حد عندة فكرة عن شراء السيارات الى عليها حظر بيع

**hima1405** · 12-01-2011 07:29 PM

السلام عليكم ورحمة الله و بركاتة
انا ان شاء الله حجيب عربية و كان فى اكتر من واحدة معروضة عليا و الحمد لله اخترت واحد بس هيا عليها حظر بيع و الراجل عايز ياخد جزء من المبلغ المطلوب علشان يفك الحظر الى عليها و انا عايز اضمن الراجل دة يا ريت يا اخوانا حد يقولى اعمل اية و يفيدنى فى الموضوع دة
ولكم جزيل الشكر

**mahmoudysf** · 12-01-2011 09:30 PM

هل السيارة استيراد معوقين

**hima1405** · 13-01-2011 01:43 AM

لا مش استيراد معوقين ولا حاجة

**a7madramadan** · 13-01-2011 02:57 AM

المبلغ الي هياخدو تكتب بيه كمبياله عليه وخلاص ..... ده رأيي البسيط وأهل الخبرة ممكن يفيدوك لو في اجراء افضل

**hardman20060** · 13-01-2011 05:55 PM

اول حاجه تتاكد ان العربيه باسمه يعني تشوف البطاقه والرخصه ورخصه القياده وتعرف مكان بيته وشغله وبعد كده ادفعله نص تمن العربيه واكتب بيه عقد ابتدائي واستلم العربيه والرخصه وامشي بيها وخليه يفك الحظر . الاجراءات دي هتاخد حوالي 3 اسابيع وبعد كده يتفك الحظر ويخلصلك بقيه الاجراءات.

**A.Saad** · 13-01-2011 11:20 PM

قانونا
مش هتقدر تسجل ملكية فى الشهر العقارى
او تخللى الرخصة باسمك فى المرور طالما عليها حظر بيع
يبقى لازم الحظر يتشال الاول
عندك طريقتين
الاولى صعبة ان البنك ينقل الاقساط باسمك وتبقى انت مقسط مع البنك
اغلب البنوك ان مكنش كلها مش بتردى
التانية
تكيش للبائع جزء من المبلغ او كله
ياخد الفلوس يفك الحظر
ياخد جواب من البنك للمرور يطلع رخص من غير حظر
يبيع ليك وتسجل فى الشهر العقارى
مخاطر الطريقة التانية
ان البائع يكون نصاب وتيت وهنا انت معاك العربية لكن مش هتعرف تمشى بيها ولو مسروقة ورخصها مضروبة تبقى كملت
ولو خد الفلوس واختفى مش هتعرف تجيبه
يبقى لازم تتأكد ان البائع
ليه محل عمل
ليه محل اقامة
يكتب وصل امانة بالمبلغ مش كمبيالة
لان وصل الامانة فيه حبس
الكمبيالة لا
شيكات من بنك اه
شيكات من مكتبة برده لا
وتاخد العربية وتخليها معاك هيا والرخص
وممكن تدى الفلوس وانت معاه فى البنك وتاخد الجواب وليا صديق عملها فى كونتاكت بس البائع كان ليه معارف خد الجواب فى ساعتها