الموضوع: زيت فيسكو

بصراحة تجربتى معاه سيئة جدا

استخدمت الفيسكو الـ 5000 ، بداية من الصوت العربية مبقتش اهدى ولا حاجة واعتقد ان الناس اللى حست بالهدوء ده لمجرد تغييرهم من زيت استهلك لزيت جديد ودى حاجة طبيعى هتحصل حتى مع زيت عباد الشمس مش فيسكو

قوام الزيت نفسه مايع قوى وبينقط زى الميه بالظبط ، انا عارف انها مش نقطة تقييم علمية صحيحة بس برده ده فى الاول وفى الاخر زيت مطلوب منه لزوجة فى فرن شغال واذا كان ميه كدا فى الجو العادى امال والموتور شغال بيبقى وضعه ايه ؟!!

علامات الاجهاد المعروفة للزيت وضحت عليه بدرى قوى مقارنة بالشيل ولونه شبه متغيرش من ساعة ما حطيته ودى حاجة قلقانى جدا

انا عن نفسى يادوب لو قفلت بيه الـ 10 الاف كيلو يبقى كويس وهرجع للشيل ، الالترا كنت بمشى عليه 14 و 15 الف كيلو وبنزله من غير اى مشكلة

المشاركة الأصلية كتبت بواسطة swimmer25

انا شفت الموضوع ده وانا استخدمت الزيت ده مرتين ومفيش منه مشاكل معايا
موضوع الصوت...لا مش بيقل..عادي
قوام الزيت مايع لان حضرتك جبت الزيت التخليقي..وده معامل لزوجته 5w-40
و 5 دي هي معامل اللزوجة في درجات الحرارة الباردة و 40 هي معامل اللزوجة في درجات الحرارة العالية..يعني مع التشغيل...لان الزيوت لزوجتها بتعلي مع الحرارة الاعلي

ايه الحكمة من كده...الزيت بتبقي لزوجته اقل في الجو البارد عشان يساعد علي ادارة المحرك بسرعة اكبر وميعملش اعاقة زيادة...لكن بمجرد ارتفاع درجة الرحرارة..بترتفع لزوجته عشان يقلل الاحتكاك...

وبعدين ايه هي علامات الاجهاد المعروفة اللي بتبان عليه عشان نعرفها...
اذا كان الزيت بينزل نضيف ده غلط...هو لازم يتحرق جوا المكنة عشان يبقي كويس؟
انا كنت بحط موبيل وان في يوم يعدي عليه 10 ايام يبقي اسود..والمكنة جديدة..ده صح..اكيد لا
ده غير ان موبيل وان كنت كل اسبوع لازم ابص عليه لانه كان بيقل (علي عكس فيسكو) لدرجة ان قبل ما اغيره كنت بخلص باقي الربع كيلو (الموتور بياخد عندي 3.75 لتر)...اكيد ده مش صح

حضرتك بتحطه في اي عربية..موديل 2008؟
اذا كان كده جرب تحطه في المكنة التانية وشوفه هينزل نضيف برده ولا هينزل اغمق..

معلومة...انا بحط فيسكو 5000 برده..وهو ده الاماراتي..علي ما افتكر الباقي كله تجميع مصري
معلومة تانية...انا بغيره علي 8000 كم لاني بعملهم في 7 شهور...ومقدرش ازود الزيت اكتر من كده عشان خواصه بتتغير
دولقتي انا مش بتحرك بالعربية وبشغلها بس كل اسبوعين ومعدي ال 7 شهور لكن لما اجي اغيره هشوف ايه اخباره....بصراحة مستخسر اغيره وانا مش باستخدم العربية

مهو الغريب واللى تعمدت الاحظه انه حتى وقت سخونة العربية برده الزيت بيبقى خفيف فهل اللزوجة دى مثلا مش بتبان على القوام الكامل للزيت ؟؟

علامات الاجهاد هى ارتفاع صوت الموتور اكتر بشكل ملحوظ من وقت وضع الزيت بجانب ان الموتور بدأ يبقى نوعا ما متكتف بالظبط زى وقت ميعاد تغيير الزيت ايام الشيل

انا مبيحصلش عندى نقص فى الزيت الحمد لله لا فى الفيسكو ولا كان بيحصل نقص ايام الشيل الترا

حتة اللون دى انا كنت طول عمرى اعرف ان الزيت الكويس بيجمع الشوائب من الموتور فطبيعى ان لونه يغير وان الزيت اللى لونه مبيغيرش ده زيت مبيقومش بالوظيفة دى كويس

ياريت لو الكلام ده غير صحيح تقولى لأن كدا ممكن الموضوع يفرق معايا كلياً ، انا كنت بنزل الشيل وقت التغيير لونه غامق قوى وكنت ببقى متخيل ان كدا الصح

انا فعلا بحطه فى العربية ال 2008 وهى عاملة حالياً 70 ألف كم ، كنت بستخدم الشيل على مدار 8 شهور مثلا وكان بيعمل فى الوقت ده حوالى 12 : 14 الف كم