مشكلة غريبة جدا معايا " فيستا 98"

**meda2711** · 04-01-2011 04:02 PM

بسم الله الرحمن الرحيم

فى الاول ازيكم عاملين ايه ,,,, وان شء الله تكونوا كلكوا كويسين

الموضوع بقى ان من شهر ونص كده كنت ماشى بالعربية عادى لقيتها طلعت ريحة وحشة جدا جدا جدا المهم بطلتها شوية الريحة راحت ودورتها ومشيت عادى والسحب كويس جدا اللى هو الطبيعى بتاعها والعربية تمام معايا

وودتها لميكانيكى بص عليها قالى العربية كويسة والريحة دى ممكن تكون ماية دخلت ولا كيس بلاستيك مش شرط حاجة بايظة

المهم مشيت بيها من ساعتها لحد النهاردة العربية تمام اوى

النهاردة وانا ماشى بيها طلعت نفس الريحة الوحشة ومجرد ما ابطلها شوية الريحة تروح والعربية تبقى تمام

والعربية حتى وهى بتطلع ريحة وحشة السحب بيبقى تمام والعربية مشيها بيبقى طبيعى جدا

فانا مش عارف هل دى تبقى اسطوانة ولا ايه رغم ان السحب كويس :(

فياريت لو حد يعرف العربية ممكن يكون فيها ايه يقولى علشان انا هتجنن انها كويسة جدا وبتطلع ريحة على فترات بعيدة اوى :(

**meda2711** · 06-01-2011 04:56 PM

امبارح نزلت بالعربية ومفيش لا ريحة طلعت ولا حاجة حصلت والعربية ادائها كويس جدا جدا جدا

فانا مش عارف الريحة دى ايه بقى :((

**egytamer** · 09-01-2011 01:59 AM

اعتقد اسطوانة الدبرياج لانها حصلت مرا معايا كنت ماشي في شارع زحمة جدا ومن كتر الدوس علي الدبرياج شميت ريحة مش ولابد وطلعت الاسطوانة.
والله اعلم.

**meda2711** · 12-01-2011 10:55 PM

بعد يوم شاق وطويل فى قطر العربية بعد ما عطلت منى فى اكتوبر

اللى حصل سمعت كركبة كده من تحت روحت راكن افتكرت الشكمان وقع لكن لقيته كويس فتحت الكابوت لقيت دخان طالع من عند الموتور فروحت فاتح اربة المية ملقتش فيها ولا نقطة :(( مع انى لسه مزودها الصبح لانها كل يوم بتاخد ازازة مية

المهم دورت العربية وزدتها وعقبال ما روحت اجيب ازازة تانية من الشنطة لقيت اللى حطيته وقع :((

روحت مكلم حد جه قطرنى

المهم العيب طلع من طرمبة المية باظت والماسورة بتاعتها مكسورة والحمد لله الموتور كويس لانى بطلتها على طول ولسه مستلم العربية دلوقتى وهو ده كان سبب الريحة حسب كلام الميكانيكى لان المية كانت بتقع على حاجات تعمل ريحة او بتحش الشكمان او حاجة كده فتعمل ريحة

الطرمبة سعرها 250 فى بدرسيان التوفيقية وفى نور الامير فى فيصل ب 275 للى عايز يعرف الاسعار

والحمد لله على كل شىء والحمد لله انها جت على كده :))

**aYaBooY** · 14-01-2011 11:08 AM

ده سعر طرمبة المياه الاصلي ؟؟؟
و شوف لو موضوع الريحة هايظهر تاني ولا لا علشان تسريب المياه مبيعملش ريحة وحشة

**meda2711** · 14-01-2011 06:10 PM

نوعها تركى

والميكانيكى قالى الريحة الوحشة دى نتيجة ان المية كانت بتقع من الماسورة وتخش فى الشكمان فبتعمل ريحة او كانت بتقع على حاجاة فتعمل ريحة

وان شاء الله متطلعش ريحة تانى

ولو طلعت ريحة تانى بخبرتك تستبعد انها تكون اسطوانة ولا ايه لانى مغيرها من فترة مش كتيرة اوى والعربية سحبها حلو جدا وكمان الريحة مش دايمة دى طلعت فى مرة وبعدين قعدت شهر ونص عقبال ما تطلع تانى والعربية كل يوم بنزل بيها مشواير كتير جدا و بيبقى ميفيهاش حاجة من ناحية السحب او الريحة او اى حاجة

**kamalsalem** · 14-01-2011 06:31 PM

طب يا جماعة من باب العلم... ممكن نمر تليفونات الونش او الشركة اللي بتتعامل معاها في القطر او الشيل والحاجات دي؟

انا دايماً بحس الناس دي بتستغل انه صاحب العربية بيبقى مبتلى بيها في الشارع ف بيبيعوا ويشتروا فيه

**meda2711** · 14-01-2011 09:40 PM

انا عن نفسى بتصل بحد معاه نص نقل يقطرنى

شركات النقل والانقاذ دول نصابين و فعلا بيستغلوا زنقة الواحد مع العربية فى الشارع

**aYaBooY** · 14-01-2011 10:16 PM

طرمبة المياه التقليد اعرف ان عمرها قصير
موضوع الريحة وارد انه يكون كيس بلاستيك لبس في فرن الشكمان و فرن الفيستا معرضة للكلام ده كله
لو مش منها يبقي جايز يكون فيه تسريب من زيت الدبرياج من الماستر الداخلي و جايز تكون الاسطوانة
و طبعاالفيستا دبرياج باكم و بلية بماستر داخل الفتيس و ده بيخلي اداء الاسطوانة جيد لحد اخر يوم ليها