الموضوع: حاجات غريبة بتحصل معايا

اولا كل سنة وانتو طيبين
هو بس في شوية حاجات غريبة بتحصل في الساجا اوتوماتيك بتاعتي

اولا: كذا مرة اكون راجع من مشوار كبير على اساس اني ساكن في اكتوبر . وقبل ما ادخل البيت اعدي اشتري اي حاجة فابطل العربية خمس او عشر دقائق ارجع احاول اشغلها ماتشتغلش غير بعد كذا مرة من المحاولات واسيبها واحاول تاني لحد ماتشتغل..

ثانيا: انا عندي FM Modulator من ساعة العربية البيكانتو .. وانا بشغلو كل اما اجي اضرب كلاكس الاقية بيفصل .. كذلك لو حاولت اشغل المساحات الاقية بيفصل .. دة غير ان كذا مرة الاقي المحطات اللي انا مسيفها عالكاسيت طارت واضطر اسيفها من تاني..

ثالثا الزجاج الايمن بالاقية بيعلق وهو طالع كذا مرة .. بمعني ابقا دايس عالزرار عشان اقفلو الاقية مش شغال افضل احاول ادوس عالزرار لحد اما يطلع لوحدة .. الغريب انو مش بيعلق في النص مثلا او مثلا الاقية في حتة كدة بيتقل فيها .. ابدا .. دة زي مايكون مش واخد بالو اني دايس عالزرار واما بياخد بالو بيرفع الزجاج عادي جدا..

انا حاسس انها كلها مشاكل في الكهربا .. وان شاء الله مشاكل بسيطة ..

انا كنت عايز منكو بالمرة رقم حجز الصيانه عشان عايز اعمل صيانة ال5000 واقلهم عالحاجات دي..
كنت عايز اسألكو لو مثلا قالو مكنة الازاز مثلا عايزة تتغير او الزرار مثلا عايز يتغير الحاجات دي بتبقا عالضمان ولا اية نظامها ؟؟ وياترى اغيرها عندهم ولا اجيب الحاجات دي من برة وهما يركبوها ارخص من اني اشتريها من عندهم .. دة طبعا لو الحاجات دي مش عالضمان ..

ادعولي يا رجاله تكون حاجات بسيطة .. وماتنسوش تدوني رقم حجز الصيانة..

المشاركة الأصلية كتبت بواسطة XXXMEMOXXX

وحضرتك بالف صحه وسلامه

بالنسبه للاستفسار الاول ,, أ/ميدو سيلمان كان لسه طارح السؤال ده ,, والاخوه هنا شرحوا سببه ممكن حضرتك تشوف الموضوع في القسم


ان شاء الله باقي الحاجات بسيطه ويظبطوها في الصيانه ,, وموضوع مكن الازاز تبع الضمان متقلقش

رقم حجز الصيانه في الصحراوي 0117872000
رقم حجز الصيانه في العجوزه 0120110995

بس خليك في ابو رواش احسن

وبالتوفيق ان شاء الله

الف شكر يا ميمو باشا
انا للاسف مش عارف كانت اية مشكلة أ. ميدو سليمان ولا الاخوة قالولو اية..
انا الحمد لله كلمتهم وان شاء الله رايح بكرة اعمل الصيانة من بدري يعني لو حد رايح ان شاء الله نتقابل حتى نسلي بعض وكدة..

المشاركة الأصلية كتبت بواسطة MEGAREKAB

نفس المشكله عندى بالنسبه لــــ fm modulator .......

بيفصل مع الكلاكس ... وبيفصل مع المساحات .. وبيفصل مع رفع أو خفض الزجاج الامامى يمين وشمال ...

ونفس المشكله عندى كمان بالنسبه لحفظ المحطات .....

مرتين لحد دلوقتى فى أسبوع واحد المحطات اللى كنت مخزنها على الكلاريون تختفى وأقعد أدور عليها وأسيفها من تانى ....

إيه الحكايه يا ساجاويه ....

مش عاوزين حد يشمت فى الساجا ....

أنا متأكد إنها مشاكل بسيطة إن شاء الله ....

أستاذ m 10_10 .......

ممكن حضرتك تتأكد وإنت بتدور الموتور عصاية الفتيس واقفة على ايه ؟

الحكايه حصلت معايا مره وفضلت أدور أدور أدور مش عاوزة تدور أبدا

ولأنى جديد فى الاوتوماتيك .....

إكتشفت إنى كنت عمال أهرى فى نفسى ومتغاظ والسبب تافه جدا ...

عصايه الفتيس كانت واقفة على r ...

مستحيل العربية تدور معاك لو واقفة على d / r/2/3/l

ياريت تعمل تشيك على النقطة دى وأرجوك طمنى عملت إيه فى موضوع فصل الموديلاتور ده عشان أبقى عارف أنا كمان لأنى صيانة الالف الاولى بتاعتى كمات كام يوم بإذن الله ...

مع خالص تحياتى

محمد عبد المجيد

الاسكندرية
0116007025

أ محمد عبد المجيد الف شكر ليك ياباشا هو انا ال FM modulator مش بيفصل مع الزجاج بس بيفصل مع الكلاكس والمساحات بس..
بالنسبة للعربية ببقا طبعا متأكد انها على الـ N

المشاركة الأصلية كتبت بواسطة sayed911

زي ما كلنا يا اخي كنا عمالين بتناقش في موضوع حتة التدورية ولكن هية يبدوا انها سمة في كل سيارات بروتون حيث انها عندي في الساجا وعند معظم الزملاء في البيرسونا والجين 2 وعند الكل ولكن بسيطة ان شاء الله واعتقد المشاكل اللي عند حضرتك دي كهرباء ممكن تخليهم يشيكوا على كابلات البطارية لأنها هية اللي لما تفضل الكاسيت يترستر (في الغالب ) ) وبالتوفيق ان شاء الله اخي

هو مش عارف والله ياباشا مش لاقي سبب محدد للحكاية دي بس بصراحة هيا حاجة تخنق

المشاركة الأصلية كتبت بواسطة spiderloking

بالنسبه للتدوير ديه مش عارفين لحد دلوقتي ايه سببها بس هيه مش مشكله يعني جامده و اللي مطمنا انها في كل سيارات بروتون مش ساجا او جين او برسونا لأ ده كلوا كدا بس لازم نشوفلها حل في التوكيل و ان شاء الله هنشوف الموضوع ده

اما بالنسبه لكل المشاكل التانيه زي ما قالو الاخوه كلها مشاكل في الكهرباء و بسيطه و هتتحل في الصيانه بس روح ابو رواش المرادي بلاش العجوزه علشان ابو رواش الفرع الرئيسي و الناس هناك اقوي شويه و كلوا تبع الضمان مش تقلق مش هتجيب حاجه من برا ولا من جوه .

نقطه اخيره بس عاوز اوضحها للناس اللي هنا بالنسبه للمودوريتور اللي هوه الام بي 3 اللي بيركب في الولاعه بلاش النوع اللي الناس كلها بتجيبوا ابو 15 جنيه او 20 جنيه ده ياريت لو نجيب نوع تاني نضيف مثلا من راديو شاك او اي مكان كويس و في انواع فيها مالتي فنكشن للناس اللي معاها ساجا و كدا لأن النوع اللي هوه ابو 15 جنيه ده مش حلو خالص و بيقطع و بيهنج و مع المطبات الخفيفه تلاقيه بيفصل ده غير انو لو حد معدي جمبك بعربيه تانيه و معاه مودوريتور اقوي و جايب نفس القناه هتلاقي نفسك بتسمع اللي هوه بيسمعوا في عربيتوا وديه مشكله كنت بعاني منها اكون مشغل عمرو دياب ولا ام كلثوم ولا اي حاجه اعدي جمب توك توك او عربيه او ميكروباص الاقي نفسي بسمع المولد و حجرين علي الشيشه ههههههههههههههه

بص ياباشا كون انها موجودة في كل العربيات فدة مش معناه انها حاجة عادية ..
انا فعلا بروح ابو رواش عشان هيا الاقربلي طبعا
بالنسبة للـ FM Modulator هو كان معايا شغال في البيكانتو زي الفل ومفهوش اي مشاكل وكلاكسات ومساحات زي الفل ماقالش حاجة.. يبقا النقطة في العربية مش في الFM ..
عموما انا شاكر ليكو جميعا وان شاء الله اروح بكرة بدري اعمل صيانة ال5000 واقولهم على الحاجات دي كلها..