نصيحه قبل المعرض لينيا 1600 - بيجو 308- سيات ليون

**melagouze** · 08-01-2011 04:06 PM

السلام عليكم و رحمه الله

ياريت تساعدوني علي افضل سياره من حيث افضل قيمه مقابل السعر لاني ات شاء الله هروح معرض الفورميلا و ناوي احجز عربيه هناك انا اسرتي اسره صغيره و ناوي اغير العربيه دي ان شاء الله بعد 7 سنين و عايز عربيه اعتماديه و تستاهل فلوسها انا اخري 160000 و قسط كمان و عايز عربيه لا هيه مع طوب الارض لو نزل لها شكل جديد تروح زهوتها و لا هيه مميزه قوي ( زي عربيه اشترتها قبل كده - كنت بلف حوالين نفسي علشان قطع غيارها)

- لينيا 1600 هي هتنزل ان شاء الله في المعرض ( و هفترض ان سعرها full option هوه 14000الف
و صحابها بيشكروا في الموديل القديم ( بس بيقولوا فيها مشكله في الطنابير)

- بيجو 308 بعد خبر مد فتره الضمان الي 3 سنوات او 100000 كم بس خايف من

- سيات ليون بشكلها الجميل من بره والاوبشنز بتاعتها و بتتصنع في بلدها اسبانيا و قطع غيار زيها زي عيله VW - (و لكن يعيبها شويه صالونها و بيقولوا وكيلها مش قد كده)

( انا بعدت عن الرينو علشات قطع الغيار و مشاكل الكمبيوتر و السيتروين علشان اعاده البيع لا تحتمل و المازدا مش عاجبني شكلها من بره و الهوندا LXi سعرها مبالغ فيها و الجولف basic - لان الليون تكسب و الهيونداي النترا الجديده هتنزل في التصف الثاني 2011 و الهيونداي i30 فيها اير باج واحد ( يعني المهم انا مش مهم اللي معايا) و التيدا بحس انها عربيه قديمه و الكيا سيراتو مغرقه الدنيا و سوزكوكي SX4 علشان الوكيل سئ ......يعني انا رسيت علي واحده من التلاته دول ان شاء الله

و انا معايير اختياري:
- السلامه لاني بسافر
- مش فارق هاتش او سيدان
- مش عايز الف حوالين نفسي علشان مسمار
- استهلاك البنزين يكون قليل - يعني اللي ادفعه النهارده اخده بكره

و لكم جزيل الشكر

**hossam20102010** · 08-01-2011 04:55 PM

اولا يا فندم انصحك ان المبلغ الى هتقسطه ميكنش كبير عشان الفوايد مبالغ فيها

انصحك بالتويوتا كورولا الشكل الجديد او الشيفروليه كروز

الاتنين واسعين وامانهم حلو

**yoko** · 08-01-2011 05:07 PM

اللينيا اتوقع سعرها أقل من كده ومشكلة الطنابير غالبا في التربو فقط لإن نفس المشكله موجوده بره (مفيش حد كملت معاه أكتر من سنتين) لكن العاديه ال77 وال90 بره مفيهومش مشاكل
لكن مفيش حاجة هتبان غير بعد أول يوم المعرض ورأي روح إركب ال3 عربيات وشوف هترتاح لمين
وانا عن نفسي ترتبهم عندي حتى مع وجود عيب الطنابير في التربو (بتخلص بسرعة)

1) فيات لينيا
2) سيات ليون
3) بيجو 308
وال3 توكيلهم زي بعض ده يمكن فيات أحسنهم كمان!!! بس هو مش قد كده مع إنهم بيقولوا إن فيه نقله نوعيه هتحصل للتوكيل خصوصا إن ناس جديدة مسكت في الإدارة في الأماكن الي فيها ضعف

**Formulator** · 08-01-2011 05:43 PM

انا رأيى ان المقارنة هتكون أوقع لو بدلنا اللينيا بالبرافو... للأسباب الآتية:

- اللينيا سيدان والتانيين هاتشباك (انا عارف انها مش فارقة معاك.. بس علشان نقرب المقارنة)
- اللينيا مش هتنزل 1400 تربو تانى.. ودى كانت من اكبر نقاط تفوقها على المنافسين
وهتنزل 1600 أوتو 115 حصان (اللى لحق التربو واللى عدى عدى يا Yoko)
- لو المقارنة بقت بين برافو, ليون, 308 هتستفيد بالمواضيع السابقة واللى قتلت بحثا:

http://www.nilemotors.net/Nile/191107-308.html

http://www.nilemotors.net/Nile/189580-3.html

وبالتوفيق ان شاء الله فى الأختيار..

**CryptonX** · 12-01-2011 10:02 AM

سيات ليون
سيات ليون تاني :)

فيات لينيا

بيجو 308

--------------

السيات ليون - انت راكب جولف ( احسن و اشهر و انجح هاتشباك عائلية في العالم ) بس بكماليات اكتر و فتيس dsg و بسعر اقل من الجولف لكن ميكانيكيا هي نسخة من الجولف 5 .

بس خلي بالك الليون نزلت في 2007 و حتتغير في 2011-2012 علشان تماثل الجولف 6 و بالتالي لو موضوع شكل جديد حيضايقك ... مش عارف .. مع اني شايف ان شكلها الحالي من احلى السيارات الهاتشباك في مصر .

------

فيات لينيا , بصراحة شكلها ظريف ولكن كلاسيكي مش هجومي و تصميمها قديم شوية مقارنة بالليون و ال 308 بس اعتقد اعتماديا حتكون اقل من الليون و اكتر من ال 308 . و برده خلي بالك دي طرحت في 2007 و متوقع شكل جديد ليها او معدل في 2011-2012 .

اللينيا اصلا جراند بونتو .. يعني فئة اقل من دول , بس فيات طولوا قاعدة العجلات علشان يحشروها في الفئة دي .. ده شيء ظريف بس حتلاحظ ان اللينيا من الداخل و الخارج " ارفع او اكنز " من ال 308 و اللليون الانتريور من الداخل بالنسبة لي متساوي مع الليون و لكن الاتنين متاخرين عن ال 308 .

وبصراحة انا شايف ان البرافو هي الي تتحط في الفئة دي مقارنة مع 308 و الليون . بس برده حسيبها في النصف هنا .

بيجو 308 , موضوع الشكل ده انساه لان لسة قدامها على الاقل 4 سنوات كمان
محرك ممتاز جدا - اداء ممتاز جدا - تصميم عصري جدا و - انتريور ممتاز جدا - سيارة مريحة جدا جدا بصراحة انا ركبتها مع صديق لي .. العربية عزلاك تماما عن الخارج .. و تتفوق علي اللينيا بصراحة في كل حاجة .... بس ...

توكيل اي كلام .. اي كلام ... اي كـــــــــــلام تاني .. قطع غيار مش حتلاقيها اصلا في التوكيل و ممكن يقولك تعالى كمان شهرين تلاتة .... و اسعارها نــــــــــــــــــــــــ ـــار يا حبيبي نـــــــــــــــــــــار :)
علشان تتملك حاجة بالشياكة دي حتضحي كتير اوي ...

ثانيا و الاهم .. ان سمعة ال 307 الاعتمادية ( في الكهرباء و الصيانة ) مش لطيفة اوي . علشان كدة انا حططها اخر اختيار.