الموضوع: قصة حياة زقردة (السبارك) 5000 كم

قصة حياة زقردة منصور

اتولدت زقردة (السبارك) في يوم 12/6/2010 في معرض القاهرة للسيارات بجسر السويس

اخدتها و روحت بيها البيت و ركنتها جنب اختها عديلة (الفيرنا).........و انا جاي من المعرض لحد البيت لقيت ان زقردة في منتهي النعومة علي الارض و بتجري و مكنتش مصدق انها 1000 سي سي

و ده فيديو لسحب العربية من صفر الي 100 كم

[youtube]http://www.youtube.com/watch?v=go-v1EwRsPI[/youtube]


و ده فيديو تاني فوق ال 100 كم

[youtube]http://www.youtube.com/watch?v=t-kUjBQ44ps[/youtube]


و من ساعتها و انا رايح جاي باخد زقردة معايا......ناعمة و صغيرة و الباور بتاعها حلو جدا (اخف من الفيرنا) و التكييف بارد جدا بس طبعا بياخد وقت لو العربية كانت مركونة في حتة فيها شمس
التكيف مبيأثرش جامد علي السحب......و احلي ميزة فيها انك اي مكان فاضي من غير متفكر حينفع تركن فيه....



المهم عدت الايام و انا مليش غير زقردة (السبارك) و سايب عديلة(الفيرنا) تحت البيت......

قولت لازم اجرب زقردة علي طريق سريع بقي........و بالمرة افسحها
روحت رايح بيها الساحل الشمالي و اسكندرية و ده التقرير بتاع السفرية

http://www.nilemotors.net/Nile/169386-a.html


طبعا اما رجعت من الساحل كانت قصة الحب اللي بيني و بين زقردة تعمقت اكتر و اكتر و عديلة مش معبرها....و ديه النقطة اللي مأخدتش بالي منها..........

و بعد كده والدي كان جاي من السفر و مكنش عرف انا جبت ايه.........اول ما شافها في المطار قالي : و ديه ان شاء الله فين الريموت بتاعها ؟؟؟!! و طبعا تريقة طول الطريق.......و زقردة في منتهي الاحباط

والدي كان بياخد عديلة و يروح مشاويره..و طبعا عديلة اخدت شوية وضعها و حست ان في حد بيعبرها........


في يوم من الايام والدي كان رايح التجمع الخامس و كانت عديلة مقفول عليها بعربية صف تاني....فأضطر انه ياخد زقردة.......!!!
اول ما رجع قالي العربية ديه جميلة جداا
و روحنا سافرنا بيها بعد كام يوم مارينا و والدي كان معايا و رجعنا في نفس اليوم..... و والدي ساعتها مكنش مصدق ....و زقردة زي الاسد مبتقولش لأ......

و من هنا و رايح زقردة مع والدي مسبهاش لحد ما سافر.......و كل ده و عديلة بتصوت


طبعا عديلة كانت كلها حقد و غل و كره لأختها زقردة.....و هو ده اللي معملتش حسابه.......

عديلة أجرت واحد اسمه (متولي) فيات 128 قديمة جدااا..........و انا واقف بزقردة في اشارة جسر السويس......راح متولي علي غفلة ضرب زقردة بالشلوط ( بس كان شلوط غبي بصراحة )

روحت واخدها جري علي العناية المركزة (السمكري)...و كان المنظر كده عند الكشف....

[youtube]http://www.youtube.com/watch?v=T7ZQtFWIYNg[/youtube]

و ده فيديو من جوه

[youtube]http://www.youtube.com/watch?v=s_ABpS25EX8[/youtube]






السمكري قالي انها حتتكلف 1800 جنيه و قعدت عنده حوالي 4 ايام الحمد لله كل حاجة اتصلحت و متغيرتش..... حتي الاكصدام شكله مكنش نافع بس الحمد لله رجع زي الاول.......و سألت السمكري ساعتها عن رأيه في الصاج بتاعها ...قالي كل العربيات الجديدة خفيفة ...بس قالي انه احسن من الفيرنا...و طبعا وديتها لبتاع الدوكو.....و اتكلفت 750 جنيه

و الحمد لله زقردة رجعت بالسلامة و ده فيديو بعد الحادثة.....

[youtube]http://www.youtube.com/watch?v=AN1SQd95qPM[/youtube]

---

#000000

بعد الموضوع ده ب 4 ايام كانت زقردة حتم 5000 كم و قولت يبقي لازم اروح بقي و اظبطها عشان نفسيتها بعد الحادثة.......قولت اروح مركز الصيانة اللي في التجمع الخامس لأن الاعضاء اللي عملت فيه صيانة شكرت فيه اوي.......

وصلت الساعة 12:30 قولت طبعا انا كدة جاي ف معاد حيبقي زحمة.....
علي فكرة المركز ده في شارع التسعين في بنزينة شل......اول ما وصلت لاقيت مهندس الاستقبال سألني عايز اعمل ايه و احط زيت نوعه ايه و قولتله علي شوية حاجات انا كنت ملاحظها لي العربية عشان يكشفوا عليها.......لاقيته قالي خلاص حضرتك اتفضل....و راحو مدخليين العربية علي طول و مكنش في حد غيري غير عربية تانية كانت اوبل متهيألي

و روحت واقف جنب عربيتي و العربية خلصت بعد نص ساعة....يعني 1:10 كنت خلصت الحساب و ماشي

غيرت زيت شل 5000 الاف و فلتر زيت و نضفلي فلتر الهواء و البنزين و كشف علي العفشة و نضف التيل الخلفي

و هي ديه الفاتورة

بالنسبة لرأيي في مركز الصيانة فهو مركز ممتاز و مفيهوش زحمة و مميزاته انك بتبقي جنب عربيتك....لكن متهيألي مينفعش في الصيانات الكبيرة او الاعطال
و ديه شوية فيديوهات للمركز

[youtube]http://www.youtube.com/watch?v=TnjjcBm8Fy0[/youtube]

[youtube]http://www.youtube.com/watch?v=o9uTP50ykE4[/youtube]

[youtube]http://www.youtube.com/watch?v=t4Hqhp4btBg[/youtube]





و بعد كدة اخدت قردة و حسيت ان هي مفرفشة كدة و رجعت زي زمان

الله ينور عليك يا جوكر