الموضوع: مقارنة ما بين السيراتو و الكارينز

السلام عليكم

إمبارح إتيحت لى تجربة ركوب و قيادة كيا كارينز
تم إستلام العربية من الطارق صباحآ و روحنا رخصنا العربية و لفينا بيها حوالى 150 كيلو
طبعآ بما إنى مالك لسيراتو فكنت بقارن ما بينهم من الداخل و لما سقتها لمسافة ليست قصيرة كنت بقارن من حيث الأداء

مبدئيآ الكارينز كانت أول فئة أوتوماتيك وكيل فيها جنط 16

إنطباعى عن الكارينز
1- العربية من الخارج شكلها حلو و كبير و مع الألوان الغامقة بيديها فخامة خصوصآ إن الزجاج الخلفى و الأبواب الخلفية فيميه
2- من الداخل الصالون واسع جدآ و الكنبة تاخد ثلاث أفراد مستريحين
3- الشنطة طبعآ واسعة جدآ و عجبتنى فكرة الأرضية المتقسمة لأماكن تخزين
لكن المشكلة ان الإستبن أصبح مكانه فى أسفل السيارة

مقارنتها بالسيراتو
أنا هقارنها من ناحية الأداء عشان طبعآ العربيتين من فئتين مختلفتين فمش هينفع نقول مثلآ ان الكارينز أوسع من السيراتو
طبعآ كلنا عارفين الموتور واحد فى العربيتين و كذلك نفس الفتيس الأربع نقلات

حسيت ان السيراتو طلعتها أجمد شوية من الكارنز
فى المقابل عزل صوت الموتور فى الكارنز أفضل قليلآ من السيراتو

إحتجت انى أدوس فرامل جامد شوية حسيت ان العربية بتميل لقدام زيادة عن اللزوم على عكس السيراتو اللى عمرى محسيت فيها بالمشكلة دى من أول ما إستلمناها
مع العلم ان كاوتش الكارنز كومهو لكن السيراتو نيكسن .. مش عارف هل ممكن يكون الكاوتش الكومهمو مش كويس؟؟

العفشة فى الكارينز أفضل من السيراتو و أهدأ مع المطبات

بعض المعلومات الفنية عن العربيتين:
الكارينز:

الطول: 4545 mm
العرض: 1820 mm
الإرتفاع لحد السقف: 1720 mm
قاعدة العجلات : 2700 mm
الإرتفاع عن الأرض: 156 mm
الوزن: 1512 كجم

السيراتو:

الطول:4530 mm
العرض:1775 mm
الإرتفاع لحد السقف:1460 mm
قاعدة العجلات:2650 mm
الإرتفاع عن الأرض:150 mm
الوزن: 1326 كجم

المعلومات دى مجمعها من موقع كيا و موقع Wiki cars

فى النهاية العربيتين كويسين و الحمد لله انا مبسوط من السيراتو و الكارينز
و ربنا يبارك لصاحبها فى العربية و يباركلنا فى سيارتنا
لكن كل واحدة منهم ليها فئة و المقارنة دى هى إنطباعى الشخصى عن العربيتين