الموضوع: شانا v101

ايه يا جماعة هو انا فى صحرا وله ايه
على فكرة ان بسأل على حاجة فى مصر ياعنى مش من المريخ
محدش حتى قال شوفتاها حلوة وحشة اذيك

بص يا صديقى...انا معايا شانا بينى بقالى 3 سنين ورأيى الشخصى انها عربية ممتازة جدا..عشان انا مجربها..لكن شانا v101مقدرش أبدى رأى فيها الا الرأى الأولى...لأنى فحصتها كويس سواء فى الشركة أو فى معرض فورمولا...العربية مبدئيا كويسة أوى وأفضل من الشانا بينى من ناحية الجودة..لكن أقل من جودة الكورى بدرجة من ناحية الصالون وخاماته...مثلا لو شفت خامة بلاستيك زراير الكهرباء اللى فى الباب...هتلاقى خامة زراير الهيونداى أفضل منها لكن بالنسبة لسعرها ممتازة جدا....من ناحية التكنولوجيا هى فعلا تكنولوجيا سوزوكى...وزى ماقلت قبل كدة أنا شخصيا بحكم خبرتى فى مجال صحافة السيارات وحبى للسيارات من 30 سنة أقول انك لما تشترى عربية صينى...هات من الشركة اللى يكون لها منشأ يابانى...نسبة الأخطاء بتبقى أقل من غيرها...وشركة شانجان المصنعة لشانا هى شركة سوزوكى فى الصين...وده فى حد ذاته كويس لأن الخبرة شىء مهم فى عالم السيارات...وعشان ماتكلمش كتير واصدعك هلخص ردى فى عدة نقاط:
1-السيارة مبدئيا جميلة وواسعة وامكانياتها كتير وخبرة التصنيع فيها عالية.
2-العمالة المدربة فى توكيل سوزوكى ذهبت للتدريب فى الصين ده غير انهم واخدين على الشغل فى موديلات سوزوكى المختلفة
3-تجميع السيارة فى مصر له مزايا وعيوب..اولا هيحطوا فيها حاجات مصرى زى البطارية وغيره ودى فى حد ذاتها مشكلة.
الميزة فى التجميع هو توفر قطع الغيار على المدى البعيد ورخص ثمنها
4-أنا سمعت من داخل الشركة ان كان ليهم ملاحظات على بعض العيوب البسيطة فى ذلك الموديل وقالوا عليها للشركة الأم قبل مايتم تسويق الموديل فى مصر...ودى طبعا حاجة كويسة جدا.
5نيجى لمقارنة السيارة لمن هم فى نفس فئتها السعرية وهختار على سبيل المثال byd f3
شانا 1500 سى.سى....والبى واى دى 1600 سى.سى.
الشانا لايمكن استبدال قطع غيارها بسوزوكى الا فى نطاق ضيق لكن بى واى دى نسخة من كورولا...لدرجة انك ممكن تستبدل أبوابها بأبواب كورولا...ده غير ان محركها ميتسوبيشى ممكن تجيبه كله على بعضه من بورسعيد ب6000 جنيه....حتى طنابير العجل والتيل...ودى ميزة مش موجودة فى شانا....
الشاناv101مش منتشرة وانا شخصيا شفت عربية واحدة بس منها...لكن البى واى دى منتشرة جدا وابتدى يبقى ليها قطع غيار فى التوفيقية.
دى مقارنة بسيطة حبيت أذكرها عشان لو فكرت فى شراء الشانا انت اللى تقرر...لكن أنا شخصيا زى ما قلت لك الشانا عاجبانى جدا من ناحية جودتها...كمان هى شبه المازدا 3.....لكن لو فكرت أغير عربيتى هجيب البى واى دى عشان الأسباب السابق ذكرها.

اولا الف شكر على اهتمامك و ردك عليا
ان اكتر حاجة مطمنانى فى العربية دى ان توكيلها محترم وتانى حاجة انها تكنولوجيا سوزوكى و توكيلها لى خبرة كبيرة فى سوزوكى من زمان
بالنسبة للتجميع المحالى انا مش بسأل عشان هيكون احسن
انا بسأل عشان لو المعلومة دى اكيدة يبقى قطع غيارها هتكون متوفرة فى التوكيل او خارج التوكيل اكيد ده مش هيحصا انهاردة وله بكرة انا عاف ان ده مش هيحصل قبل سنة و نصف او سنتين بس لو فعلا موضوع التجميع المحلى أتأكد ده هيخللى التوكيل يهتم بالعربية اكتر
ومثال على الكلام السابق البى واى دى
العربية موجودة تقريبا من بداية 2007 بدأت تنتشر اكتر مغ بداية التجميع المحلى اول 2010
و احنا انهادرة بنقول عربية كويسة رغم ان الكلام فى البداية على التوكيل مكنش كويس على الاطلاق

انا بعد كلام حضرتك عن التوكيل و جودة السيارة و موضوع العمالة المدربة بالصين دى ابتديت اقتنع اكتر بالعربية و احتمال كبير انى احجزها خلال يومين او ثلاثة على الاكثر

ربنا يبارك لك مقدما على أى حاجة تجيبها ويديك خيرها ويكفيك شرها وماتشوفش الا الخير فيها دايما يارب...ده أولا...الحاجة التانية اللى خلتنى احترمتهم موضوع العيوب البسيطة اللى كانت فى العربية...بصراحة معرفش هى ايه...لكن كنت بتكلم مع حد حبيبى فى الشركة وبالصدفة الكلام جاب بعضه...يعنى يجربوا العربية ويقولوا ملاحظات للشركة عشان تعدلها قبل ماتتسوق دى حاجة كويسة جدا...مش زى أبو الفتوح اللى جاب الأسبرانزا وبيحاول دلوقت يحل مشاكلها....وطبعا دكتور سعودى صاحب التوكيل غنى عن الكلام...يعنى مش واحد جايب توكيل عربية صينى من بير السلم وبعد مايبيع منها شوية محدش يعرفه بعد كده...لكن لما اتكلمت عن الشانا بينى قلت تجربتى من خلال الأستعمال 3 سنين...عشان كده كنت خايف أرد عليك فيما يخص الv101.....وعامة أنا شخصيا لغاية دلوقتى عاجبانى البينى رغم كل من يهاجمها ويقول فوانيس رمضان ولعب أطفال لآنى مؤمن ان العربية محافظة...لو معاك بى ام وأهملتها هتتعبك...ولو ربنا كرمنى ان شاء الله هديها لمراتى وأجيب حاجة أكبر...لأن كده كده سعر الأخر قطع غيارها رخصت دلوقت...وفيها امكانيات حلوة..ورينا يبارك للجميع فى كل حاجة معاهم او هيشتروها ويكملها بالستر دايما يارب

يا جماعه انا الحمد لله ربنا وفقني لشراء السياره وهي عامله معايا 3000 كليو ولحد دلوقتي العربيه ماشاء الله جميله وعفشتها ناعمه جدا وسحبها معقول والتوكيل بتاعها محترم جدا وليه تارخ كويس في السوق وكمان مراكز الخدمه هي نفس مراكز خدمة نيسان وسوزوكي معلش انا مش خبير في كتابة التقارير بس المجمل العام انها مريحه مفيهاش مشاكل لحد دلوقتي بس هو العزل فيها مش قد كده بعني ببقي سامع اصوات كتير وانا قافل الزجاج تكيفها ممتاز الطاره مالتي بس للكاسيت بس انا معايا اللون الاسود خطيييييير جدا فيها وكما نا لفيراني انا شوفته وانا بستلم كان جميل والعربيه هاتتجمع محلي السنه دي انا اللي معايا مستورده وتقفيلها جميل والخامات معقوله جدا يعني علي الاقل مفيش مجال للمقارنه مابنيها ومابين اللانوس والفيرنا اللي هي في نفس الفئه السعريه انا للاسف لسه ماوحتش عملت الصيانه بس لما اروح هاقولكم ايه الاخبار في مراكز الخدمه وتقبلوا تحياتي

ربنا يباركلك فيها ويعطيك خيرها و يكفيك شرها

كنت عايز اسألك سؤال
هو ارتفاعالعربية عن الارض كويس و له فى المطبات بتحك منك
و تانى حاجة بالنسبة للثبات على السرعات اخباره ايه

الحقيقه ارتفاعها معقول يعني مثلا اعلي من الفيرنا اما بالنسبه للثبات فانا لحد دلوقتي ماجرتش قوي لاني لسه باللين بس مره جبت 140 كانت ماسكه نفسها وبعدين افتكرت اني لسه الموتور جديد مارديتش اقرص اكتر من كده بس هو صالونها من ورا يعني ضيق سنه بسيطه