مشكلة فى نيسان صنى 2008 at العربية مكتومة فى السحب

عرض للطباعة

12-01-2011, 04:27 PM
amartaha33

مشكلة فى نيسان صنى 2008 at العربية مكتومة فى السحب

السلام عليكم
انا اشتريت نيسان صنى 2008 من ثلاثة اشهر مستعملة المهم العربية كانت تمام بس لحد الاسبوع الى فات انا لقيت العربية اول لما ادورها الصبح بتنتش وعداد المتور بيطلع وينزل بطريقة غريبة وبعدين تبطل ولما اشغلها تانى تشتغل عادى وكمان لما اجى ادور امشى العربية بتطلع عادى بس مع اول لما اهدى السرعة وتوصل 20 كدة احس ان العربية ماتت يعنى لما دوس بنزين العربية مش بتتاثر خالص بس اقوم مبطلها ومدورها وانا ماشى عادى ترجع عادى وتسحب معاى كويس
المهم روحت لميكانيكى قالى دى عايز تغير زيت الاتوماتيك او الفلتر المهم غيرت الزيت بس (والعربية اخدت 5 لتر !!!!؟ مع العلم انو كان شغال قدامى وانا الى جبتلو الزيت من موبيل بتاع الاتوماتيك) وغيرت الطقم بوجيهات ونظفت الانجكشن والعربية رجعت تانى كويس ومية مية .

المهم من يومين ظهرت حاجة تانى انى لما ادو العربية وهيا بارده عدار السرعة بتاع الموتور مش منتظم وسعات العربية بتبقى تقيل فى السحب يعنى ادوس بنزين على الاخر بس العربية مش بتستجيب بس ارجع ادوس تانى متقطع كده ترجع تانى كويس ...
انا اسف جدا على الإطالة عليكم بس انا مبتدي فى عالم السيارات ياريت لو حد عنده خبرة ممكن يساعدنى وجزاكم الله خير .. هل العيب فعلا كان فى زيت الاتوماتيك ولا الميكانيكى حطلى زيت اكتر من الازم ولو كتير ممكن اعمل ايه ...
12-01-2011, 05:22 PM
egypt0777

روح التوكيل احسن و اكشف عليها بالكمبيوتر
12-01-2011, 05:24 PM
AAAPRD

اذهب الى التوكيل و ضعها على السكانر
12-01-2011, 05:54 PM
Bishoy.Girgis

معلش حضرتك ممكن بس تقولنا :
العربية عاملة كام كيلو ؟؟
البوجيهات جبتها من اين و نوعها ايه ؟
هل العربية لسة في الضمان ؟
حتة زيت الفتيس الاوتوماتيك مش عارف اذا كانت معلومة 5 لتر ديه صح ولا غلط
12-01-2011, 06:20 PM
pharonicking

مادام انت لسة جديد روح التوكيل احسن وهات من الاخر
12-01-2011, 06:34 PM
amartaha33

العربية عاملة 82000 كيلو وخارج الضمان
البوجيهات مش فكر نوعها بالظبط وجبتها من محل فى الحي العاشر بس هيا شكل القديمة الى كانت فى العربية ومكتوب عليها صنع فى اليابان
وزيت الفتيس حطلي 5 لتر بس انا جيت اقيسه النهارده لقيته زايد عن العلامة ب 1 سم ....مع انها ساعتها كان مظبوط!!
وبعدين سئلت الميكاتيكى تانى عن سبب الكاتمة الى بتحصل سعات وانا ماشى . قالى ممكن يكون فى حاجة فى فى طرمبة البنزين !!! بس هوا لازم يجربها بنفسه
بس دي حاجة مش بتحصل باستمرار دي ممكن تحصل مرة واحدة فى اول اليوم يعنى اول خمسة كيله
12-01-2011, 06:50 PM
د.أحمد السعيد

الأعضاء قالو .................... التوكيل مستنى ايه و لا هى خرجت من الضمان !!!
13-01-2011, 12:28 AM
kamello2003

واحد صاحبي كان عنده نفس مشكلتك دي بالضبط و كمان و هو ماشي كانت العربيه بتطفي حتي لو كان ال rpm علي 3 ..و لما راح السبع طلع العيب من البطاريه و غيرها و قالوله ان البطاريه لما باظت اثرت علي و حده الكنترول و برمجه السينسورز..اكشف علي البطاريه ضروري
13-01-2011, 12:44 AM
Bishoy.Girgis

هو حضرتك ممكن تكون طرمبة البنزين لسبب ان الصني مفيهاش فلتر بنزين اصلا و طبعا البنزين في مصر مش نظيف بالمرة
بس بدل ما تدخل في افلام انا برده برشحلك انك تروح التوكيل خاصة ان العربية عاملة 82000 كيلو و بيبقي في صيانات مهمة جدا ممكن يكون صاحب العربية معملهاش فتكون هي اللي مسببة المشاكل ديه
13-01-2011, 05:15 AM
KFLDS

السلام عليكم.
بالنسبة ل مشكلة حضرتك.. لازم تروح التوكيل وتكشف عليها علشان العيب ده ممكن يكون كذا حاجة فعلا...
بالنسبة لإن النيسان مفيهاش فلتر بنزين.. هو فيها فلتر بنزين جوه الطلمبة وده بيتغير عدي جدا بس يستحسن في التوكيل علشان محدش بيعرف يظبطوا كتير بره التوكيل... أنا شخصيا غيرته قبل كده في عربيتي وبيعمل تقريبا 120 جنيه ....

وياريت حضرتك برده تبقى تقولنا العيب طلع إيه...وربنا معاك إن شاء الله
13-01-2011, 07:37 AM
vet_hulk83

كان عندي نفس المشكله غير فلتر الهوا بواحد أصلي من التوكيل واالمشكلة هتتحل ان شاء الله
13-01-2011, 11:37 AM
Ahmed.TV

بص يا باشا
اولا مبدئيا
زيت الفتيس الاتوماتيك مفروض انك تحط حوالى 3 كيلو , انا معرفش قصة ال5 كيلو دى كتير جداا

ثانيا
موضوع الكاتمة اللى عندك دى , حتلاقيها باذن الله حاجة من الحاجات دى

فى البداية خالى الطرمبة اخر حاجة خالصصصصصصصصصص لانك عشان تفكر فيها مش اقل من 120 الف

تعالى بقا نتكلم مع بعض ونتناقش بالعقل

بخصوص البوجيهات , انت ايش عرفك ان البوجيهات دى اصلية وتمام , عشان عشان شكلها نفس الشكل !!
المهم تكون بنفس الرقم والمواصفات القديمة , ويفضل تجيبها اصلية تماما
وحاول طالما ما عدتش ال100 الف كيلو تخلى قطع غيرك تكون اصلى

دلوقتى موضوع الكاتمة دى اللى عندك حتكون محصورة فى النقط دى

اولا روح اعمل صيانة فى التوكيل بتاعت ال80 الف

حتغير فيها فلتر الهواء لان اكيد ممكن يكون السبب منه
وكمان حتنظف حساس الtps والحساسات كلها
وكمان حيظبطوا قراءات الحساسات دى على الكمبيوتر , لان انت ايش عرفك ان المكيانيكى عملهم , لانه اكيد اكيد مش عنده جهاز كمبيوتر بيظبط بيه , ولو عنده , مش حيكون زى اللى فى التوكيل اكيد
فعشان كدا روح اعمل صيانتك فى التوكيل
وهما حيغيروا فتلر الهواء وينظفولك الحساسات دى ويبظطوا قرائتها باذن الله بالقياسات المظبوطة , والعربية بعدها باذن الله حتتظبط معاك

ولو مش حتروح التوكيل , يبقا غير فلتر الهواء ونظف الحساسات كويس
ولو عاوز تشترى قطع غيار اصلية تماما يبقا من منفذ بيع معتمد بيبيع قطع غيار اصلية

وطمنا فى الاخر عليك

تحياتى
13-01-2011, 12:23 PM
amartaha33

السلام عليكم ورحمة الله وبركاته

انا بشكر كل الأخوة المحترمين الى ساعدونى وانا ان شاء الله هاروح التوكيل الاسبوع الجاى وإن شاء الله ارجع واقولكم عملوا ايه فى التوكيل بالظبط بس محدش يعرف صيانة ال 80000 بتتكلف كام مع العلم انى خارج الضمان ....

بس عايز اقولكم على حاجة كويسة .... العربية مشاء الله النهارده تمام والسحب كويس جدا ... حاجة غريبة !!

اقتباس:

بص يا باشا
اولا مبدئيا
زيت الفتيس الاتوماتيك مفروض انك تحط حوالى 3 كيلو , انا معرفش قصة ال5 كيلو دى كتير جداا

انا كمان مستغرب جدا هل ده ممكن يقصر على الفتيس لو مشيت بيه كده لغاية لما اروح التوكيل ...
طيب اخر حاجة لو حد يعرف مكان افضل توكيل مع العلم انى ساكن فى عين شمس الغربية وبشتغل فى مساكن شراتون
13-01-2011, 01:03 PM
Ahmed.TV

روح وهما حيقوموا بالازم

وبخصوص الاسعار حتلاقيها فى القسم عندنا موجودة فى موضوع مثبت فيه كل اللى انت عايزه

وعن التوكيل القريب منك

عندك مودرن فرع الهايكستب , وعندك كمان السبع فى المعادى

شوف الانسب ليك وروحله واعرض عليهم مشكلتك لما تكلمهم فى التليفون

لانك لازم تكلمهم قبل ما تروح عشان تحجز معاهم الاول

وطمنا عليك
13-01-2011, 01:30 PM
amartaha33

اقتباس:

روح وهما حيقوموا بالازم

وبخصوص الاسعار حتلاقيها فى القسم عندنا موجودة فى موضوع مثبت فيه كل اللى انت عايزه

وعن التوكيل القريب منك

عندك مودرن فرع الهايكستب , وعندك كمان السبع فى المعادى

شوف الانسب ليك وروحله واعرض عليهم مشكلتك لما تكلمهم فى التليفون

لانك لازم تكلمهم قبل ما تروح عشان تحجز معاهم الاول

وطمنا عليك

شكرا لحضرتك جدا انا عاجز عن الشكر .
13-01-2011, 02:29 PM
Bishoy.Girgis

اقتباس:

المشاركة الأصلية كتبت بواسطة amartaha33

السلام عليكم ورحمة الله وبركاته

انا بشكر كل الأخوة المحترمين الى ساعدونى وانا ان شاء الله هاروح التوكيل الاسبوع الجاى وإن شاء الله ارجع واقولكم عملوا ايه فى التوكيل بالظبط بس محدش يعرف صيانة ال 80000 بتتكلف كام مع العلم انى خارج الضمان ....

بص حضرتك التوكيل هو اللي هيحددلك ايه الصيانة اللي تعملها لأن مثلا مثلا ممكن يقولك تعمل صيانة الـ 50000 اهم صيانة
فروح التوكيل و قولهم علي المشاكل و هما هيحلوها ان شاء الله
و متنسااش تكتبلنا تقريرك بعد الصيانة ان شاء الله
17-01-2011, 11:53 AM
amartaha33

السلام عليكم ورحمة الله وبركاته
انا غيرت فلتر الهواء والعربية بقت كويسه الحمد لله والمشكله اختفت
"انا شتريتة من مودرن الى فى شارع الحجاز ب 130 جنيه بالضريبة "
وبالنسبة لكمية الزيت بتاعت الفتيس روحت قستها عند واحد متخصص فى الزيت قاسها لاقاها كويسه "انا كنت بقيس غلط لازم العربية تاخد مارش r وبعدين تقيس"

بيتهيالى كده مش لازم بقى التوكيل دلوقتى العربيه اتظبطت والحمد لله وانا مش ناقص مصاريف تانى دلوقتى

فى النهاية شكرا لافضل منتدى ولكل الاعضاء المحترمين الى ساعدونى بكل حب واخلاص انى احل مشكلتى

سبحانك اللهم وبحمدك ، أشهد أن لا إله إلا أنت أستغفرك وأتوب إليك
17-01-2011, 02:26 PM
Bishoy.Girgis

اقتباس:

المشاركة الأصلية كتبت بواسطة amartaha33

السلام عليكم ورحمة الله وبركاته
انا غيرت فلتر الهواء والعربية بقت كويسه الحمد لله والمشكله اختفت
"انا شتريتة من مودرن الى فى شارع الحجاز ب 130 جنيه بالضريبة "
وبالنسبة لكمية الزيت بتاعت الفتيس روحت قستها عند واحد متخصص فى الزيت قاسها لاقاها كويسه "انا كنت بقيس غلط لازم العربية تاخد مارش r وبعدين تقيس"

بيتهيالى كده مش لازم بقى التوكيل دلوقتى العربيه اتظبطت والحمد لله وانا مش ناقص مصاريف تانى دلوقتى

فى النهاية شكرا لافضل منتدى ولكل الاعضاء المحترمين الى ساعدونى بكل حب واخلاص انى احل مشكلتى

سبحانك اللهم وبحمدك ، أشهد أن لا إله إلا أنت أستغفرك وأتوب إليك

الف مبروك علي حل المشكلة و اهلا بيك في القسم اي وقت
18-01-2011, 02:15 PM
Ahmed.TV

اقتباس:

المشاركة الأصلية كتبت بواسطة amartaha33

السلام عليكم ورحمة الله وبركاته
انا غيرت فلتر الهواء والعربية بقت كويسه الحمد لله والمشكله اختفت
"انا شتريتة من مودرن الى فى شارع الحجاز ب 130 جنيه بالضريبة "
وبالنسبة لكمية الزيت بتاعت الفتيس روحت قستها عند واحد متخصص فى الزيت قاسها لاقاها كويسه "انا كنت بقيس غلط لازم العربية تاخد مارش r وبعدين تقيس"

بيتهيالى كده مش لازم بقى التوكيل دلوقتى العربيه اتظبطت والحمد لله وانا مش ناقص مصاريف تانى دلوقتى

فى النهاية شكرا لافضل منتدى ولكل الاعضاء المحترمين الى ساعدونى بكل حب واخلاص انى احل مشكلتى

سبحانك اللهم وبحمدك ، أشهد أن لا إله إلا أنت أستغفرك وأتوب إليك

الف مليون مبروك يا باشا

والحمد لله ان مشكلتك اتحلت على خير

وانا سعيد بحضرتك جدااا , عشان حضرتك انسان محترم جدا وافادتنا بتاكيدك على كلامنا فى تشخيص المشكلة باضافة حل مشكلتك بعد ما انتهت على خير وطمنتنا عليك

وده بيفيد باقى الاعضاء , اللى ممكن يواجهوا نفس مشكلتك , وبياكد ملعوماتنا وتشخصنا للمشكلة

بصراحة جزاك الله خيرا بامانة

واهلا بيك معانا دايما واتشرفنا بمعرفة رجل محترم مثلك

تقبل تحياتى
23-05-2011, 12:31 AM
egypt0777

ممكن صورة من الطرمبه ده و مكان الفلتر