الموضوع: صور توضيحية لسيارتي العزيزة e39

السلام عليكم و رحمة الله و بركاته

العربية ال BMW 523 دى عربيات ألمانى ممتازة , أنا فاكر لما كنت فى السعودية , كنت مرة سوقت واحدة مو 1988 أو 1990 , مش فاكر بالظبط و كانت 525 و كانت متهانة و صاحبها واحد طبيب مصرى زميلى فى المستشفى , كان بيهمل فيا و بيستخسر فيها كل حاجة لأنه كان عارف أنه عاجلا أو آجلا , هيرميها و يمشى , بس لما سوقتها , جبت بيها 200كم/س بمنتهى الحلاوة و الثبات اللى فى الدنيا , فعلا اللى يركب ألمانى , مايعجبهوش أى حاجة تانية فى الدنيا بعد كده .

و يا ريت من كل الأخوة الأفاضل , عرض أى معلومات بمنتهى الدقة لأن هنا فى المنتدى, كلنا بنثق فى كلام بعض على أساس حسن النية , ان مافيش حاجة هتخلى حد فينا يضر التانى أو يضحك عليه و بناخد كلام بعض على أنه كلام مسلم بيه و صح , فعدم الدقة فى نقل المعلومات ممكن يعمل لأى حد منا بلبلة شديدة, يعنى لما بييجى -مثلا- عضو مننا و يقول أنه أتيحت له فرصه أنه يسافر لندن و يسوق عربية رولزرويس فانتوم -مثلا- كلنا بنصدقه و مابيجيش فى بال أى حد أنه ممكن يكون بيضحك علينا, لأن أصلا الحكاية مش مستاهلة, احنا كلنا فى الهوا سوا و كلنا عارفين أن العربيات اللى بنركبها هنا دى , مش عربيات أصلا و أنها كلها بره بما فيها المرسيدس E280 مو2005و اللBMW 535 مو 2006و المرسيدس S430 مو2003, كل دى عربيات بره بتراب الفلوس, اما ماكانتش بتتباع خردة فى الJunkyards بالكيلو, و كل الأعضاء أو أغلبهم -عشان أكون دقيق- هتلاقى معاه فيرنا و لا لانوس لا لوجان و لا النترا و لا أكسنت و لا فكتراB و لا لانسر كريستالة و لا بوما و لا مكوة و لا كرولا, ماحدش شاطط أوى يعنى و معاه مايباخ مثلا و لا E300 مو2011 الا فيما ندر , يعنى كلنا من نفس الطبقة المتوسطة للشعب المصرى المغلوب على أمره و بياخد على دماغه و مستحمل .

موضوع غريب
ماينفعش يبقى الموضوع إسمه صور عربيتي و فيه صورة أو فيديو لعربية تانية ..
حتى لو عربية صاحبك أو قريبك يجب توضيح ده و إن الفيديو أو الصورة لعربية أخرى