروبه


ده صوره لمنظر الزنون قبل الاختبار على العربية



أتمني يكون الموضوع حاز على رضاكم