الموضوع: توضيح اداري هام لمن يهمه امر ما يحدث الان بالمنتدى

المشاركة الأصلية كتبت بواسطة ashouhdy

@كريم منير

ممكن اعرف بجد انتم بتسدفيدوا اية انت و المشرفين ومراقب المنتدى السرى :)))من حوار المنتدى دة ووجع القلب معقول هى قيمة الاعلانات بس ... اصل بصراحة متقنعنيش انك يتضيع وقتك وسايب شغلك و بيتك وقاعد مع المنتدى فقط ومتابع مواضيع ومراقبات وهاكات ووجع قلب

يعنى اية المقابل بجد ؟

عاة مابحبش اتكلم في الموضوع ده مطلقا عشان بيكون محرج ليا
ولكن عشان احنا فعلا اهل واتعودت معاكم على الصدق
هاقولك
المنتدى كملكيه (والملك لله جميعا) ملك العبد لله بعد تصافي بقية الشركاء ولم يبقى اي شريك له في ذمتي شيئ والحمد لله
المنتدى له دخل طبعا من اعلانات
لكنه محدود جدا عشان بختار بعناية جدا الكيف مش الكم
وليك انك تعرف اني بزور كل المعلنين قبل الاعلان قبل مايعرفوا اني جاي واشوف الوضع
وبصراحة مفيش غير 2 بس اخطأت في نوعيتهم غيركدة بفضل الله كلهم يهمني فيهم خدمة الاعضاء

الاشراف بالكامل تطوعي
ايوة تطوعي لا يتقاضوا مليم
وعليهم شروط اقسى بكتير من العضو العادي
ودخول مجلس اشراف نايل موتورز مش عشان بتاعي ولكنه فعلا وسام تميز لصاحبه
لانه شهادة اعتراف من نخبه من صفوة العقول انه شخص محترم
ومجلس ادارة نايل موتورز اناس يشهد لهم الكبير قبل الصغير بكل احترام
ورغم ملكيتي للمنتدى الا اني استشيرهم في كل كبيرة وصغيرة
اذا كان اشرف الخلق سيدي وسيدك كان بيسال اصحابه وهو مكشوف عنه الحجاب
انا هاخد قرارات بعقلي لوحدي
ليه هو انا احسن من العقول دي كلها

المشرف الوحيد اللي ماشوفتوش هو اللي اتذكر اسمه
وواحد كمان دخل جديد لكن الكثير من المشرفين اجمعوا على نزاهته
المراقب السري هي عضوية اعتبارية يستخدمها بعض المشرفين

اما بقي واجع قلبي ليه
ده حوار ممكن مع احترامي الشديد لسنك ممكن ماتدركوش دلوقتي
تعرف الصدقة الجارية
تعرف العمل الخيري التطوعي
تقدر تقول حاجة زي كدة
ارشيف متكامل لكل باحث عن معلومة على النت
يمكن ماكونش صاحب المعلومة
لكني وفرت له السبيل انه يقولها

والمنتدى شال نفسه في وقت ما
لكنه مصاريفه زادت في الفترة الاخيرة
ورغم عرض عدد من التوكيلات انها تكون الراعي الرسمي
الا اني رفضت تماما
لضمان الحيادية
وان المعلومة توصل صح بدون تاثير طرف خارجي
يا ريت تكون الصورة وضحت
----------------
محمد ممدوح بتفكرنا ليه يا اخي
من المناظر القليله في حياتي اللي بفتكرها لم امشي بسرعة منظر زجاج سيارتك وهو مهشم بفعل راس المتوفي وعليه بقايا من شعره
حقيقي بيقشعر جلدي كلما تذكرته
اعانك الله
--------------
محمد ابو الوليد
معلش اللي قولته درئا للشبهات وعدم التعريض ممن قد لا يعون ذلك ويقعو في المحظور
واشيل انا ذنوب قد كدة يا عم
انا مش ناقص كفاية اللي عندي :-)

المشاركة الأصلية كتبت بواسطة Karim_Monir

----------------
محمد ممدوح بتفكرنا ليه يا اخي
من المناظر القليله في حياتي اللي بفتكرها لم امشي بسرعة منظر زجاج سيارتك وهو مهشم بفعل راس المتوفي وعليه بقايا من شعره
حقيقي بيقشعر جلدي كلما تذكرته
اعانك الله

معلش يا كيمو دى اكتر لقطة معلقة فى دماغى....

ربنا ما يحطك او يحط اى حد فى الموقف دة بس انت مش متخيل يعنى ايه لما واحد يقع فى مصيبة زى كدة و اكلمك اقولك "معلش انا مش حقدر اجى عشان عملت حادثة" و بعدها يطلعلك اكتر من 120 شخص من تحت الارض... اللى جالى على مكان الحادثة و ملحقنيش فا كمل على القسم و فضل هناك للساعة 6 مساء و اللى واقفين برة مبنى النيابة و اللى معايا على التليفون كل شوية للاطمئنان عليا.... و ولا واحد من الناس دى انا مشوفتهاش بعينى قبل كدة ولا حتى حطيت ايدى فى ايد حد منهم قبل كدة عشان اسلم سلام ربنا... دة طبعا غير الناس اللى سالت عليا من خلال المنتدى فى مواضيع الحادثة المختلفة

الناس دى اقصى حاجة كانوا اليوزر نيم بتاعى من خلال رد على سؤال ولا رفعت لحد صورة توضيحية ولا حتى اى كلمتين فى محاولة لحل مشكلة و ممكن ميكونوش مفيدين اوى حتى... بجد بجد مكنتش متخيل ان فيه ناس ممكن تعمل كدة مع حد متعرفوش... انا بجد فى الفترة دى مكنتش شوفت اى حد على المستوى الشخصى لان دى كانت اول محاولة لحضور مقابلة و مكنش حصل اى مقابلات لقسم الدايو قبل كدة فا صعب اوى اتخيل حد يخاف على حد و يهتم بيه و يبقى عايز يساعدة و هو ميعرفش عنة اى حاجة نهائى

يا راجل دا حتى انا مكنتش اعرفك اصلا و كانت اول مكالمة تليفون بينا كانت قبل الحادثة بحوالى نص يوم لما كنت فى التوفيقية يوم الخميس و بسالك على الانذار و السنتر و قولتلى على موضوع المقابلة و قولتك ان شاء الله جاى.... و تانى يوم الاقيك انت و الزملاء جنبى و حتى تكرمت و عرضت عليا ان والدك يحضر الموضوع هو كمان بما انه محامى...كل دة بتقدمة لواحد انت متعرفش عنة حاجة غير بس مكالمة التليفون اللى كان بيسالك فيها عن محل فى التوفيقية؟؟؟

كانت حاجة غريبة عليا بجد انى اشوف كدة.... و مكنتش متوقع ان مساعدة الناس على النت من خلال المنتدى ممكن تكون رابطة قوية بالشكل دة بين الناس و بعضها و يبقوا فعلا اجدع من ناس تعرفها و يعرفوك من سنين و يمكن كمان كلوا معاك عيش و ملح.... فعلا كانت مفاجئة كبيرة ليا و كانت مفاجئة سعيدة و حببتنى فى المنتدى اكتر و فى اعضائة و فى المشاركة فيه

معلش اذا كان الموقف نفسة مش ظريف لكن بجد دة اكبر دليل على مدى ترابط الناس فى المنتدى دة و حبهم لبعض

MMamdouh